Stotr 105:1-45
105 Jehovache upkar attoiat, tachem nanv gheiat,Veg-vegllea desantlea lokank tachea kamam vixim sangat!
2 Tachea pasot gitam gaiat, tachea pasot vakhannʼnnechim gitam gaiat,*Tachea soglea ojapachea kamancher kholaien chintat.*
3 Tachea povitr nanva vixim boddai marat.
Jehovak sodhtat tanchim kallzam sontosbhorit zaum.
4 Jehovak sodhat, tachea thaun melltta tem boll sodhat.
Tachi maniotai melloun gheuncho proitn korat.
5 Tannem jim ojapachim kamam keleant,Tannem jim vizmitam keleant ani je nitiche nirnnoi ghetleat te ugddas korat,
6 Tacho sevok, Abrahamachi sonsot* zaun aslolea lokamno tem ugddas korat,Jakobache put zaun asloleamno, tachea vinchun kaddlolea lokamno, tem ugddas korat.
7 To amcho Dev Jehova.
Tannem kelʼle nitiche nirnnoi akʼkhe prithume pasot asat.
8 To aplo korar sodankal ugddas dovorta,Hozaramnim pillgeam pasot dilʼlem aplem utor* to ugddas dovorta,
9 Abrahama sangata kelʼlo korar,Ani Izakak dilʼlo aplo soput to ugddas dovorta,
10 Zo tannem Jakoba pasot ek hukum mhunnAni Izraela pasot ek sasnacho korar mhunn stapon kelʼlo.
11 Tannem mhunnttlem, “Hanv tuka Kananacho des ditolom,Tujea pasot nemlolem daiz zalʼlea bhaxen hanv tem tuka ditolom.”
12 Hem tannem tednam mhunnttlolem jednam tancho ankddo unno aslo,Hoi, khub unno aslo, ani te tea desant pordexi mhunn ravtale.
13 Te eka raxttra thaun dusrea raxttrant,Eka rajea thaun dusrea rajeant bhonvot asle.
14 Tannem khoincheach munxak tancher zulum korunk diunk na,Punn tankam lagon tannem razank sudhraile.
15 Tannem mhunnttlem, “Mhojea makhloleank hat lainakat,Ani mhojea provadeank kainch vaitt korinakat.”
16 Tannem desacher bhuk haddli,Tankam unddo mellop bond kelem.*
17 Tannem tanchea mukhar eka munxak dhaddlo,Hoi, Juzek dhaddlo, zaka gulam mhunn viklolo.
18 Tannim tache paim sanklleamnim bandle,*Tachea golleant lokhnnacheo sanklleo ghatleo.
19 Jea meren Jehovan dilʼlem utor purnn zaunk na,Tea meren tachea utran taka xudʼdh kelo.
20 Razan taka soddunk lailo,Veg-vegllea desantlea lokancher raz choloupi hea razan taka suttka dili.
21 Tannem taka aplea ghoranneacho dhoni kelo,Taka soglea bhattam-besancher odhikari nemlo,
22 Jea vorvim apleak zai toso to tachea kunvrancher odhikar cholounk xoklo,Ani tachea zanntteank zannvaiecheo vostu xikounk pavlo.
23 Uprant Izrael Ejipttant ailo,Ani Jakob Hamachea desant ek pordexi mhunn ravlo.
24 Devan aplea lokancho ankddo vaddoilo,Tannem tankam dusmanam poros chodd xoktivont kele,
25 Aplea lokancho dves korcho ani aplea sevokam add ievzonneo korcheo mhunnTannem tanchea dusmananchem kalliz bodlonk dilem.
26 Tannem aplo sevok Moizesak dhaddlo,Ani apnnem vinchun kaddlolea Aronak dhaddlo.
27 Tannem tanchea modem khunna keleo,Hamachea desant vizmitam korun dakhoilim.
28 Tannem kallokh dhaddlo ani desant kallokh zalo,Te tachea utram add vochonk nant.
29 Tannem tanchem udok rogtan bodolʼlem,Ani tanchim nustim marun uddoilim.
30 Tancho des bebeamnim bhorlo,Razache rum pasun bebeamnim bhorle.
31 Tannem ghans marta toslea musank tancher akromonn korunk hukum dilo,Ani tanchea soglea vattaramnim musank* dhaddle.
32 Tannem tancho paus korveant bodolʼlo,Ani tanchea desacher zoglam* dhaddlim.
33 Tannem tachea drakxanchea valincho ani anjirachea zhaddancho nas kelo,Ani tanchea vattarantlim soglim zhaddam marun uddoilim.
34 Tannem tollank tancher akromonn korunk sanglem,Mezunk zaina titlea lhan tollamnim tancher akromonn korunk sanglem.
35 Tannim desant aslolim soglim zhaddam khaun uddoilim,Ani zomnichem pik khaun uddoilem.
36 Tannem tanchea desantlea soglea poilea putank marun uddoile,Bhurgeak zolmak haddpachea tanchea xoktechim poilim follam kabar kelim.
37 Tannem aplea lokank bhangar ani chandi diun bhair haddle,Ani tanchea kullam modlo konnuch addkhollon poddonk na.
38 Te bhair sorle tednam Ejipttkar sontosbhorit zale,Karonn tankam Izraelachi* bhirant asli.
39 Tannem tanchi rakhonn korunk tancher ek kup posrailem,Ani ratchea vellar ujea vorvim tankam uzvadd dilo.
40 Tannim maglem, ani tannem suknnim* haddlim,Sorgar thaun unddo dhaddun to tankam dhadoxi korit ravlo.
41 Tannem ek khoddop foddlem ani tantuntlean udok vhanvlem,Tem udok oronnʼnneant eke nhoim-e bhaxen vhanvonk laglem.
42 Karonn tannem aplo sevok Abrahamak dilʼlo povitr soput ugddas dovorlo.
43 Taka lagon tannem aplea lokank khuxalkai monoit bhair haddle,Aplea vinchun kaddloleank khuxalkaien bob marit bhair haddle.
44 Tannem tankam dusrea raxttranche vattar dile,Veg-vegllea desantlea lokanchem koxttanchem foll tankam daiz mhunn mellʼllem,
45 Tannim tache hukum pallche,Ani tachea kaideam pormonnem cholchem mhunn tannem oxem kelem.
Jah-k vakhannat!*
Footnotes
^ Vo “gitam gaun songitachim sadhonam vazoiat.”
^ Vo ghoddie, “kamam vixim uloiat.”
^ Vo “pillgi.” Utran utor, “bi.”
^ Utran utor, “Tannem dilʼli adnea.”
^ Utran utor, “unddeacho dor ek danddo moddlo.” Ho ghoddie unddo samballun dovrunk uzar kortale tea danddeak suchit korta.
^ Utran utor, “bandun taka tras kele.”
^ Ek osle torecho mus zo zollari bhaxen chabta.
^ Vo “ujeachim agttim.”
^ Utran utor, “tanchi.”
^ Vo “lhove.” Ek lhan-xem 18 cm (7 inch) lamb gullgullit suknnem. Tachem mas khaunk mellttalem.
^ Vo “Hallelujah!” “Jah” hem Jehova hea nanvachem shortt form zaun asa.
