Stotr 37:1-40
-
Jehovacher visvas dovortat tankam ies mellttolem
Davidachem git.
א [Aleph]
37 Vaitt munxank lagon bejar* zainaka,Vo chukichim kamam kortoleanchi nattkai korinaka.
2 Te tonna bhaxen rokddech sukon voitole,Ani novea hirvea tonna bhaxen bavon voitole.
ב [Beth]
3 Jehovacher visvas dovor ani borem tem kor,Prithumer* jie, ani visvaxiponnan vag.
4 Jehova thaim tuji sogleant vorti khuxalkai asum,Ani to tujea kallzacheo sogleo itsa purnn kortolo.
ג [Gimel]
5 Tum korta tem soglem Jehovachea hatant ghal,Tacher patieun rav, ani to tujea pasot panvl ghetolo.
6 To tujem nitivontponn sokallchea uzvadda bhaxen,Ani tuzo neai donparchea vota bhaxen porzollom-so kortolo.
ד [Daleth]
7 Jehova mukhar vogi rav,Ani axeun* tachi vatt polloi.
Vaitt manddnneo korun jea munxak ies mellttaTaka lagon bejar zainaka.
ה [He]
8 Tuzo rag denvoi ani tuzo krodh soddun di,Bejar zaun vaitt asa tem korunk vochonaka.*
9 Karonn vaitt munxancho nas zatolo,Punn Jehovacher bhorvonso dovortat tim prithumechim daiji zatolim.
ו [Waw]
10 Anik thoddoch vell rav, noxtte munis nanch zatole,Te asle thoim tum tankam sodhunk voitolo,Ani te thoim aschenant.
11 Punn khalte lok prithumeche daiji zatole,Ani bhorpur xanti aslolean tanchea khuxalkaiek mit-mer aschina.
ז [Zayin]
12 Noxtto munis nitivont munxa add manddnni kaddtta,Taka polloitana to ragan aple dant korkoraita.
13 Punn Jehova taka hanstolo,Karonn tacho nas zauncho dis ietolo mhunn to zannam.
ח [Heth]
14 Zulum sostoleak ani goribak sokol haddunk,Ani sarkem tem kortat tankam marun uddounk,Noxtte apli tolvar bhair kaddttat, ani tanche dhonu bagoitat.
15 Punn tanchi tolvar tancheach kallzant rombtoli,Tanche dhonu moddttole.
ט [Teth]
16 Nitivont munxa lagim thoddench asa zalear pasun,Zaitea noxtteam munxam lagim aslolea soglea girestkaie poros tem odik borem.
17 Karonn noxttea munxanche hat moddon voitole,Punn Jehova nitivont munxank tenko ditolo.
י [Yod]
18 Guneanv naslolea munxak kitem soschem poddtta tem* Jehova zannam,Ani tanchem daiz sodankal urta.
19 Odruxtta vellar tankam loz bhogunk poddchina,Bhuke vellar tankam jevunk bhorpur astolem.
כ [Kaph]
20 Punn noxtteancho nas zatolo,Jehovache dusman chorvachea molla voilea sobit tonna bhaxen nanch zaun voitole,Dhunvra bhaxen te nanch zatole.
ל [Lamed]
21 Noxtto rinn gheta ani porot farik korina,Punn nitivont asa to udar kallzan dita.
22 Dev zankam besanv dita tim prithum apli daiz korun ghetolim,Punn to zancher xirap ghalta tancho nas zaun voitolo.
מ [Mem]
23 Eka munxachi vatt Jehovak manvota tednam,To tachea panvlank margdorxon dita.*
24 To addkhollʼllear pasun to sarkoch sokol poddchona,Karonn Jehova tachea* hatak dhorun asa.
נ [Nun]
25 Eka vellar hanv tornattom aslom, ani atam hanv zanttom zalam,Punn eka nitivont munxak soddun dila to,Toxench tachim bhurgim unddea* pasot bhik magtat tim, hanvem pollounk na.
26 To sodanch khuxen udar dita,Ani tachea bhurgeank besanvam mellttolinch.
ס [Samekh]
27 Vaittak fatt kor ani borem tem kor,Ani tum sodankal urtolo.
28 Karonn Jehova neai-acho mog korta,Ani to aplea visvaxi lokank soddchona.
ע [Ayin]
To sodanch tanchi rakhonn kortolo,Punn noxtteanchea sonsticho nas zaun voitolo.
29 Nitivont prithumeche daiji zatole,Ani te ticher sasnak ravtole.
פ [Pe]
30 Nitivontachea tonddantlean zannvai bhair sorta,*Ani tachi jib neai-a vixim uloita.
31 Tachea Devacho kaido tachea kallzant asa,Tachim panvlam nisorchimnant.
צ [Tsade]
32 Nitivont munxak jivexim marunk,Noxtto tacher nodor dovorta.
33 Punn Jehova taka tea noxtteachea hatant soddchona,Vo zhoddtte vellar taka guneanvkari mhunn tharaunchona.
ק [Qoph]
34 Jehovacher bhorvonso dovor ani tache vatten chol,To tuka voir kaddttolo ani prithumecho daiji kortolo.
Noxttea munxancho nas zatolo tednam tum tem polloitolo.
ר [Resh]
35 Doia-maia naslolea eka vaitt munxak hanvem polloilo,To hirvea panamnim bhorlolea zhadda bhaxen borea matient vaddttalo.
36 Punn okosmat to melo ani nanch zalo,Hanv taka sodhit ravlom, punn to mhaka mellonk na.
ש [Shin]
37 Guneanv naslolea* munxacher dhean di,Ani promannik munxacher nodor dovor,Karonn to fuddarak xantin jietolo.
38 Punn soglea opradeancho nas zatolo,Noxttea lokank kosloch fuddar aschona.
ת [Taw]
39 Nitivont lokank Jehova koddlean taronn melltta,Sonkoxttachea vellar to tancho kilʼlo.
40 Jehova tankam modot kortolo ani vanchoitolo.
To tankam noxttea thaun vanchoitolo ani salvar kortolo,Karonn tannim tachea lagim asro ghetla.
Footnotes
^ Vo “ragan bhoron gorom.”
^ Vo “Desant.”
^ Vo “pasiensan.”
^ Vo ghoddie, “Bejar zainaka, karonn tacho porinnam vaittuch zatolo.”
^ Utran utor, “munxache dis.”
^ Vo “panvlank thir korta.”
^ Vo “aplea hatan tachea.”
^ Vo “jevnna.”
^ Vo “Nitivont munis hollu avazan zannvaiecheo vostu uloita.”
^ Mhunnche, purnn toren bhokti korpi. Inglez bhaxent “integrity.”
