Stotr 106:1-48
106 Jah-chi* vakhannʼnni korat!
Jehovache upkar attoiat, karonn to boro,Tacho visvaxi mog sasnak togta.
2 Jehovachim xoktivont kamam purnn toren konn kollit korunk xokta?
Vo tachim vakhannʼnni favo aslolim soglim kamam konn sangonk xokta?
3 Te munis khuxal, je neai-an vagtat,Je sodanch sarkem tem kortat.
4 Jehova Deva, tum tujea lokank doia* dakhoita tednam mhozo ugddas kor.
Mhoji kallji ghe ani mhaka salvar kor,
5 Jea vorvim tum tujea vinchun kaddloleank jem boreponn dakhoita tem mhaka onnbhovunk mellttolem,Hanv tujea raxttra sangata khuxal zaunk xoktolom,Ani tujea daiz aslolea lokam sangata hanv gorvan tuji vakhannʼnni korunk* xoktolom.
6 Ami amchea purvozam bhaxen patok kelam,Ami vaitt kelam, ami noxtteponnan vagleat.
7 Ejipttant amchea purvozamnim tujea ojapachea kamancho valor korunk na.*
Tunvem dakhoilʼlea bhorpur visvaxi mogacho tannim ugddas dovrunk na,Punn te doria lagim, hoi, Tambddea Doria lagim tujea add gele.
8 Punn aplea nanvak lagon tannem tankam salvar kele,Jea vorvim to kitlo xoktivont asa tem kollon ailem.
9 Tannem Tambddea Doriacher dhengso ghatlo, ani to suklo,Oronnʼnneantlean* vhelʼlea bhaxen to tankam tea khol doriantlean gheun gelo.
10 Tancho dves kortoleanchea hatantlean tannem tankam salvar kele,Ani tankam tanchea dusmanachea chopkeantle soddoile.
11 Udkan tanchea dusmanank buddoile,Tanchea modlo eklo-i vanchonk* na.
12 Tednam tachea utracher tannim visvas dovorlo,Te tachi vakhannʼnni korun gitam gaunk lagle.
13 Punn te rokddech tachim kamam visorle,Tachea margdorxona pasot te ravonk nant.
14 Ranvott vattarant tannim apleoch svarthi itsa purnn keleo,Oronnʼnneant tannim Devachi porikxa keli.
15 Tannim jem maglem tem tannem tankam dilem,Punn uprant tannem tancher duens dhaddlem, jea vorvim te moron gele.
16 Te tombu bandun ravtale tea zagear tankam Moizesachi,Ani Jehovacho povitr munis Aronachi nattkai zali.
17 Uprant prithum ukti zali ani tinnem Dathanak gilʼlo,Ani Abirama sangata ektthaim zalʼle tankam sogleank aplea bhitor ghetle.
18 Tanchea zomea modem uzo pettlo,Eka ujeachea agttean noxtteancho bhosm korun uddoilo.
19 Tannim Horeban ek paddkulo kelo,Ani eka dhatuchea murtek* te paim-am poddle.
20 Tannim mhoji mhoima korchea bodlek,Tonn khaupi boilachea murtechi mhoima keli.
21 Ejipttant zannem vortim kamam kelʼlim,Tea Salvar Korpi Devak te visorle.
22 Tannem Hamachea desant khub sobit kamam kelʼlim,Tambddea Doria lagim ojapachim* kamam kelʼlim.
23 To tankam kabar korunk hukum diunchoch aslo,Punn nisonttonak pavoita toslo tacho rag tannem xant korcho mhunn,Tannem vinchun kaddlolea Moizesan tachea lagim vinoti keli.
