Stotr 39:1-13
Mukhel songitkarak; Jeduthunachem.* Davidachem songit.
39 Hanvem mhunnttlem: “Mhoje jiben patok korina zaunk,Hanv samballun panvl ghetolom.
Ek noxtto munis mhojea mukhar asom poriant,Hanv mhojea tonddak logom* ghaltolom.”
2 Hanv mono zalom ani vogi ravlom,Borea vostum vixim pasun hanv kainch ulounk na,Punn mhoji dukh sosunk zaina titli asli.*
3 Mhojem kalliz bhitorlean lhastalem.*
Hanv kholaien chintit aslom* tednam to uzo pettot ravlo.
Uprant hanv* uloilom:
4 “Jehova Deva, mhozo xevott kednam zatoloAni mhoje dis kitle urleat tem somzonk mhaka modot kor,Mhojem jivit kitlem unnem asa tem mhaka kollom-di.
5 Hem khorem ki tunvem mhaka thoddech* dis dileat,Ani mhojea jivitachim vorsam tujea mukhar kainch nhoi.
Hoi, ek munis surokxit asa oso dislear pasun, dor ek munis fokot ek svas. (Selah)
6 Khorench, dor ek munis savlle bhaxen bhonvta.
To bexttoch hanga-thoim dhanvta.*
To girestkai ektthaim korta, punn tacho konnank faido zatolo tem taka khoborna.
7 Tor Jehova Deva, hanv kiteacher mhunn mhozo bhorvonso dovrum?
Tum ekloch mhozo bhorvonso zaun asa.
8 Mhaka mhojea soglea opradam thaun salvar kor,Murkhak mhojeo moskoreo korunk sondhi dinaka.
9 Hanv vogi ravlom,Hanv mhojem tondd ugddunk xoklom na,Karonn hem tunvem kelam.
10 Tunvem mhojer dhaddloli pidda kadd,Tujea hatacho mar sosun-sosun mhaka puro zalam.
11 Tum munxak tachea guneanva pasot khast lavun sudhraita,Ek kidd* kopdde khaun uddoita tea bhaxen tum tacheo sogleo moladik vostu khaun uddoita.
Khorench, dor eklo fokot ek svas. (Selah)
12 Jehova Deva, mhojem magnnem aik,Hanv modoti pasot ulo martam tem aikon ghe.
Mhojim dukam pollounk naslolea bhaxen korinaka.
Karonn hanv tuje pasot fokot ek pordexi,Mhojea soglea purvozam bhaxen, hanv-ui ek provas korpi.
13 Hanv moron, kabar zaunchea poilim,Mhaka khuxalkai mellchea khatir krodhan bhorloli tuji nodor mhojea thaun pois kor.”
Footnotes
^ Xobdhkox polloi.
^ Mhunnche, zonvaranchea tonddak bandtat ti dori.
^ Vo “vaddli.”
^ Utran utor, “gorom zalem.”
^ Vo “Hanv haskar-suskar soddttalom.”
^ Utran utor, “mhoji jib.”
^ Utran utor, “char bottam itle.”
^ Utran utor, “bovall korta.”
^ Ho ek nas korta toslo kiddo zo fulpakhea sarko dista. Inglez bhaxent “moth.”
