Stotr 71:1-24
71 Jehova Deva, hanvem tujea thaim asro ghetla.
Mhaka kednanch lojek poddonk dinaka.
2 Tujea nitivontponnan mhaka salvar kor ani mhaka vanchoi.
Mhaka kan di* ani mhaka salvar kor.
3 Mhojea pasot khoddpar aslolea kilʼlea sarko zav,Zoim hanv kednam-i bhitor soronk xoktam.
Mhaka salvar korunk hukum di,Karonn tum mhojem khoddop ani kilʼlo.
4 Mhojea Deva, noxtteachea hatantlo,Ani onʼneai korun zulum korpeachea chopkeantlo mhaka vanchoi.
5 Karonn Akʼkhea Vixvachea Dhonia Jehova Deva, tum mhozo bhorvonso zaun asa,Mhojea tornattponnar thaun hanvem tujer visvas dovorla.*
6 Mhojea zolma thaun hanv tujer patielam,Mhojea avoichea kusveantlean mhaka bhair haddlo to tunch.
Hanv tuji vakhannʼnni korit ravtolom.
7 Hanv zaitea zannam pasot ek vizmit koso zalam,*Punn tum mhozo ghott asro.
8 Hanv thambonastana tuji vakhannʼnni korit ravtam,Dis-bhor hanv tujea vorteponna vixim sangtam.
9 Mhojea zanntte piraier mhaka pois korinaka,Mhojem boll unnem zata tednam mhaka soddun dinaka.
10 Mhoje dusman mhojea add uloitat,Ani mhozo jiv kaddunk sodhtat te munis, sangata mellon manddnni kortat,
11 Te mhunnttat: “Devan taka soddun dila,Tachea fattik lagat ani taka dhorat, karonn taka salvar korunk konnuch na.”
12 Deva, mhojea thaun pois ravonaka.
Mhojea Deva, mhaka modot korunk begin ieo.
13 Mhozo virodh kortat te,Lojek poddom ani tancho nas zaum.
Mhojer sonkoxtt haddunk sodhtat te,Lojek poddom ani tancho opman zaum.
14 Punn hanv zalear, tuji vatt polloit ravtolom,Hanv tuji anikui vakhannʼnni kortolom.
15 Mhojem tondd tujea nitivontponna vixim sangtolem,Tujim taronnachim kamam mezunk zainant titlim* aslear pasun,Hanv dis-bhor tea vixim uloitolom.
16 Akʼkhea Vixvachea Dhonia Jehova,Hanv ietolom ani tujea xoktivont kamam vixim sangtolom,Hanv tujea nitivontponna vixim, fokot tujeach nitivontponna vixim sangtolom.
17 Deva, mhojea tornattponnar thaun tunvem mhaka xikoila,Ani atam meren tujea ojapachea kamam vixim hanv sangot asam.
18 Deva, hanv zanntto zalear pasun ani mhoje kens piklear pasun mhaka soddun dinaka.
Fuddle pillgek tuje xokte* vixim,Ani ieunchim asat tankam tujea vorte xokte vixim mhaka sangom-di.
19 Deva, tujem nitivontponn mollba itlem unch asa,Tunvem vortim kamam keleant,Deva, tujea sarko konn asa?
20 Tunvem mhojer zaite tras ani sonkoxtt ieunk dileat zalear pasun,Mhaka novean ghottai di,Prithumechea kholaie thaun* mhaka voir kadd.
21 Tunvem mhojem vhoddponn vaddoum,Ani mhaka gherav ghalun bhuzvonn dium.
22 Mhojea Deva, tednam hanv tujea visvaxiponnak lagonTar aslolem sadhon vazoun tuji vakhannʼnni kortolom.
Izraelachea Povitr Deva,Hanv kinori* vazoun tuka vakhannʼnnechim gitam gaitolom.*
23 Hanv tuka vakhannʼnnechim gitam gaita astana mhoje vontt khuxalkaien bob martole,Karonn tunvem mhozo jiv salvar kelo.*
24 Dis-bhor mhoji jib tujea nitivontponna vixim uloitoli,*Karonn mhozo nas korunk sodhtat tankam loz bhogunk poddttoli ani tancho opman zatolo.
Footnotes
^ Vo “Bagon mhojem aik.”
^ Vo “thaun tunch mhozo bhorvonso.”
^ Vo “Mhojea sovem kitem ghoddlem tem polloun zaite lok ojap zale.”
^ Vo “kamam hanv somzonk xokona titlim.”
^ Utran utor, “hata.”
^ Vo “udkachea kholaie thaun.”
^ Hi ek vazoupachi vost jika gitara bhaxen tar astat, punn ticho akar gitara bhaxen na. Inglez bhaxent “harp.”
^ Vo “gitam gaun songitachim sadhonam vazoitolo.”
^ Vo “tunvem mhaka soddoilo.”
^ Vo “niall kortoli.”
