Stotr 33:1-22
33 Nitivont lokamno, Jehovak lagon khuxalkaien bob marat.
Promannik munxan tachi vakhannʼnni korop sarkem zaun asa.
2 Kinori* vazoun Jehovak dhinvasat,Dha taranchem sadhon gheun tachi vakhannʼnni korun gitam gaiat.*
3 Tachea pasot ek novem git gaiat,Khuxalkaien bob marun, ekdom bore bhaxen tar aslolem sadhon vazoiat.
4 Karonn Jehovachem utor khorem,Ani to korta tem soglem visvas dovorpa sarkem.
5 To nitivontponnacho ani neai-acho mog korta.
Prithum Jehovachea visvaxi mogan bhorlea.
6 Jehovachea utran sorg toiar zalo,Ani tantunt asa tem soglem* tachea tonddachea svasan toiar zalem.
7 Band ghalun addailʼlea bhaxen to doriachem udok addaun dovorta,To ghos-ghoxeamnim vhanvta tem udok gudanvamnim ektthaim korun dovorta.
8 Akʼkhe prithumen Jehovachi bhirant dhorum.
Ticher ravtolea sogleamnim taka man dium.
9 Karonn to uloilo, ani soglem ostitvant ailem,Tannem adnea dili ani tem thir zalem.
10 Jehovan raxttrancheo manddnneo* fiskottaun uddoileat,Veg-vegllea desantlea lokancheo ievzonneo tannem nirfoll keleat.*
11 Punn Jehovache nirnnoi* sodankal urtole,Tachea kallzantlim chintnam pillgean-pillgi poriant urtolim.
12 Jehova jea raxttracho Dev zaun asa tem raxttr khuxal,Jea lokank tannem aplem daiz mhunn vinchun kaddlam te lok khuxal.
13 Jehova sorgar thaun sokol polloita,To munxanchea soglea putank polloita.
14 Aplea ravpachea zagear thaun,To prithumer ravtoleank bariksannen polloita.
15 Sogleanchea kallzank akar dita to toch,To tanchim soglim kamam topasta.
16 Khoinchoch raza aple vhoddle foujek lagon salvar zaina,Khoinchoch xoktivont munis aple vorte podvek lagon salvar zaina.
17 Taronn* mellonk ghoddeacher bhorvonso dovrop polkeponn,Taka zaitem boll aslear pasun to salvar korunk xokona.
18 Polloi! Jehovachi bhirant dovortat ani tachea visvaxi mogachi vatt polloitat,Tancher to apli nodor dovorta.
19 Tankam mornnantlean vanchounk,Ani bhuk poddtta tednam tankam jivim dovrunk to oxem korta.
20 Ami Jehovacher bhorvonso dovorla.
To amcho modot korpi ani amchi ddhal zaun asa.
21 Taka lagon amchem kalliz khuxal zata,Karonn ami tachea povitr nanvacher visvas dovortat.
22 Jehova Deva, ami tuji vatt polloit ravtat tea meren,Tuzo visvaxi mog amcher urom.
