Stotr 119:1-176

  • Devachea moladik utra pasot upkar attovop

    • “Eka tornattean aplem jivit koxem nitoll dovrunk zata?” (9)

    • “Tunvem ugddasak haddloleo adnea mhaka avoddttat” (24)

    • “Karonn hanv tujea utracher bhorvonso dovortam” (74, 81, 114)

    • “Hanv tujea kaideacho kitlo mog kortam!” (97)

    • “Mhojea soglea xikoupeam poros mhaka chodd kholaiechi somjikai asa” (99)

    • “Tujem utor mhojea panvlank ek divo” (105)

    • “Tujea utrant boroilʼlem dor ek utor sot” (160)

    • Devachea kaideacho mog kortat tankam xanti melltta (165)

א [Aleph] 119  Te lok khuxal, je guneanva meklle* jietat,Je Jehovachea kaidea pormonnem choltat.  2  Te lok khuxal, je tannem ugddasak haddloleo adnea pallttat,Je aplea purnn kallzan taka sodhtat.  3  Te koslinch onitivontponnachim kamam korinant,Te tachea vattemnim choltat.  4  Tuje hukum bariksannen pallche mhunn,Tunvem adnea dilea.  5  Tuje nem-kaide sodanch pallunk,Hanv thir ravonk anvddetam!*  6  Tednanch hanv tujea soglea adneancher bariksannen dhean ditolom,Ani hanv lojek poddchom na.  7  Hanv tujea nitivont nirnnoi-am vixim xiktam tednam,Hanv promannik kallzan tuji vakhannʼnni kortolom.  8  Hanv tuje nem-kaide pallttolom. Tum mhaka purnn toren soddun dinaka. ב [Beth]  9  Eka tornattean aplem jivit koxem nitoll dovrunk zata?* Chotraien ravon ani tujea utra pormonnem vagon. 10  Hanv tuka mhojea purnn kallzan sodhtam. Tujea adneam thaun mhaka koddsoronk dinaka. 11  Tujea add patok korina zaunk,Hanvem tujim utram mhojea kallzant samballun dovorleant, 12  Jehova Deva, tuji vakhannʼnni zaum,Tuje nem-kaide mhaka xikoi. 13  Tunvem dilʼle sogle nitiche nirnnoi,Hanv mhojea vonttamnim kollit kortolom. 14  Dusrea soglea moladik vostum poros choddTum ugddasak haddtta tea kaideank lagon mhaka khuxalkai bhogta. 15  Hanv tujea hukumancher kholaien chintʼtam,*Ani tunvem dakhoilʼlea vattencher hanv mhoje dolle dovortam. 16  Tuje kaide mhaka avoddttat,Tujem utor hanv visorchom na. ג [Gimel] 17  Tujea sevoka lagim doiall toren vag,Jea vorvim hanv jietolom ani tujem utor pallttolom. 18  Tujea kaideantleo sobit vostum,Spoxttponnim pollounk mhoje dolle ugodd. 19  Hanv hea desant ek pordexi zaun asam,Mhojea thaun tujeo adnea lipoinaka. 20  Tujea nitichea nirnnoi-ank,Hanv soglo vell anvddetam. 21  Gorvixttank* tum tapoita,Tujea kaidea thaun koddsoron gelolea xirap poddlolea lokank tum tapoita. 22  Opman ani loz mhojea thaun pois kor,*Karonn tunvem ugddasak haddloleo adnea hanvem pallʼlleat. 23  Kunvor sangata boson mhojea add uloitat tednam pasun,Tuzo sevok tujea nem-kaideancher kholaien chintʼta.* 24  Tunvem ugddasak haddloleo adnea mhaka avoddttat,Teo mhojea pasot solʼle diupi zaun asat. ד [Daleth] 25  Hanv dhulʼlint poddlolom asam. Tujea utra pormonnem mhozo jiv samball. 26  Hanvem tuka mhojea soglea kamam vixim sanglem, ani tunvem mhaka zobab dilo,Mhaka tuje nem-kaide xikoi. 