Stotr 103:1-22
Davidachem git.
103 Mhojea jivan,* Jehovachi vakhannʼnni korum,Mhojem akʼkhem kalliz tachea povitr nanvachi vakhannʼnni korum.
2 Mhojea jiva,* Jehovachi vakhannʼnni kor,Tannem jem kitem kelam tem hanv kednanch visorna zaum.
3 To tuje sogle guneanv bhogxita,Ani tujim soglim duensam borim korta,
4 To tuka fonddantlean bhair kaddun tuzo jiv salvar korta,Ani aplea visvaxi mogacho ani kakuticho mukutt tuka ghalta.
5 To jivitbhor tuka boreo vostu diun dhadoxi korta,Jea vorvim, tujem tornattponn ghonni bhaxen novea bollan bhortolem.
6 Zulum sostolea soglea thaim,Jehova nitivontponnan vagta ani tankam neai dita.
7 Tannem Moizesak apleo vatto kolloileo,Izraelachea putank aplim kamam kolloilim.
8 Jehova kakutin ani doie-maien* bhorlolo Dev,To rokddoch ragar zaina toslo ani visvaxi mogan bhorlolo Dev.
9 To sodankal chuki sodhit ravchona,Toxench to sasnak rag gheun boschona.
10 Amchea patkam pormonnem to amche lagim vagonk na,Toxench, amchea guneanvanchi favo ti khast tannem amkam diunk na.
11 Karonn mollob prithume poros jitlem unch asa,Titlo vorto, tachi bhirant dhortat tanchea pasot tacho visvaxi mog asa.
12 Udent ani ostom* eka-meka thaun jitli pois asa,Title pois, amchea thaun tannem amche oprad uddoileat.
13 Ek bapui aplea putank doia dakhoita toso,Apli bhirant dhortoleank Jehova doia dakhoita.
14 Karonn amkam koxim ghoddleant tem to bore bhaxen zannam,Ami fokot dhulʼl mhunn to ugddas dovorta.
15 Ek-na-ek dis morta tea munxachem jivit tonna bhaxen asta,To xetantlea fula bhaxen fulta.
16 Punn varo marta tednam tem nanch zata,Tem thoim asonkuch na zalʼlea bhaxen nanch zata.*
17 Punn tachi bhirant dhorta tanchea thaim,Jehovacho visvaxi mog sasnachea-sasnak poriant* urta,Ani tachem nitivontponn tanchea bhurgeanchea-bhurgeank sodankal urta,
18 Hoi, tacho korar samballttat,Ani tache hukum bariksannen pallttat tanchea pasot urta.
19 Jehovan sorgar aplem xinvason thir stapon kelam,Ani to sogleancher apli razvottki choloita.
20 Tachea soglea xoktivont devdutamno,Je tachem utor pallttat ani tachem aikotat,* Jehovachi vakhannʼnni korat.
21 Tachea soglea fouzamno,Tachea sevokamno, je tachi khuxi kortat, Jehovachi vakhannʼnni korat.
22 Tache sogle rochnne,To zoim-zoim raz choloita thoim-thoim, Jehovachi vakhannʼnni korat.
Mhozo akʼkho jiv* Jehovachi vakhannʼnni korum.
