Stotr 78:1-72
Maskil.* Asafachem git.
78 Mhojea lokamno, mhoji xikounn* aikat,Mhojea tonddantlean bhair sorta tea utrank kan diat.
2 Hanv ek mhunnʼnni uzar korun uloitolom.
Adlea kalla voilim umannim sangtolom.
3 Jeo vostu ami aikoleat ani ami zannant,Amchea purvozamnim amkam jem sanglam,
4 Tem ami tanchea putam koddlean lipounchenant,Vakhannʼnni favo aslolea Jehovachea kamam vixim ani tachea bolla vixim,Tannem kelʼlea ojapachea vostum vixim,Ami ieunchi asa tea pillgek sangtole.
5 Tannem Jakobachea* ugddasak haddunk adnea dili,Ani tannem Izraelant ek kaido stapon kelo,Heo vostu aplea bhurgeank kollouncheo mhunnTannem amchea purvozank hukum dilo.
6 Jea vorvim ieunchi asa tea pillgek hem kollttolem aslem,Fuddem zolmochim asat tea bhurgeank hem kollttolem aslem.
Ani hea vorvim ti pillgi aplea bhurgeank hem sangtolim aslim.
7 Tednam tim Devacher visvas dovortolim aslim.
Tim Devachim kamam visorchim naslim,Punn tacheo adnea pallttolim aslim.
8 Tednam te aplea purvozam bhaxen zaunche nasle,Ek hottʼtti* ani add voita tosli pillgi,Ek osli pillgi zanchem kalliz thir naslem,*Ani ji Devak visvaxi nasli.
9 Efraimantle lok dhonu gheun toiar asle,Punn zhuzachea disa te pollon gele.
10 Tannim Devacho korar moddlo,Ani tachea kaidea pormonnem cholonk nakarlem.
11 Tannem koslim kamam kelʼlim tim-ui te visorle,Tannem kelʼlim tim ojapachim kamam tannim ugddas dovrunk nant.
12 Tannem Ejiptt desant, Zoan vattarant,Tanchea purvozanchea dolleam mukhar ojapachim kamam kelim.
13 Tannim doria par korun voichem mhunn tannem doria doxi kelo,Tannem dhoronn* ubem kelʼlea bhaxen udok ubem kelem.
14 Disachea vellar tannem kupan,Ani rat-bhor ujeachea uzvaddan tankam vatt dakhoili.
15 Oronnʼnneant tannem khoddpam foddlim,Khol doriantlea udka bhaxen tannem tankam bhorpur udok pieunk dilem.
16 Tannem khoddpa thaun vhall vhanvoile,Ani nhoim-em bhaxen udok vhanvoilem.
17 Punn oronnʼnneant Bhov Vortea Devachea add vochon,Te tachea add patok korit ravle.
18 Apleak ruch ailʼli tem jevonn magon,Tannim aplea kallzant Devachi porikxa keli.
19 Tor te Deva add uloile,Tannim mhunnttlem: “Dev amkam ranvott vattarant jevonn diunk xokta kai?”*
20 Polloi! Tannem khoddpacher danddo marlo,Jea vorvim udok bhair ailem ani udkache vhall vhanvonk lagle.
Tori astana tannim vicharlem, “To amkam unddo-i diunk xokta kai,Vo to aplea lokank mas diunk xokta kai?”