27  Tujea hukumancho orth* mhaka somzai,Jea vorvim hanv tujea sobit kamancher kholaien chintunk* pavtolom. 28  Dukhan buddon mhoji nhid gelea uddon. Tujea utra pormonnem mhaka ghottai di. 29  Fosovpachea vatte voilo mhaka pois kor,Ani tuzo kaido diun mhaka doia dakhoi. 30  Visvaxiponnachi vatt hanvem vinchun kaddlea. Tuje nitiche nirnnoi sarke mhunn hanv manun ghetam. 31  Tum ugddasak haddtta tea adneank hanv chittkon ravtam. Jehova Deva, mhaka niraxi zaunk dinaka.* 32  Tunvem dilʼlea adneanchea vatten hanv urben* choltolom,*Karonn tunvem mhojea kallzant tanchea pasot zago toiar kela.* ה [He] 33  Jehova Deva, tujea nem-kaideanchi vatt mhaka xikoi,Ani hanv xevott poriant tacher choltolom. 34  Tuzo kaido pallunk,Ani purnn kallzan tea pormonnem cholonkMhaka somjikai di. 35  Tujea adneanchea vatten mhaka choloi,*Karonn tanchea thaun mhaka sontos melltta. 36  Svarthi axe* vatten nhoi,Punn tum jeo adnea ugddasak haddtta, tanchea vatten mhojem kalliz voll. 37  Polkea vostum thaun mhoji nodor pois kor,Hanv tuje vatter cholchom mhunn mhozo jiv samball. 38  Tunvem tujea sevokak dilʼli bhas samball,*Jea vorvim lok tuji bhirant dhortole.* 39  Mhojea thaun opman pois kor, zachi mhaka bhirant asa,Karonn tuje nitiche nirnnoi bore asat. 40  Tujea hukumank hanv kitlo axetam tem polloi. Tujea nitivontponna pormonnem mhozo jiv samball. ו [Waw] 41  Jehova Deva, tunvem bhas dilʼlea pormonnem,*Mhaka tuzo visvaxi mog ani tujem taronn pollounk mellom. 42  Tednam hanv mhaka tomnne marta taka zobab ditolom,Karonn hanv tujea utracher visvas dovortam. 43  Sotachem utor mhojea tonddantlean kaddun uddoinaka,Karonn hanvem tujea nitichea nirnnoi-acher bhorvonso dovorla.* 44  Hanv sodanch tuzo kaido pallttolom,Sodam-sodankal to pallttolom. 45  Ani hanv surokxit zagear* choltolom-bhonvtolom,Karonn hanv tuje hukum sodhtam. 46  Tunvem ugddasak haddlolea kaideam vixim hanv razam mukhar uloitolom,Ani mhaka loz bhogchina. 47  Tujeo adnea mhaka avoddttat,Hoi, hanv tancho mog kortam. 48  Hanv mhoje hat ubarun tuka magnnem kortolom, karonn hanv tujea adneancho mog kortam,Ani hanv tujea nem-kaideam vixim kholaien chintʼtolom.* ז [Zayin] 49  Tujea sevokak dilʼlem utor* ugddas kor,Jea vorvim tum mhaka bhorvonso dita.* 50  Koxtt-dukhachea vellar tench mhaka bhuzvonn dita,Karonn tujea utramnim mhozo jiv samballʼlla. 51  Gorvixtt* lok mhojeo keddnneo kortat,Punn hanv tujea kaideam thaun koddsorona. 52  Jehova Deva, adlea kalla voile tuje nitiche nirnnoi hanv ugddas kortam,Ani tantuntlean mhaka bhuzvonn melltta. 53  Noxttea lokank lagon hanv ragan xiztam,Tuzo kaido nakartat, tea noxtteank lagon hanv ragan xiztam. 54  Hanv khoinsorui jieum,*Tuje nem-kaide mhojea pasot gitam koxim zaun asat. 55  Jehova Deva, ratchea vellar hanv tujea nanvacho ugddas kortam,Jea udexim hanv tujea kaideam pormonnem cholonk pavtolom. 56  Hi mhoji sonvoim zaun asa,Karonn hanvem tuje hukum pallʼlleat. ח [Heth] 57  Jehova mhozo vantto,Tujim utram pallttolom mhunn hanvem bhas dilea. 