Stotr 86:1-17
Davidachem magnnem.
86 Jehova Deva, mhojem kan diun aik* ani mhaka zobab di,Karonn hanv koxtt-dukh sostam ani hanv gorib asam.
2 Mhojea jivachi rakhonn kor karonn hanv visvaxi,Tujer visvas dovorta tea tujea sevokak salvar kor,Karonn tum mhozo Dev.
3 Jehova Deva, mhoji kakut kor,Karonn hanv dis-bhor tuka ulo marit ravtam.
4 Jehova Deva, tujea hea sevokak khuxal kor,Karonn hanv mhoje dolle tujer laitam.
5 Jehova Deva, tum boro ani bhogsunk toiar asa,Tuka ulo martolea sogleank tum bhorpur visvaxi mog dakhoita.
6 Jehova Deva, mhojem magnnem aik,Hanv modoti pasot vinoti kortam, tacher dhean di.
7 Akantachea disa hanvem tuka ulo kelo,Karonn mhaka khatri asli ki tum mhaka zobab ditolo.
8 Jehova Deva, tujea sarko konnuch na,Tujea sarkim kamam korpi konnuch na.
9 Jehova Deva, tunvem toiar kelʼlim soglim raxttram,Tujea lagim ietolim ani tujea mukhar bagovtolim,Ani tim tujea nanvak mhoima ditolim.
10 Karonn tum vorto, ani ojapachim kamam korta,Tum ekloch Dev zaun asa.
11 Jehova Deva, mhaka tujea vatte vixim xikoi.
Hanv tujea sotan choltolom.
Purnn kallzan tujea nanvachi bhirant dhorunk mhaka modot kor.*
12 Jehova mhojea Deva, hanv purnn kallzan tuji vakhannʼnni kortam,Ani sasnak hanv tujea nanvachi mhoima kortolom,
13 Karonn tunvem mhaka bhorpur visvaxi mog dakhoila.
Ani Fonddache* kholaie thaun tunvem mhozo jiv salvar kela.
14 Deva, gorvixtt* munis mhojea add ube ravleat,Doia-maia naslole munis mhozo jiv kaddunk sodhtat,Ani te tuka matui man dinant.*
15 Karonn tum Jehova Deva, kakutin ani doie-maien* bhorlolo Dev zaun asa,Tum rokddoch ragar zaina toslo, visvaxi mogan bhorlolo ani sodanch visvas dovrunk zata toslo* Dev zaun asa.
16 Mhojer dhean di ani mhaka doia dakhoi.
Tujea sevokak tuji ghottai di,Ani tujea chakornichea putak salvar kor.
17 Tujea boreponnachi ek khunna* mhaka dakhoi,Jea vorvim mhozo dves kortat te hem polloitole ani lojek poddttole.
Karonn Jehova Deva, tunch mhozo modot korpi ani bhuzvonn diupi zaun asa.
Footnotes
^ Vo “Deva, bagon mhojem aik.”
^ Vo “Mhaka ek oslem kalliz di jem doxi zalʼlem na.”
^ Hebrev bhaxent hea mull utrachea orthant, aplea xime bhair vochon, koslich bhirant nastana chintop ani vagop, ani apleak korunk odhikar na tem korunk fuddem sorop hem-ui mellon asa.
^ Vo “Ani tannim tuka aplea mukhar dovrunk na.”
^ Vo “movallaien.”
^ Vo “ani sotacho.”
^ Vo “puravo.”