21 Jehovan tanchem aikolem tednam to boroch ragar zalo,Tannem Jakobacher uzo dhaddlo,Ani Izraela add tacho rag choddlo
22 Karonn tannim Devacher bhavarth dovrunk na,To tankam salvar korunk xokta mhunn tannim tacher visvas dovrunk na.
23 Tor tannem voir aslolea kupank hukum dilo,Ani tannem mollbachim daram ugoddlim.
24 Tankam khaunk to pausa bhaxen manʼna votoit ravlo,Tannem tankam sorga voilo dano dilo.
25 Munxamnim xoktivontancho* unddo khailo,Dhadoxi zaisor tannem tankam khaunk dilem.
26 Tannem mollbar udentechem varem,Ani aple xokten dokxinnechem varem soddlem.
27 Tannem dhulʼli bhaxen tancher masacho paus votoilo,Doria deger aslolea renve bhaxen suknneancho paus votoilo.
28 Tannem tea suknneank aplea* ravpachea zagea modem,Tachea tombunchea sorvbhonvtonnim poddom-xim kelim.
29 Ani tannim tim khailim, pott futto-sor tannim tim khailim,Te axele tem tannem tankam dilem.
30 Punn tanchi as purnn zaunchea poilinch,Tanchem jevonn tanchea tonddantuch astana,
31 Tanchea add Devacho rag pettlo.
Tannem tanchea bollixtt munxank jivexim marun uddoile,Tannem Izraelachea tornatteank sokol uddoile.
32 Tori astana te anikui patkam korit ravle,Ani tannim tachea ojapachea kamancher bhavarth dovrunk na.
33 Taka lagon, svasa bhaxen tannem tanche dis sompoile,Ani okosmat ailʼlea akanta bhaxen tanchim vorsam kabar kelim.
34 Punn moronn dhaddun to tankam khast laita title-i pavtti te tacho adar magtale,Te porot ietale ani Devak sodhtale,
35 Ani Dev tanchem Khoddop aslo,Hoi, Bhov Vorto Dev tancho Soddoupi* aslo mhunn te ugddas kortale.
36 Punn tannim aplea tonddan taka fosouncho proitn kelo,Ani aplea jiben taka fott marli.
37 Tachea pasot tanchem kalliz thir naslem,Ani te tachea korarak visvaxi nasle.
38 Punn to doiall aslo,To tanche guneanv bhogxitalo* ani tanchem nisontton korinaslo,Aplo soglo rag tancher votounchea bodlek,Tannem zaite pavtti aplea ragacher tabo dovorlo.
39 Karonn te fokot munis mhunn tannem ugddas dovorlo,Te varea bhaxen asat, jem ek pavtti marlea uprant porot iena.*
40 Ranvott vattarant kitle pavtti mhunn te tachea add gele,Ani oronnʼnneant kitle pavtti mhunn tannim taka dukh dilem!
41 Porot-porot tannim Devachi porikxa keli,Ani tannim Izraelachea Povitr Devak dukhoilo.
42 Tacho xoktivont hat te visorle,Te to dis visorle, jednam tannem tankam tanchea dusmana thaun vanchoilʼle,*
43 Koxeo tannem Ejipttant khunna keleo,Ani Zoanachea vattarant vizmitam kelim,
44 Ani koxe tannem Nilache kanal* rogtan bodolʼle,Jea udexim, tea lokank apleach vhallantlem udok pieunk mellonk na.
45 Tankam khaun uddounk tannem tancher ghans marta toslea musanchem bhirem dhaddlem,Ani tancho nas korunk bebeank dhaddle.
46 Tannem tanchem pik bhukelʼlea tollank dilem,Tanchea kamachem foll tollanchea bhireank dilem.
47 Tannem korveanchea pausan tanchea drakxanchea molleancho nas kelo,Ani tanchea anjiranchea zhaddanchem* nisontton korun uddoilem.
48 Vojem ukolpi tanchea zonvarancher tannem korveancho paus dhaddlo,Ani tanchea gorvam-menddrancher viz dhaddlem.*
49 Tannem tancher aplo zolltto rag votoilo,Tannem tancher krodh ani sonkoxtt dhaddlem,Tancher odruxtt haddpi devdutanche zome dhaddle.
50 Aplea raga pasot tannem vatt toiar keli.
Tannem tankam mornna thaun vanchounk na,Ani tannem tankam piddechea tabeant kele.
51 Xevottak tannem Ejipttachea soglea poilea putank marun uddoile,Hamachea tombumnim, bhurgeak zolmak haddpachea tanchea xoktechim poilim follam kabar kelim.
52 Uprant tannem aplea lokank eka hindda bhaxen Ejipttantlean bhair haddle,Ani ek gonvlli aplea menddrank vatt dakhoita toso, tannem tankam ranvott vattarant vatt dakhoili.
53 Tannem tankam surokxit ritin vhele,Ani tankam koslich bhirant nasli.
Dorian tanchea dusmanank gillun uddoile.