58  Hanv mhojea purnn kallzan tujea lagim vinoti kortam,Tunvem bhas* dilea tea pormonnem mhaka doia dakhoi. 59  Tum jeo adnea ugddasak haddtta teo porot pallcheo mhunnHanvem mhojeo vatto topasleat. 60  Hanv tujeo adnea rokddeoch pallttam,Hanv vell korina. 61  Noxtteanchea doriemnim mhaka gherav ghatla,Punn hanv tuzo kaido visorna. 62  Tujea nitivont nirnnoi-am pasot,Modianir* utthon hanv tuje upkar attoitam. 63  Tuji bhirant dhortat ani tuje hukum pallttat,Tancho sogleancho hanv ixtt zaun asam. 64  Jehova Deva, tujea visvaxi mogan prithum bhorlea,Tuje nem-kaide mhaka xikoi. ט [Teth] 65  Jehova Deva, tujea utra pormonnem,Tum tujea sevoka sangata bore toren vagla. 66  Mhaka xanneponnan vagonk xikoi ani mhaka ginean di,Karonn hanvem tujea kaideancher visvas dovorla. 67  Mhojer koxtt-dukh ieunchea poilim, hanv bhottkot ravtalom,*Punn atam hanv tujea utram pormonnem choltam. 68  Tum boro ani tujim kamam borim. Tuje nem-kaide mhaka xikoi. 69  Gorvixtt* lok fott marun mhojem nanv piddʼddear kortat,Punn hanv purnn kallzan tuje hukum pallttam. 70  Tanchem kalliz fatra sarkem ghott zalam,*Punn mhaka tuzo kaido avoddtta. 71  Mhojer koxtt-dukh aile tem borem zalem,Tea vorvim hanv tuje nem-kaide xiklom. 72  Tunvem kolloilʼlo kaido mhojea borea pasot asa,Bhangrachea ani chandichea hozaramnim kuddkeam poros moladik asa. י [Yod] 73  Tujea hatamnim mhaka ghoddlo ani mhaka rochlo. Hanvem tujeo adnea xikcheo mhunn,Mhaka somzonni di. 74  Tuji bhirant dhortat te mhaka polloitat ani khuxal zatat,Karonn hanv tujea utracher bhorvonso dovortam.* 75  Jehova Deva, tuje nirnnoi nitivont asat mhunn hanv zannam,Ani tujea visvaxiponnak lagon tunvem mhaka xist dilea. 76  Tunvem tujea sevokak bhas dilʼlea pormonnem,*Upkar korun tujea visvaxi mogan mhaka bhuzvonn di. 77  Hanv jivo uronk mhoji kakut kor,Karonn tuzo kaido mhaka avoddtta. 78  Gorvixtt* lok lojek poddom,Kiteak te kainch karonn nastana* mhojea sangata vaitt toren vagtat. Punn hanv tujea hukuma vixim kholaien chintʼtolom.* 79  Je tuji bhirant dhortat,Ani tum ugddasak haddtta teo adnea je zannant, te tujea lagim porot ieum. 80  Tuje nem-kaide pallttana, mhojem kalliz guneanva mekllem mellom,Jea udexim hanv lojek poddchom na. כ [Kaph] 81  Tuje koddlean melltta tea taronnak hanv axetam,Karonn hanv tujea utracher bhorvonso dovortam.* 82  Mhoje dolle tujea utrank axetat,Ani hanv mhunnttam: “Tum mhaka kednam bhuzvonn ditolo?” 83  Karonn hanv dhunvran sukon gelʼlea chambddeache battle sarkom zalam,Punn tuje nem-kaide hanv visorna. 84  Tujea sevokan anik kitle dis vatt polloit ravchem? Mhaka dhumallo ditat tanchi tum kednam zhoddtti kortolo? 85  Gorvixtt* lok, je tuje kaide moddttat,Te mhojea pasot fondd khonnttat. 86  Tuje sogle kaide visvas dovorpa sarke. Lok karonn nastana mhaka dhumallo ditat, mhaka modot kor! 87  Te mhaka prithume voilo kabar korchech asle,Punn hanvem tuje hukum pallop soddunk nant. 88  Tujea visvaxi mogak lagon mhozo jiv samball,Jea vorvim, tum jeo adnea ugddasak haddtta teo hanv pallttolom. ל [Lamed] 89  Jehova Deva, tujem utor,Sodankal sorgar thir urtolem. 