Stotr 40:1-17
Mukhel songitkarak. Davidachem git. Ek songit.
40 Hanvem kallzantlean Jehovacher bhorvonso dovorlo,*Ani tannem mhojem magnnem dhean diun aikolem,* ani modoti pasot hanvem marlolo ulo tannem aikolo.
2 Tannem mhaka khol fonddantlean voir kaddlo, zoim udkacho avaz ietalo,Tannem mhaka rebddantlo voir kaddlo.
Ani tannem mhoje paim vhoddlea khoddpar dovorle,Tannem mhojim panvlam thir kelim.
3 Uprant tannem mhojea tonddant ek novem git ghatlem,*Amchea Devachi vakhannʼnni zaum.
Zaitim zannam ojap zaun* polloitolim,Ani Jehovacher visvas dovortolim.
4 Zo munis Jehovacher visvas dovorta,Ani hottʼtti vo khottea munxancher* patiena, to munis khuxal.
5 Jehova mhojea Deva,Tunvem kitleo ojapacheo vostu keleat,Amchea pasot tunvem kelʼlim kamam ani tujim chintnam kitlim ojapachim.
Tujea sarko anik konnuch na.
Tunvem amchea pasot jem kelam tem hanvem sangcho ani ulouncho proitn kelo zalear,Tem itlem asa ki tem mhojean mezunk pasun zaunchem na!
6 Bolidan ani bhett tuka zai oxem naslem,*Punn hanvem aikonchem mhunn tunvem mhoje kan ugoddle.
Hulpailʼleo bhetto ani patkachim bolidanam tunvem magonk nant.
7 Uprant hanvem mhunnttlem: “Polloi, hanv ailam.
Kovlleant* mhojea vixim boroilʼlem asa.
8 Mhojea Deva, tuji khuxi korunk mhaka sontos melltta,*Ani tuzo kaido mhojea bhitor khol riglolo asa.
9 Tujea nitivontponnachi bori khobor hanv vhoddle sobhent kolloitam.
Polloi! Hanv mhojem tondd bond dovorna,Jehova Deva, tum hem bore bhaxen zannam.
10 Tujem nitivontponn hanv mhojea kallzantuch dovorna.
Tujea visvaxiponna vixim ani taronna vixim hanv porgott kortam.
Vhoddle sobhent hanv tuzo visvaxi mog ani tujem sot lipoun dovorna.”
11 Jehova Deva, mhoji kakut korunk fatti soronaka.
Tujea visvaxi mogan ani tujea sotan sodanch mhoji rakhonn korum.
12 Mhojean mezunk zaina titlea odruxttamnim mhaka gherav ghatla.
Mhoje guneanv itle asat ki mhaka mhoji vatt disona.
Tancho ankddo mhojea matheachea kensam poros chodd asa,Ani hanv samko niraxi zalam.
13 Jehova Deva, upkar korun mhaka salvar kor,Jehova Deva, mhaka modot korunk begin ieo.
14 Mhozo jiv kaddunk sodhtat te sogle,Lojek poddom ani tancho opman zaum.
Mhojer sonkoxtt ieta tednam je khuxal zatat,Te lojen pollon vochom.
15 Mhojim fokannam korun mhaka, “Borem zalem! Borem zalem!” oxem mhunnttat,Tancho opman zaun te lojek poddom.
16 Punn jim konn tuka sodhtat,Tim khuxal zaum ani sontosbhorit zaum.
Jim konn tujea taronn diupi kamancho mog kortat tannim sodanch oxem mhunnom:
“Jehovachi mhoima zaum!”
17 Punn hanv adar naslolom ani gorib,Jehovan mhojer dhean dium.
Mhaka modot korpi ani mhaka vanchoupi tunch,Mhojea Deva, vell korinaka.
Footnotes
^ Vo “Hanv pasiensan Jehovacher patieun ravlom.”
^ Vo “Ani to mhojem magnnem aikonk bagovlo.”
^ Vo “tannem mhaka ek novem git xikoilem.”
^ Vo “taka bhirantin bhoron.”
^ Vo “fottkireancher.”
^ Vo “Bolidanak ani bhettek lagon tum khuxal zaunk na.”
^ Utran utor, “Pustokachea kovlleant.”
^ Vo “korunk mhoji itsa zaun asa.”
