Stotr 109:1-31
Mukhel songitkarak. Davidachem git. Ek songit.
109 Hanv vakhannʼnni kortam tea Deva, tum vogi ravom naka.
2 Karonn noxtte ani fosoupi mhojea add uloitat.
Aplea jiben mhojea vixim fott uloitat,
3 Toptat toslim utram uloun te mhaka gherav ghaltat,Ani karonn nastana mhojer akromonn kortat.
4 Hanv tancho mog kortam, punn te mhozo virodh kortat,Tori astana hanv magnnem korit ravtam.
5 Hanvem kelʼlea boreak te vaittan farik kortat,Ani hanvem mog kela tachea bodlek te mhozo dves kortat.
6 Tacher eka noxtteak nem,Tachea uzvea hatak ek virodhi* ubo ravom.
7 Tachi zhoddtti zata tednam taka guneanvkari* mhunn tharaum,Tachem magnnem pasun ek patok zalʼlea bhaxen lekhum.
8 Tachea jivitache dis unnem zaum,To samballttalo ti zobabdari dusreak mellom.
9 Tachim bhurgim* bapui naslolim zaum,Ani tachi bail ek vidva zaum.
10 Tachim bhurgim* hevtten-tevtten bhonvta toslim bhikari zaum,Aplea padd zalʼlea ghoram thaun bhair soron tim jevonn sodhit bhonvom.
11 Taka rinn diupi tachem soglem gheun vochom,*Ani onvollkhi lokamnim tachim bhattam-besam luttun vhorom.
12 Konnench taka doia* dakhoina zaum,Ani bapui bhair poddlolea tachea bhurgeank konnuch kakut dakhoina zaum.
13 Tachea sonsticho nas zaum,Tanchem nanv pillge modlem pusun vochom.
14 Tachea purvonzanche guneanv Jehovan ugddas dovrum,Ani tachea avoichem patok to pusun uddoina zaum.
15 Tannim jem kelem tem Jehovan sodanch ugddas dovrum,Ani prithumer tanchea nanvacho ugddas pasun urona zaum.
16 Karonn doia* dakhounk taka ugddas uronk na,Tachea bodlek to zulum sostolea, gorib aslolea ani kalliz tunttlolea munxak,Jivexim marun uddounk tachea fattik laglo.
17 Dusreank xirap diunk taka borem distalem, punn atam tacheruch xirap poddlo.
Dusreak besanv diunk taka itsa nasli, taka lagon taka-i besanv mellonk na.
18 Taka kopdde ghatlolea bhaxen xirapamnim nhesoilʼlo,Ani te xirap tachea kuddint udka sarke,Ani tachea haddamnim tela sarke votoilʼle.
19 Xirapamnim taka, to nhesta tea kopddeam bhaxen guttlaum,Ani te, to sodanch bhenddak bandta tea pottʼttea bhaxen zaum.
20 Mhozo virodh kortat ani mhojea add vaitt uloitat,Tankam Jehova heach toren farik korta.
21 Punn Akʼkhea Vixvachea Dhonia Jehova Deva,Tum tujea nanva pasot mhojea vatten panvl ghe.
Mhaka vanchoi, karonn tuzo visvaxi mog boro.
22 Hanv adar naslolom ani gorib asam,Ani mhojea kallzak ghave poddleat.
23 Savlle bhaxen hanv sovkas nanch zatam,Tolla bhaxen mhaka fafddun uddoila.
24 Upas korun mhojeo dimeo koddkoddttat,Hanv barik zalam ani mhoji kudd sukot voita.*
25 Mhoji poristhiti oxi zalea ki te mhaka tomnne martat,Mhaka polloitat tednam te apleo tokleo haloun mhojeo keddnneo kortat.
26 Jehova mhojea Deva, mhaka modot kor,Tujea visvaxi mogan mhaka salvar kor.
27 Jehova Deva, hem tunvem tujea hatan kelam,Hoi, hem tunvem kelam mhunn tankam kollom-di.
28 Tannim xirap ghalum, punn tum mhaka besanv di,Te mhojea add ube zatat tednam te lojek poddom,Punn tuzo sevok khuxal zaum.
29 Je mhozo virodh kortat tannim opmanache kopdde ghalum.
Kott* ghatlolea porim, loz tanchi nhesonn zaum.
30 Hanv mhojea tonddan thambonastana Jehovachi vakhannʼnni kortolom,Zaitea lokam mukhar hanv taka vakhannttolom.
31 Karonn zo goribak guneanvkari tharaita tachea thaun taka salvar korunkTo tachea uzvea hatak ubo ravtolo.