90  Tujem visvaxiponn pillgean-pillgi poriant urta. Prithum thir uronk tunvem ti stapon kelea. 91  Teo* tujea nitichea nirnnoi-ank lagon aiz meren asat,Karonn te sogle tuje sevok zaun asat. 92  Mhaka tuje kaide avoddnasle zalear,Hanv koxtt-dukh sosun kabar zatolom aslom. 93  Hanv tuje hukum kednanch visorchom na,Karonn tanchea udexim tunvem mhozo jiv samballun dovorla. 94  Hanv tuzoch, mhaka salvar kor,Karonn hanvem tuje hukum sodhleat. 95  Noxtte mhozo nas korunk ravtat,Punn tum ugddasak haddtta tea tujea adneancher hanv bariksannen dhean ditam. 96  Hanvem soglea poripurnn vostunk ek xim asa ti polloilea,Punn tujea adneak xim na.* מ [Mem] 97  Hanv tujea kaideacho kitlo mog kortam! Dis-bhor tacher hanv kholaien chintʼtam. 98  Tuji adnea mhaka mhojea dusmanam poros chodd zannvaiecho korta,Karonn ti sodanch mhojea sangata asa. 99  Mhojea soglea xikoupeam poros mhaka chodd kholaiechi somjikai asa,Karonn tum ugddasak haddtta tea tujea adneancher hanv kholaien chintʼtam.* 100  Hanv zanntteam poros chodd somjikai dakhoun vagtam,Karonn hanv tuje hukum pallttam. 101  Hanvem tujem utor samballchem mhunn,Hanv noxtteanchea khoinchea-i vatten cholonk nakartam. 102  Hanv tujea nitichea nirnnoi-ank fatt korun pois vochona,Karonn tunvem mhaka suchounneo dileat. 103  Mhojea jiber tujim utram khub goddTim mhojea tonddant mhonva poros godd! 104  Tujea hukumank lagon hanv somjikaien vagtam. Taka lagon, hanv dor eke khotte vattecho dves kortam. נ [Nun] 105  Tujem utor mhojea panvlank ek divo,Ani mhojea vatte pasot ek uzvadd. 106  Hanv tuje nitiche nirnnoi pallttolom mhunn,Hanvem ek soput ghetla, ani hanv to purnn kortolom. 107  Mhaka khub koxtt-dukh sosunk poddlam. Jehova Deva, tujea utra pormonnem mhozo jiv samball. 108  Jehova Deva, upkar korun hanvem khuxen haddloleo vakʼkhannecheo bhetto manun ghe,Ani mhaka tujea nitichea nirnnoi-am vixim xikoi. 109  Mhozo jiv sodanch dhokeant asa,Punn hanv tuzo kaido visronk na. 110  Noxtteamnim mhojea pasot fas manddla,Punn hanv tujea hukumam thaun koddsoron vochonk na. 111  Tum ugddasak haddtta tea tujea adneank mhojem sasnachem daiz mhunn lekhtam,Karonn teo mhojem kalliz khuxal kortat. 112  Tuje nem-kaide pallunk hanvem nichov kela,Xevott poriant te pallunk hanvem nichov kela. ס [Samekh] 113  Tuka purnn toren visvaxi nant tea* lokancho hanv dves kortam,Punn hanv tujea kaideacho mog kortam. 114  Tum mhozo asro ani mhoji ddhal,Karonn hanv tujea utracher bhorvonso dovortam.* 115  Noxttea munxamno, mhojea thaun pois ravat,Jea vorvim hanv mhojea Devacheo adnea pallunk xoktolom. 116  Tum tujea utra* pormonnem mhaka modot kor,Jea vorvim hanv jieunk xoktolom. Mhaka aslolo bhorvonso niraxiponnant bodlonk dinaka.* 117  Hanv salvar zaunchom mhunn mhaka modot kor,Tednam hanv tujea nem-kaideancher sodanch dhean ditolom. 