Stotr 145:1-21
Davidachem vakhannʼnnechem git.
א [Aleph]
145 Mhojea Deva, mhojea Raza, hanv tuji vhoddvik kortolom,Hanv sodam-sodankal tujea nanvachi vakhannʼnni kortolom.
ב [Beth]
2 Dis-bhor hanv tuji vakhannʼnni kortolom,Hanv sodam-sodankal tujea nanvachi vakhannʼnni kortolom.
ג [Gimel]
3 Jehova vorto, ani taka sogleam-von chodd vakhannʼnni favo,Tachem vorteponn amchean chintunk pasun zaina titlem asa.*
ד [Daleth]
4 Pillgecheo-pillgeo tujea nanvachi vakhannʼnni kortoleo,Tujea xoktivont kamam vixim teo sangtoleo.
ה [He]
5 Tujea mhoimevont vorteponna vixim teo uloitoleo,Ani tujea ojapanchea kamancher hanv niall kortolom.
ו [Waw]
6 Te tujea ojapanchea* kamam vixim uloitole,Ani hanv tujea vorteponna vixim porgott kortolom.
ז [Zayin]
7 Tujea bhorpur boreponna vixim ugddas korun te urben uloit ravtole,Tujea nitivontponnak lagon te khuxalkaien zoizoikar kortole.
ח [Heth]
8 Jehova doie-maien* ani kakutin bhorlolo,To rokddoch ragar zaina toslo ani bhorpur visvaxi mogan bhorlolo.
ט [Teth]
9 Jehova sogleank boreponn dakhoita,Ani tachi doia tachea soglea kamamnim dison ieta.
י [Yod]
10 Jehova Deva, tujim soglim kamam tuji mhoima kortolim,Ani tuje visvaxi lok tuji vakhannʼnni kortole.
כ [Kaph]
11 Te tujea razvottkechi mhoima porgottʼttole,Ani tujea xokte vixim uloitole,
ל [Lamed]
12 Tujea xoktivont kamam vixim,Ani tujea razvottkechea mhoimevont vorteponna vixim te kolloitole.
מ [Mem]
13 Tuji razvottki sasnachi razvottki zaun asa,Ani tuzo odhikar pillgean-pillgi poriant urta.
ס [Samekh]
14 Sokol poddttat tea sogleank Jehova samballtta,Ani bagovleat tea sogleank to nitt ube korta.
ע [Ayin]
15 Sogle dolle bhorvonxean tujer lailole asat,Tum tankam vella-vellar jevonn dita.
פ [Pe]
16 Tum tuje hat ugddun,Dor eke jive rochnnechi itsa purnn korun tankam dhadoxi korta.
צ [Tsade]
17 Jehova tachea soglea kamamnim nitivont asa,Ani to aplea dor ek kamant visvaxi asa.
ק [Qoph]
18 Apleak ulo martolea soglea munxank,Apleak sotan* ulo martolea soglea munxank, Jehova lagim asa.
ר [Resh]
19 Tachea bhirantin choltat tancheo itsa to purnn korta,Tannim modoti pasot marlolo ulo to aikota ani tankam vanchoita.
ש [Shin]
20 Aplo mog kortat tanchi sogleanchi Jehova rakhonn korta,Punn soglea noxtteancho to nas korun uddoitolo.
ת [Taw]
21 Hanv mhojea tonddan Jehovachi vakhannʼnni kortolom,Sogle jive rochnnen sasnachea-sasnak tachea povitr nanvachi vakhannʼnni korum.
