Stotr 35:1-28
Davidachem git.
35 Jehova Deva, mhojea virodheam add mhoji kes zhogodd,Mhojea add zhogoddttat, tanchea add tum zhogodd.
2 Tuji lhan ddhal* ani vhoddli ddhal ghe,Ani utthon mhoji rakhonn kor.
3 Mhojea fattik lagleant tanchea add tuzo bhalo ani kuradd ubar.
Mhaka mhunn: “Hanv tuka taronn diupi zaun asa.”
4 Je mhozo jiv kaddunk sodhtat, te lojek poddom ani tancho opman zaum.
Je mhozo nas korunk ievzonneo kortat, tankam loz zaun te pollon vochom.
5 Varean ubon voita tea daneache sali* bhaxen te zaum,Jehovachea dutan tankam pois dhanvddaun ghalum.
6 Jehovacho dut tanchea fattik lagta tednam,Tanchea vatter kallokh poddom ani thoim nisor zaum.
7 Karonn tannim mhojea pasot bexttich zall manddlea,Koslench karonn nastana mhojea pasot fondd marla.
8 Tacher okosmat sonkoxtt ieum,Apnnem manddlolea zallant toch sampddom,To tantunt poddom ani tacho nas zaum.
9 Punn hanv Jehovak lagon khuxal zatolom,Tachea taronn diupi kamank lagon sontosbhorit zatolom.
10 Mhojim soglim haddam mhunnttolim:
“Jehova Deva, tujea sarko konn asa?
Adar nasloleak tum bollixttam thaun vanchoita,Adar nasloleak ani goribak tum luttpeam thaun vanchoita.”
11 Noxtte govai fuddem ietat,Mhaka khoborna tea vostum vixim te mhaka vichartat.
12 Hanvem kelʼlea boreak te vaittan farik kortat,Mhaka dukhi kortat.
13 Punn te duent asle tednam hanvem sak ghatlo,Upas korun hanvem mhakach dukh dilem,Ani mhojea magnneacho zobab mellonaslo tednam,*
14 Hanv mhojea ixtta pasot vo bhava pasot dukh korit bhonvtolea bhaxen bhonvtalom,Eklo aplea avoi pasot dukh korta toso hanv dukhan bagovlom.
15 Punn hanv addkhollʼllom tednam te khuxal zale, ani ektthaim zale,Ektthaim zaun te okosmat mhojer akromonn korunk lipon bosle,Tannim pinzun mhoje kuddkean-kuddke kele, te vogi ravonk nant.
16 Devak man dinant te lok* keddnneo korun mhojeo moskoreo kortat,Te mhojea add aple dant korkoraitat.
17 Jehova Deva, tum kednam poriant oso polloit ravtolo?
Tanchea akromonnam thaun mhaka vanchoi,Tornattea xinvam thaun mhozo moladik jiv vanchoi.
18 Tednam hanv tuka vhoddle sobhent dhinvastolom,Lokanchea vhoddlea zomea modem hanv tuji vakhannʼnni kortolom.
19 Karonn nastana, je mhoje dusman zaleat tankam mhojer hansonk dinaka,Karonn nastana, mhozo dves kortat tankam vaitt hetu dovrun dolle marunk dinaka.
20 Karonn tanchim utram xanti kortat toslim nhoi,Punn desant xantin jietat tanchea add te naddbudʼdhen manddnneo kaddttat.
21 Mhojer arop ghalunk te aplem tondd uktem kortat,Te mhunnttat: “Hoi! Hoi! Tem tunvench kelam! Ami amchea dolleamnim polloilam!”
22 Jehova Deva, tunvem hem polloilam. Vogi ravonaka.
Jehova Deva mhojea thaun pois ravonaka.
23 Zago zav ani mhojea vatten ulounk utth,Jehova mhojea Deva, mhoji kes zhogodd.
24 Jehova mhojea Deva, tujea nitivontponnachea dorjeam pormonnem mhoji zhoddtti kor,Tankam mhoji poristhiti polloun hansonk dinaka.
25 Te apleakuch oxem kednanch mhunnona zaum: “Borem zalem! Amkam zai aslem toxench zalem.”
Te oxem kednanch mhunnona zaum: “Ami taka gillun uddoilo.”
26 Mhojer ailʼlem sonkoxtt polloun je hanstat,Tankam sogleank loz zaum ani tancho opman zaum.
Mhojea poros apleakuch vorte somzotat tankam lojen ani opmanan dhampun uddoum.
27 Punn mhojea nitivontponnak lagon khuxal zatat tannim sontosbhorit zaun bob marchi,Te oxem mhunnot ravom:
“Jehovachi mhoima zaum, zo aplea sevokanchi xanti polloun khuxal zata.”
28 Tednam mhoji jib tujea nitivontponnachim kamam kolloitoli,*Ani dis-bhor tuji vakhannʼnni kortoli.