118  Tujea nem-kaideam thaun koddsoron voitat tea sogleank tum nakarta,Karonn te khotte ani fosoupi asat. 119  Upeog naslolea dhatuntlea kochrea bhaxen tum prithume voilea soglea noxtteank kaddun uddoita. Taka lagon, tum ugddasak haddtta tea adneancho hanv mog kortam. 120  Tujea bhirantin mhoji kudd koddkoddtta,Tujea nitichea nirnnoi-anchi* mhaka bhirant dista. ע [Ayin] 121  Hanv neai-an ani nitivontponnan vaglam,Mhojer zulum kortat tanchea hatant mhaka dinaka! 122  Tujea sevokachem borem zatolem mhunn gerentti di,Gorvixttank* mhojer zulum korunk dinaka. 123  Tujea koddlean melltta tea taronnachi vatt pollounAni tunvem nitivontponnan ji bhas dilea* tachi vatt polloun mhoje dolle thokle. 124  Tujea sevokak tuzo visvaxi mog dakhoi,Ani mhaka tuje nem-kaide xikoi. 125  Hanv tuzo sevok, mhaka somjikai di,Jea vorvim tum ugddasak haddtta teo adnea hanv zannam zaunk pavtolom. 126  Jehovan panvl gheuncho vell aila,Karonn tannim tuzo kaido moddla. 127  Taka lagon, bhangra poros chodd,Hoi, borea* bhangra poros chodd, hanv tujea adneancho mog kortam. 128  Tor, tuji dor ek suchounni* sarki mhunn hanv mantam,Dor eka khotte vattecho hanv dves kortam. פ [Pe] 129  Tum ugddasak haddtta teo tujeo adnea ojapacheo. Taka lagon, hanv teo pallttam. 130  Tujim utram ugddapim zalʼlean uzvadd melltta,Onnbhov nasloleank somjikai melltta. 131  Hanv tondd ugddun haskar-suskar soddttam,*Karonn hanv tujea adneank axetam. 132  Tujea nanvacho mog korpeam sangata tum nitichea nirnnoi-a pormonnem vagta toso,Mhojer dhean di ani mhoji doia kor. 133  Tunvem sanglolem tea pormonnem mhojea panvlank vatt dakhoi,*Kosleach torechea noxtteponnak mhojer odhikar cholounk dinaka. 134  Zulum kortat tanchea thaun mhaka vanchoi,*Ani hanv tuje hukum pallttolom. 135  Tujea sevokacher tujea mukhamollacho* uzvadd* fankoi,Ani mhaka tuje nem-kaide xikoi. 136  Mhojea dolleantlean dukanche vhall vhanvtat,Karonn lok tuje kaide pallinant. צ [Tsade] 137  Jehova Deva, tum nitivont,Ani tuje nitiche nirnnoi sarke asat. 138  Tum jeo adnea ugddasak haddtta teo nitivont,Ani tancher purnn toren visvas dovrunk zata. 139  Mhojea urbecho uzo mhaka bhosm korun uddoita,Karonn mhoje dusman tujim utram visorleat. 140  Tujem utor purnn toren xudʼdh asa,Ani tuzo sevok tacho mog korta. 141  Hanv kainch upeogacho naslolea bhaxen ani valor naslolea bhaxen asam,Tori astana hanv tuje hukum visronk na. 142  Tujem nitivontponn sasnachem,Ani tuzo kaido sotacho. 143  Sonkoxtt ani kotthin poristhiti mhojer aili zalear pasun,Tujeo adnea mhaka avoddttat. 144  Tum ugddasak haddtta teo adnea sodankal nitivontponnacheo asat. Hanv jivo urchom mhunn mhaka somjikai di. ק [Qoph] 145  Jehova Deva, hanv tuka mhojea purnn kallzan ulo martam, mhaka zobab di. Hanv tuje nem-kaide pallttolom. 146  Hanv tuka ulo martam, mhaka salvar kor! Tum ugddasak haddtta teo tujeo adnea hanv pallttolom. 147  Tujea lagim modot magonk hanv fantodd zaunchea poilim uttʼttham,Karonn tujea utrancher hanv bhorvonso dovortam.