Stotr 29:1-11

  • Jehovacho xoktivont avaz

    • Povitr kopdde ghalun kelʼli bhokti (2)

    • “Mhoimevont Devacho avaz goddgodda bhaxen gorozta” (3)

    • Jehova aplea lokank boll dita (11)

Davidachem songit. 29  Xoktivont munxanchea putamno, Jehovak jem favo asa tem taka diat,Tachea mhoime pasot ani bolla pasot Jehovak jem favo asa tem taka diat.  2  Jehovachea nanvak favo ti mhoima diat. Povitr kopdde ghalun* Jehova mukhar man bagoiat.*  3  Jehovacho avaz kupam* voir gazta,Mhoimevont Devacho avaz goddgodda bhaxen gorozta,Jehova datt kupam voir asa.  4  Jehovacho avaz xoktivont asa,Jehovacho avaz vorto asa.  5  Jehovachea avazan cedar* zhadd moddtta,Hoi, Jehova Lebanonantlea cedar zhaddanche kuddkean-kuddke korun uddoita.  6  To Lebanonak* eka paddkulea bhaxen,Ani Sirionak eka tornattea boila bhaxen uddi marunk laita.  7  Jehovachea avazan ujeachim agttim pettʼttat,  8  Jehovachea avazan ranvott vattar koddkoddtta,Jehova Kadeshachea ranvott vattarak koddkoddo haddtta.  9  Jehovachea avazan horonn* koddkoddtta ani zolm dita,Toxench, ranantlea soglea zhaddanchim panam zhoddttat. Ani tachea mondirant aslolim soglim mhunnttat: “Devachi mhoima zaum.” 10  Jehovachem xinvason mollba voilea doriacher* asa,Jehova aplea xinvasonar Raza mhunn sodankal boson astolo. 11  Jehova aplea lokank boll ditolo. Jehova aplea lokank xantichem besanv ditolo.

Footnotes

^ Vo ghoddie, “Tachea povitrtaiechea vorteponnak lagon.”
^ Vo “Jehovachi bhokti korat.”
^ Utran utor, “udka.”
^ Vo “devdar.” Eke torechem vhoddlem zhadd.
^ Chodd korun, Lebanonacheo porvotancheo volli.
^ Vo “merum.”
^ Vo “buddttechea udkar.”

Copyrights for this publication