Stotr 104:1-35
104 Mhojea jiva* Jehovachi vakhannʼnni kor.
Jehova mhojea Deva, tum khub vorto.
Mhoimen* ani vorteponnan tum nhesla.
2 Kopdde ghatlolea bhaxen tum uzvadd nhesla,Tombu bhaxen tunvem mollob voddun posrailam.
3 To mollba voilea udkant* aplea unchlea rumantleo pattio dovorta,To kupank aplem roth korta,Ani vareachea pakhotteancher voita.
4 To aplea devdutank xoktivont korta,To aplea sevokank bhosm korun uddoita toslea ujea sarko korta.
5 Tannem prithumek tachea buniadicher thir stapon kelea,Sasnachea-sasnak tika aplea zagea voili halounchi nant.*
6 Tunvem khol udok kopddea bhaxen ticher dhamplam.
Tea udkan porvot dhample.
7 Tuzo dhengso aikotanch udok pollon gelem,Tujea goddgoddacho avaz aikon tem bhiun dhanvlem.
8 Tunvem tachea pasot zo zago tharailʼlo tea zagear tem gelem.
Porvot voir aile ani falkim sokol gelim.
9 Tem udok anik fuddem voichem nhoi,Ani tannem prithumek porot kednanch dhampchi nhoi mhunn tunvem tachea pasot ek xim tharaili.
10 To falkeamnim* zhori vhanvoita.
Teo porvotanchea modlean vhanvtat.
11 Ranantlea soglea ranvotti zonvaram pasot teo zhori udok ditat,Ranvotti gaddvam apli tan bhagoitat.
12 Udka lagim aslolea zhaddancher mollba voilim suknnim aple ghontter bandtat,Tanchea khandeancher boson tim gitam gaitat.
13 To aplea unchlea rumam thaun porvot ximpta.
Tujea mhenotichea follan prithum dhadoxi zalea.
14 To gorvam pasot tonn vaddoita,Ani munxam pasot bhaji-palo vaddoita,Jea udexim tankam zomnintlean jevonn melltta,
15 Toxench munxachea kallzak khuxalkai dita toslo drakxancho soro,Tonddar porzoll haddtta toslem tel,Ani ek-na-ek dis morta toslea munxachea kallzak ghottai dita toslo unddo melltta.
16 Jehovachea zhaddank,Tannem roilʼlea Lebanonantlea cedar* zhaddank bhorpur udok melltta,
17 Thoim suknnim aple ghontter kortat.
Juniper* zhaddacher bokem aplem ghor korta.
18 Vhoddle-vhoddle porvot, porvotam voilea bokddeam pasot asat.
Vhoddlim-vhoddlim khoddpam, khoddpantlea sonxea* pasot asro zaun asat.
19 Vell tharaunk tannem chondrim kela.
Apnnem kednam denvonk zai tem suria boro zannam.
20 Tum kallokh haddtta ani rat zata,Tednam ranantlim soglim ranvotti zonvaram hanga-thoim bhonvtat.
21 Tornatte xinv aplo xikar sodhtana goroztat,Ani Deva lagim te aplem jevonn magtat.
22 Suria udeta tednam,Te aple dholint porot voitat ani nhidtat.
23 Munis aplea kamak voita,Ani sanz zaisor vavr korit asta.
24 Jehova Deva, tujim kamam mezunk zainant titlim asat!
Hem soglem tunvem tuje zannvaien kelam.
Prithum tunvem kelʼlea vostumnim bhorlea.
25 Ho polloi doria, to kitlo vhoddlo ani rund asa,Tantunt lhan toxech vhodd, mezunk zainant title pranni asat.
26 Tarvam tantunt bhonvtat,Ani tunvem kelʼlo Leviathan* tantunt khelltta.
27 Tum tankam vella-vellar jevonn ditolo mhunn,Tim soglim tuji vatt polloitat.
28 Tum tankam jem dita, tem tim ektthaim kortat.
Tum tuzo hat ugoddtta tednam, tim borea vostumnim dhadoxi zatat.
29 Tum tujem tondd lipoita tednam tim uchamboll zatat.
Tum tancho svas kaddun gheta tednam tim mortat ani porot dhulʼlint voitat.
30 Tunvem tuji povitr xokti dhaddli zalear tim rochun ietat,Ani tum prithumek novean jiv dita.
31 Jehovachi mhoima sodankal urtoli.
Jehova aplea kamank lagon khuxal zatolo.
32 To prithumecher nodor marta ani ti thorthorta,To dongrank hat laita, ani tanchea thaun dhunvor bhair sorta.
33 Hanv jivitbhor Jehova pasot gaitolom,Hanv jivo asam tea meren, mhojea Deva pasot vakhannʼnnechim gitam gaitolom.*
34 Mhojim chintnam taka manvota toslim zaum.*
Hanv Jehovak lagon sontosbhorit zatolom.
35 Patki prithume voile nanch zatole,Ani noxtte anik ostitvant urchenant.
Mhojea jivan* Jehovachi vakhannʼnni korum. Jah-chi vakhannʼnni korat!*
Footnotes
^ Vo “Manan.”
^ Utran utor, “To udkant.”
^ Vo “ti tichea zagear thaun halchina.”
^ Vo “wadimnim.”
^ Vo “devdar.” Eke torechem vhoddlem zhadd.
^ Xobdhkox polloi.
^ Inglez bhaxent “rock badger.”
^ Xobdhkox polloi.
^ Vo “gitam gaun songitachim sadhonam vazoitolom.”
^ Vo ghoddie, “Tachea vixim hanv niallttam tem taka manvota toslem zaum.”
^ Vo “Hallelujah!” “Jah” hem Jehova hea nanvachem shortt form zaun asa.