* 148  Tujea utracher kholaien chintunk,*Ratchea parar mhoje dolle ukte zatat. 149  Tujea visvaxi mogak lagon mhozo avaz aik,Jehova Deva, tujea neai-a pormonnem mhozo jiv samball. 150  Lojechim* kamam kortat te mhojea lagim ietat,Tujea kaidea thaun te khub pois geleat. 151  Jehova Deva, tum mhojea lagim asa,Ani tujeo sogleo adnea sot. 152  Tum ugddasak haddtta te kaide, je tunvem sasnak uronk stapon keleat,Tea vixim hanv khub poilim xiklom. ר [Resh] 153  Mhoje koxtt-dukh polloi ani mhaka vanchoi,Karonn hanv tuzo kaido visronk na. 154  Mhojea vatten uloi* ani mhaka vanchoi,Ani tunvem ji bhas* dilea tika lagon mhozo jiv samball. 155  Noxtteam thaun taronn khub pois asa,Karonn tannim tuje nem-kaide sodhunk nant. 156  Jehova Deva, tuji doia ekdom vorti,Tujea neai-a pormonnem mhozo jiv samball. 157  Mhaka dhumallo diupi ani mhoje dusman mezunk zainant title asat,Tori astana, tum ugddasak haddtta tea adneam thaun hanv koddsoronk na. 158  Visvasghatki lokank polloun mhaka vitt ieta,Karonn te tunvem sanglam tea pormonnem cholonant. 159  Hanv tujea hukumancho kitlo mog kortam tem polloi! Jehova Deva, tujea visvaxi mogak lagon mhozo jiv samball. 160  Tujea utrant boroilʼlem dor ek utor sot,Ani tuje sogle nitivont nirnnoi sodankal urtat. ש [Sin] vo [Shin] 161  Kunvor bexttech mhaka dhumallo ditat,Punn mhojea kallzant tujea utrank lagon bhirant asa.* 162  Luttlolo bhorpur mhal mellʼllolean eklo khuxal zata toso,Hanv tujea utrank lagon sontostam. 163  Hanv fottingponnacho dves kortam, mhaka tachi vitt ieta,Punn hanv tujea kaideacho mog kortam. 164  Tujea nitivont nirnnoi-ank lagon,Disak sat pavtti hanv tuji vakhann’nni kortam. 165  Tujea kaideacho mog kortat tankam khub xanti melltta,Te kiteakuch addkhollche nant.* 166  Jehova Deva, hanv tujea taronnachea kamanchi vatt polloitam,Ani hanv tujeo adnea pallttam. 167  Tum ugddasak haddtta teo adnea hanv pallttam,Ani hanv tancho kallzant thaun mog kortam. 168  Tum je hukum ani adnea ugddasak haddtta teo hanv pallttam,Karonn hanv jem kitem kortam tem tum bore bhaxen zannam. ת [Taw] 169  Jehova Deva, hanv modoti pasot martam to ulo tujea meren pavom-di. Tujea utrant melltta ti somzonni mhaka di. 170  Hanvem doie pasot kelʼlem magnnem tujea meren pavom-di. Tunvem dilʼlea utra* pormonnem mhaka salvar kor. 171  Mhojea vonttam voilean vakhannʼnnechim utram vhanvom-di,Karonn tum mhaka tuje nem-kaide xikoita. 172  Mhoji jib tujea utram vixim gitam gaum,Karonn tujeo sogleo adnea nitivont. 173  Tuzo hat mhaka modot korunk sodanch toiar asum,Karonn hanvem tuje hukum pallunk vinchun kaddlam. 174  Jehova Deva, tujea thaun melltta tea taronna pasot hanv axetam,Ani mhaka tuzo kaido avoddtta. 175  Mhaka jivo dovor, jea vorvim hanv tuji vakhannʼnni kortolom,Tujea nitichea nirnnoi-am vorvim mhaka modot mellom. 176  Eka sanddlolea menddrea bhaxen hanv bhottoklam. Tujea sevokak sodh,Karonn hanv tujeo adnea visronk na.

