Stotr 7:1-17
-
Jehova ek nitivont Neai Korpi
-
‘Jehova Deva, mhozo neai kor’ (8)
-
Benjamin kullantlea Kushachea utrank lagon Davidan Jehovak gailʼlem dukhachem git.*
7 Jehova mhojea Deva, hanvem tujea thaim asro ghetla.
Mhaka dhumallo ditoleam thaun mhaka salvar kor ani soddoi.
2 Na zalear, xinva bhaxen te mhaka pinzun mhoje kuddkean-kuddke kortole,Te mhaka gheun voitole ani mhaka salvar korunk konnuch aschona.
3 Jehova mhojea Deva, mhozo guneanv asa zalear,Hanvem koslo-i onʼneai kela zalear,
4 Mhaka borem kortoleak hanvem vaitt kelam zalear,Vo koslench karonn nastana hanvem mhojea dusmanak luttla zalear,*
5 Tum mhojea dusmanak addainaka, to mhojea fattik lagom ani mhaka dhorum,To mhaka zomnir apttun mhaka marum,Ani mhoji mhoima matient kabar zaum. (Selah)
6 Jehova Deva, tujea ragan utth,*Mhojer krodhan bhorlolea dusmanam add ubo rav,Mhojea pasot zago zav ani neai zaunk hukum di.
7 Raxttram tujea bhonvtonnim ektthaim zaum,Ani voir thaun tum tanchea add panvl ghetolo.
8 Jehova veg-vegllea desantlea lokancher formonn martolo.
Jehova Deva, hanv nitivontponnan ani guneanvam mekllom* jielam,Tea pormonnem mhozo neai kor.
9 Upkar korun noxtteanchea vaitt kamancho xevott kor.
Punn nitivont lokank surokxit dovor,Karonn tum kallzam ani bhitorlim bhavnam* topasta toslo nitivont Dev zaun asa.
10 Dev mhoji ddhal, promannik kallzachea lokancho to Salvar Korpi zaun asa.
11 Dev ek nitivont Neai Korpi zaun asa,Ani to dor disa aplem zhoddttechem formonn kolloita.*
12 Konnui poschatap korina zalear, to aple tolvarik dhar kaddtta,To aplo dhonu bagoun toiar korta.
13 To mornnak pavoitat toslim aplim hotʼtearam toiar korta,To aple zolltte bann toiar korta.
14 Zachea pottant noxtteponn asa taka polloi,Tachea gorbant tras asat ani to fottink zolm dita.
15 To fondd marta ani khonnun-khonnun khol korta,Punn tannem khonnlolea fonddant toch poddtta.
16 Tannem haddlole tras tacheach mathear ietole,Tannem ji hinvsa* kelea ti tacheruch porot ietoli.
17 Jehovachea neai-ak lagon hanv tachi vakhannʼnni kortolom,Bhov Vortea Jehovachea nanvachi vakhannʼnni korun hanv gitam gaitolom.*
Footnotes
^ Hem dukh kortat tea vellar gaitat toslem git.
^ Vo ghoddie, “karonn nastana mhozo virodh korta taka hanvem soddun dila zalear.”
^ Vo “panvl ghe.”
^ Mhunnche, purnn toren bhokti korpi. Inglez bhaxent “integrity.”
^ Vo “ani kiddnneo.”
^ Vo “dor disa zobordost toren khast dita.”
^ Vo “maramari.”
^ Vo “gitam gaun songitachim sadhonam vazoitolom.”