54 Ani tannem tankam aplea povitr vattarant haddle,Hea dongri vattarant haddle, zo tannem aplea uzvea hatan melloun ghetlolo.
55 Tannem tanchea mukhar raxttrank dhanvddaun ghatlim,Mezpache dorien tannem tankam daiz vanttun dilem,Tannem Izraelachea kullank ravonk ghoram dilim.
56 Punn te Bhov Vortea Devachi porikxa korit ravle, ani tachea add vochot ravle,Tannem apleo adnea tanchea ugddasak haddleo, punn tannim tancher dhean diunk na.
57 Te-ui fatt dakhoun soddun gele, aplea purvozam bhaxenuch te ghatki asle.
Dori luz* aslolea eka dhonu bhaxen te patieupa sarke nasle.
58 Unch-unch zage bandun te taka rag haddit ravle,Ani tanchea kantoilʼlea murteam vorvim tacho krodh vaddoit ravle.
59 Devan hem polloilem ani tacho rag anikui pettlo,Tor tannem Izraelak purnn toren nakarlo.
60 Xevottak tannem Shilocho povitr tombu soddun dilo,To tombu soddun dilo, zoim to munxam modem ravtalo.
61 Tannem aplea bollache nixanek koident vochonk dili,Tachem vorteponn dusmanachea hatant poddonk dilem.
62 Tannem aplea lokank tolvarichea tabeant kele,Ani aplea daizacher tacho rag pettlo.
63 Ujean tachea tornatteancho bhosm korun uddoilo,Ani tachea ankvar cheddvam pasot konnench kazarachim gitam gaunk nant.*
64 Tachea iadnikank tolvarin marun uddoile,Ani tancheo vidva roddonk nant.
65 Uprant nhidentlean utthlolea bhaxen Jehova utthlo,Drakxancho soro pieun ttaitt zalʼlo xoktivont munis sintidan ieta toso* to utthlo.
66 Ani tannem aplea dusmanank dhanvddaun ghatle,Tannem tankam sasnak lojek ghatle.
67 Tannem Juzecho tombu nakarlo,Tannem Efraimachea kullak vinchun kaddunk na.
68 Punn tannem Judachea kullak vinchun kaddlem,Tannem Sion Dongrak vinchun kaddlo, zacho to mog korta.
69 Tannem aplo povitr zago mollba bhaxen thir kelo,*Prithume bhaxen sasnachea-sasnak to stapon kelo.
70 Tannem aplea sevokak Davidak vinchun kaddlo,Ani taka menddreanchea addeantlo gheun ailo,
71 Zo dudh ditolea menddreanchi rakhonn kortalo.
Tannem taka Jakobacho, aplea lokancho,Ani aplem daiz aslolea Izraelacho, gonvlli kelo.
72 To promannik* kallzan tanchi kallji gheunk laglo,Ani khub borea bhaxen tannem tankam choloun vhelim.
Footnotes
^ Xobdhkox polloi.
^ Vo “mhozo kaido.”
^ Vo “Jakobachea sonstichea.”
^ Vo “jidʼdi.”
^ Vo “kalliz toiar naslem.”
^ Inglez bhaxent “dam.”
^ Vo “Dev ranvott vattarant mez manddunk xokta kai?”
^ Vo “devdutancho.”
^ Ho Dev vo Izrael zaunk xokta.
^ Vo “tanchea pasot Bodlo Ghevpi.”
^ Utran utor, “dhamptalo.”
^ Vo ghoddie, “Jivitacho svas, zo voita ani porot iena.”
^ Utran utor, “soddoilʼle.”
^ Vo “kharoz.”
^ Inglez bhaxent “sycamore tree.”
^ Vo ghoddie, “boroch zor dhaddlo.”
^ Vo “dhil.”
^ Utran utor, “Ani tachea ankvar cheddvanchim konnench vakhannʼnni korunk na.”
^ Vo “munis nivllota toso.”
^ Utran utor, “Tannem aplo povitr zago unch zagea sarko bandlo.”
^ Vo “guneanv naslolea.” Inglez bhaxent “integrity.”