Footnotes

^ Mhunnche, purnn toren bhokti korpi. Inglez bhaxent “integrity.”
^ Utran utor, “Mhojeo vatto thir stapon kelʼleo zalear kitlem borem zatolem aslem.”
^ Utran utor, “apli vatt nitoll koxi dovrunk zata?”
^ Vo “hukumancho obheas kortam.”
^ Hebrev bhaxent hea mull utrachea orthant, aplea xime bhair vochon, koslich bhirant nastana chintop ani vagop, ani apleak korunk odhikar na tem korunk fuddem sorop hem-ui mellon asa.
^ Utran utor, “mhojea voili dhuklun uddoi.”
^ Vo “nem-kaideancho obheas korta.”
^ Vo “kamancho obheas korunk.”
^ Utran utor, “vatt.”
^ Vo “mhaka lojek poddonk dinaka.”
^ Vo “purnn kallzan.”
^ Utran utor, “dhanvtolom.”
^ Vo ghoddie, “tum mhojea kallzak khatri dita.”
^ Vo “vatten cholonk mhaka margdorxon di.”
^ Vo “Faidea.”
^ Vo ghoddie, “Ji tunvem tuji bhirant dhortat tea lokank dilea.”
^ Vo “sevokak sanglolea pormonnem kor.”
^ Vo “tunvem sanglolea pormonnem.”
^ Vo “hanv tujea nitichea nirnnoi-achi vatt polloitam.”
^ Vo “hanv uktea zagear.”
^ Vo “vixim obheas kortolom.”
^ Vo “dilʼli bhas.”
^ Vo “Zaka lagon tunvem mhaka vatt polloit ravonk lailem.”
^ Hebrev bhaxent hea mull utrachea orthant, aplea xime bhair vochon, koslich bhirant nastana chintop ani vagop, ani apleak korunk odhikar na tem korunk fuddem sorop hem-ui mellon asa.
^ Vo “Jea ghorant hanv pordexi mhunn ravtam, thoim.”
^ Vo “sanglolea pormonnem.”
^ Vo “Ratcho modem.”
^ Vo “hanv chukon patok kortalom.”
^ Hebrev bhaxent hea mull utrachea orthant, aplea xime bhair vochon, koslich bhirant nastana chintop ani vagop, ani apleak korunk odhikar na tem korunk fuddem sorop hem-ui mellon asa.
^ Utran utor, “kalliz chorbe bhaxen bherelam.”
^ Vo “Hanv tujea utrachi vatt polloitam.”
^ Vo “sevokak sanglolea pormonnem.”
^ Vo ghoddie, “te fott marun.”
^ Hebrev bhaxent hea mull utrachea orthant, aplea xime bhair vochon, koslich bhirant nastana chintop ani vagop, ani apleak korunk odhikar na tem korunk fuddem sorop hem-ui mellon asa.
^ Vo “vixim obheas kortolom.”
^ Vo “Hanv tujea utrachi vatt polloitam.”
^ Hebrev bhaxent hea mull utrachea orthant, aplea xime bhair vochon, koslich bhirant nastana chintop ani vagop, ani apleak korunk odhikar na tem korunk fuddem sorop hem-ui mellon asa.
^ Mhunnche, tannem rochloleo sogleo vostu.
^ Vo “tujeo adnea khub rund asat.”
^ Vo “tujea adneancho obheas kortam.”
^ Vo “Ordea kallzachea; Doxi zalʼlea kallzachea.”
^ Vo “Hanv tujea utrachi vatt polloitam.”
^ Vo “Tunvem sanglolem tea.”
^ Vo “aslolea bhorvonxeak lojek poddonk dinaka.”
^ Vo “Tujea formonnanchi.”
^ Hebrev bhaxent hea mull utrachea orthant, aplea xime bhair vochon, koslich bhirant nastana chintop ani vagop, ani apleak korunk odhikar na tem korunk fuddem sorop hem-ui mellon asa.
^ Vo “jem sanglam.”
^ Vo “xudʼdh kelʼlea.”
^ Vo “tuzo dor ek hukum.”
^ Utran utor, “khorxetam.”
^ Vo “mhojim panvlam thir kor.”
^ Utran utor, “soddoi.”
^ Vo “tonddacho.”
^ Vo “hanso.”
^ Vo “Hanv tujea utranchi vatt polloitam.”
^ Vo “utracho obheas korunk.”
^ Vo “Burxim.”
^ Vo “Mhoji korttachi kes zhogodd.”
^ Vo “tunvem sanglolea pormonnem.”
^ Vo “mhojem kalliz tujea utrank lagon ojap zata.”
^ Vo “Tankam koslich addkholl na.”
^ Vo “Tunvem sanglam tea.”

Copyrights for this publication