24 Uprant tannim ekdom borea desak kainch valor naslolea bhaxen lekhlo,Tannem dilʼlea utracher tankam bhavarth naslo.
25 Te aplea tombumnim gunngunnot ravle,Tannim Jehovachem aikonk na.
26 Taka lagon, tannem aplo hat ubarun soput ghetlo,Ki to tankam ranvott vattarant marun uddoitolo,
27 Raxttram modem tanchea sonsticho nas korun uddoitolo,Ani veg-vegllea desamnim tankam ximpddaitolo.
28 Magir te Peorachea Baalachi bhokti korunk lagle,*Ani meloleank bhettoilolim bolidanam* tannim khailim.
29 Tannim aplea kamamnim tacho rag choddoilo,Taka lagon, tanchea modem ek pidda posorli.
30 Punn Finehasan fuddem soron panvl ghetlem tednam,Ti pidda thambli.
31 Ani hea karonnak lagon taka nitivont mhunn lekhlo,Pillgechea-pillge poriant taka nitivont mhunn lekhlo.
32 Tannim Meribachea* udka lagim Devak rag haddlo,Ani tankam lagon Moizes trasant poddlo.
33 Tannim Moizesak rag haddlo,Ani to chintinastana uloilo.
34 Jehovan adnea dilʼlea pormonnem,Tannim dusrea desantlea lokancho nas korun uddounk na.
35 Tachea bodlek, tea raxttranchea lokam sangata te mellon ravonk lagle,Ani tannim tancheo chali-riti apnnaileo.*
36 Te tanchea murteanchi seva korit ravle,Ani teo tanchea pasot ek fas zaleo.
37 Te noxttea devdutank aplea putanchem,Ani dhuvenchem bolidan bhettoitale.
38 Te niropradeanchem rogot varoit ravle,Kananachea murteank bhettounk,Te apleach putanchem ani dhuvenchem rogot varoit ravle,Ani tannim varoilʼlea rogtant akʼkho des oxudʼdh zalo.
39 Te tanchea kamank lagon oxudʼdh zale,Oslim kamam korun tannim Devacho visvasghat kelo.*
40 Tednam aplea lokancher Jehovacho rag pettlo,Ani aplea daiz aslolea lokanchi taka vitt ieunk lagli.
41 Tannem porot-porot tankam dusrea raxttranchea hatant dile,Tancho dves kortale tannim tancher raz cholounchem mhunn tannem oxem kelem.
42 Tanchea dusmanamnim tancher zulum kelo,Ani tanchea podve mukhar* tankam bagonk poddlem.
43 Zaite pavtti tannem tankam vanchoile,Punn te tachea add voitale ani tachi adnea moddttale,Tanchea guneanvak lagon te lojek poddttale.
44 Punn tancher ailolem sonkoxtt to polloitaloAni te modoti pasot ulo martale tem to aikotalo.
45 Tankam lagon to aplo korar ugddas kortalo,Tachea vortea* visvaxi mogak lagon taka tanche churchure distale.*
46 Tankam koidi korun vhortale tea sogleank,To tanche churchure korunk laitalo.
47 Jehova amchea Deva, amkam salvar kor,Ani raxttram modlim amkam ektthaim kor,Jea vorvim ami tujea povitr nanvache upkar attoitolim,Ani tuji vakhannʼnni korun khuxal zatolim.
48 Jehovachi, Izraelachea Devachi,Sasnachea-sasnak* vakhannʼnni zaum.
Ani soglea lokamnim oxem mhunnom, “Amen!”*
Jah-k vakhannat!*
Footnotes
^ Vo “Hallelujah!” “Jah” hem Jehova hea nanvachem shortt form zaun asa.
^ Vo “maniotai.”
^ Vo “hanv boddai marunk.”
^ Vo “kamancho orth somzonk nant.”
^ Vo “Ranvott vattarantlean.”
^ Vo “uronk.”
^ Vo “eka kantoilʼlea murtek.”
^ Vo “bhirankull.”
^ Mhunnche, meloleank vo jiv naslolea devank bhettoilolim bolidanam.
^ Vo “Baalak zuddle.”
^ Hacho orth “Zhogddop.”
^ Vo “tim tancheo chali-riti xiklim.”
^ Vo “tannim dusrea devam sangata xindollkechim kamam kelim.”
^ Utran utor, “tanchea hata khala.”
^ Vo “bhorpur.”
^ Vo “dukh zatalem.”
^ Vo “Sasnak thaun sasnak poriant.”
^ Vo “Toxench zaum!”
^ Vo “Hallelujah!” “Jah” hem Jehova hea nanvachem shortt form zaun asa.
