Stotr 22:1-31
Mukhel songitkarak. “Fantoddechem Horonn”* hea surar gaunchem. Davidachem songit.
22 Mhojea Deva, mhojea Deva, tunvem mhaka kiteak soddun dila?
Tum mhaka salvar korunk kiteak iena,Hanv vollvolleamnim bob martam tem tum kiteak aikona?
2 Mhojea Deva, hanv akʼkho dis tuka ulo martam,Ratcho pasun hanv vogi ravona, punn tum zobab dina.
3 Punn tum povitr,Tujea sorvbhonvtim Izraelitkaram tuji vakhannʼnni kortat.
4 Amchea bapaimnim tujer visvas dovorlo,Tannim tujer visvas dovorlo ani tum tankam vanchoit ravlo.
5 Tannim tuka ulo marlo ani te salvar zale,Tannim tujer visvas dovorlo, ani te niraxi zaunk nant.*
6 Punn hanv ek kiddo, munis nhoi,Munis mhojeo moskoreo kortat, ani lok mhaka kainch valor naslolea bhaxen lekhtat.
7 Mhaka polloitat te sogle mhojeo moskoreo kortat,Te mhaka hanstat, apleo tokleo haloun mhojeo keddnneo kortat ani mhunnttat:
8 “Tannem Jehovacher visvas dovorla. Tor atam tannench taka vanchoum!
Tannem taka salvar korum, karonn to Devak khub opurbaiecho!”
9 Tunvench mhaka mhojea avoichea kusveantlo bhair haddlo,Mhojea avoichea horddear* mhaka surokxit dovorlo.
10 Zolma thaun mhaka tujea hatant ghatlo,Hanv mhojea avoichea kusveant aslom tednam thaun tum mhozo Dev.
11 Mhojea thaun pois ravonaka, karonn sonkoxtt lagim pavlam,Ani mhaka modot korpi anik konnuch na.
12 Zaite tornatte boil mhaka gherav ghaltat,Bashanache ghott-mutt boil mhaka veddo ghaltat.
13 Eka goroztolea xinva bhaxen zo aplo xikar pinzun tache kuddkean-kuddke korta,Toxe te mhojea add aplem tondd ugoddttat.
14 Mhaka udka bhaxen votoila,Mhojim soglim haddam suttleant.
Mhojem kalliz menna bhaxen zalam,Tem mhojea bhitor pigolltta.
15 Matiechea aidonachea funttlolea kuddkea bhaxen mhojem boll suklam,Mhoji jib talliek chittkota,Tum mhaka sokol mornnachea dhulʼlint haddtta.
16 Sunnim mhaka gherav ghaltat,Vaitt kortoleanchea zomea bhaxen tim mhojea angar ietat,Eka xinva bhaxen tim mhojea hatak ani paim-ank ghans martat.
17 Hanv mhojim soglim haddam mezunk xoktam.
Te mhojer nodor dovortat ani mhaka polloit ravtat.
18 Te mhoje kopdde apnnam modem vanttʼttat,Ani te mhojea khomsacher sorti ghaltat.
19 Punn tum, Jehova Deva, mhojea thaun pois ravonaka.
Tum mhojem boll, mhaka modot korunk begin ieo.
20 Tolvari thaun mhaka salvar kor,Sunneanchea danvlam* thaun mhozo moladik jiv* salvar kor.
21 Xinvachea tondda thaun ani ranvotti boilanchea xingam thaun mhaka salvar kor,Mhaka zobab di ani mhaka salvar kor.
22 Hanv mhojea bhavank tujem nanv kolloitolom,Sobhe modem hanv tuji vakhannʼnni kortolom.
23 Jehovachi bhirant dhortoleamno, tachi vakhannʼnni korat!
Jakobache sonste,* taka mhoima diat!
Izraelachea akʼkhe sonste,* tachi bhirant dhorat.
24 Karonn zulum sostoleachea trasanchi tannem beporva korunk na, toxench taka tachi vitt ieunk na,Tannem tachea thaun aplem tondd lipounk na.
Tannem modoti pasot ulo marlo tednam tannem aikolem.
25 Vhoddle sobhent hanv tuji vakhannʼnni kortolom,Tachi bhirant dhortoleam mukhar, hanv mhojeo angvonneo pallttolom.
26 Khalte lok khatole ani dhadoxi zatole,Jehovak sodhtat te tachi vakhannʼnni kortole.
Tumi sasnak khuxalkaien jieum.*
27 Prithumechea konnxea-konnxeantle lok Jehovacho ugddas korun tachea lagim ietole.
Raxttrantleo sogleo famili tachea mukhar bagovtoleo.
28 Karonn raz korpacho odhikar Jehovacho,To raxttrancher odhikar choloita.
29 Prithume voile sogle girest lok khatole-pietole ani tachea mukhar man bagoitole,Dhulʼlint voitat te sogle tachea mukhar dimi ghaltole,Tanchea modlo konnuch aplo jiv salvar korunk xokona.
30 Tanchi sonsot* tachi seva kortoli,Ieunchi asa te pillgek Jehova vixim kollon ietolem.
31 Te ietole ani tachea nitivontponna vixim sangtole.
Zolmak ieunche asat tankam, tachea kamam vixim sangtole.
Footnotes
^ Vo “Merum.” Ho ghoddie ek tune vo songit gaupachi rit.
^ Vo “tankam loz bhogunk poddonk na.”
^ Inglez bhaxent “breast.”
^ Utran utor, “hatam.”
^ Utran utor, “mhaka ekleakuch,” hanga tachea jivitak suchit korta.
^ Utran utor, “bie.”
^ Utran utor, “bie.”
^ Utran utor, “Tumchem kalliz sasnak jieum.”
^ Utran utor, “bi.”
