Stotr 147:1-20
147 Jah-k vakhannat!*
Amchea Devachi vakhannʼnni korunk gitam gavop* kitlem borem,Tachi vakhannʼnni korop kitlem borem ani sarkem zaun asa!
2 Jehova Jeruzalemak bandun kaddtta,Izraelachea ximpoddlolea lokank ektthaim korta.
3 Kalliz tunttlolea lokank to bore korta,To tanche ghave bandta.
4 To noketram mezta,*Tankam sogleank to nanvan ulo marta.
5 Amcho Dhoni vorto ani khub xoktivont asa,Tachea somjikaiek mit-mer na.
6 Jehova khalteank voir ubarta,Punn noxtteank to zomnir xevttita.
7 Jehovache upkar attoit tachea pasot gitam gaiat,Kinori* vazoun, amchea Devachi vakhannʼnni korunk gitam gaiat,
8 Zo mollbak kupamnim dhampta,Prithumek paus dita,Ani zo porvotancher tonn kirlaita.
9 Zonvarank to jevonn dita,Jevnna pasot roddttolea kavlleanchea pilank pasun to khaunk dita.
10 Ghoddeachi xokti polloun to khuxal zaina,Toxench, munxanchea paim-anchi xokti pasun tachea nodren kainch nhoi.
11 Je Jehovachi bhirant dhortat,Ani tachea visvaxi mogachi vatt polloitat, te taka manvotat.
12 Jeruzalema, Jehovachi mhoima kor.
Siona, tujea Devachi vakhannʼnni kor.
13 To tujea xarachea darvontteanche lokhnnache dandde ghott korta,To tujea putank besanvam dita.
14 To tujea vattarant xanti haddtta,Tuka boreantle-bore gonv diun dhadoxi korta.
15 To prithumer aplo hukum dhaddun dita,Tachem utor soddsoddit dhanvon voita.
16 To vula bhaxen borf dhaddtta,To gobra bhaxen jhel posraita.
17 Unddeachea kuddkeam bhaxen to korveancho* paus dhaddtta.
To dhaddtta ti thonddi konn sosunk xokta?
18 To aplem utor dhaddtta ani te pigollttat.
To aplem varem soddtta, ani udok vhanvonk lagta.
19 To aplim utram Jakobak kolloita,To aple nem-kaide ani nitiche nirnnoi Izraelak kolloita.
20 Oxem tannem dusrea khoincheach raxttra sangata korunk na,Tankam tachea nitichea nirnnoi-am vixim kainch khoborna.
Jah-k vakhannat!*
Footnotes
^ Vo “Hallelujah!” “Jah” hem Jehova hea nanvachem shortt form zaun asa.
^ Vo “gitam gaun songitachim sadhonam vazovop.”
^ Vo “Kitlim noketram asat tem to zannam.”
^ Hi ek vazoupachi vost jika gitara bhaxen tar astat, punn ticho akar gitara bhaxen na. Inglez bhaxent “harp.”
^ Vo “jhelacho.”
^ Vo “Hallelujah!” “Jah” hem Jehova hea nanvachem shortt form zaun asa.
