Stotr 77:1-20
Mukhel songitkarak; Jeduthunacher.* Asafachem git. Ek songit.
77 Hanv vhoddlea avazan Devak ulo martolom,Hanv Devak ulo martolom, ani to mhojem aikotolo.
2 Mhojea sonkoxttachea disamnim hanv Jehovak sodhtam,Ratchea vellar mhoje hat thokonastana tachea vatten posrailʼle astat.
Tori astana mhaka bhuzvonn mellona.
3 Devacho ugddas korun hanv haskar-suskar soddttam,Mhaka khub tras zatat ani mhojem boll kabar zata. (Selah)
4 Tum mhaka mhoje dolle bond korunk dina,Hanv bejar zalam ani mhojea tonddantlean utram suttonant.
5 Hanv adle dis ugddas kortam,Khub poilinchea vorsam vixim chintʼtam.
6 Ratchem hanv mhojem git* ugddas kortam,Hanv mhojea kallzant kholaien chintʼtam,Hanv bariksannen sodh kortam.
7 Jehova amkam sasnak soddun ditolo kai?
To porot kednanch amkam doia dakhouncho na kai?
8 Tacho visvaxi mog sasna pasot kabar zala kai?
Ieunchi asa ti khoinchich pillgi tachi bhas purnn zata ti pollounchina kai?
9 Dev apli doia dakhounk visorla kai,Vo tachea ragak lagon tannem kakut dakhovop soddun dilam kai? (Selah)
10 Mhaka oxem mhunnot ravchem poddttolem kai: “Hi vost mhaka khub sotaita:*
Bhov Vortea Devan amkam modot korop bond kelam”?*
11 Hanv Jah-chim* kamam ugddas kortolom,Adlea kallar kelʼlim tujim ojapachim kamam hanv ugddas kortolom.
12 Hanv tujea soglea kamancher niall kortolom,Ani kholaien tujea kamam vixim chintʼtolom.
13 Deva, tujeo vatto povitr asat.
Deva, tujea itlo vorto anik dusro Dev asa kai?
14 Tunch khoro Dev zaun asa, zo ojapachim kamam korta.
Tunvem veg-vegllea desantlea lokank tujem boll dakhoilam.
15 Tujea xokten* tunvem tujea lokank vanchoile,Jakobachea ani Juzechea putank vanchoile.* (Selah)
16 Deva, dorian tuka polloilo,Doria tuka polloun abuz zalo.*
Ani khol doria uchamboll zalo.
17 Kupantlean paus poddonk laglo,Kallokh zaun mollbar goddgodd marunk laglo,Ani tuje bann hanga-thoim vochonk lagle.
18 Tujea goddgoddacho avaz, rothanchea rodam* sarko aslo,Zoglam marlolean prithumer* uzvadd fanklo,Prithum halʼli ani thorthoronk lagli.
19 Tuji vatt doriantlean asli,Tuzo rosto zaitea doria modlean voitalo,Punn tujea panvlanchi khunna konnuch pollounk xoklona.
20 Eka hindda bhaxen tunvem tujea lokank vatt dakhoili,Moizes ani Arona udexim* tunvem tankam vatt dakhoili.
Footnotes
^ Xobdhkox polloi.
^ Vo “tar aslolea sadhonacher vazoilʼlem git.”
^ Vo “mhaka topta.”
^ Vo “amchea thaun aplo uzvo hat fatti kaddla.”
^ “Jah” hem Jehova hea nanvachem shortt form zaun asa.
^ Utran utor, “hatan.”
^ Utran utor, “soddoile.”
^ Vo “polloun thorthorlo.”
^ Vo “chakam.”
^ Vo “pik ditolea zomnicher.”
^ Utran utor, “hatan.”
