Stotr 107:1-43
107 Jehovache upkar attoiat karonn to boro,Tacho visvaxi mog sasnak togta.
2 Zankam Jehovan vanchoileat,* tannim oxem mhunnom,Zankam tannem dusmanachea hatantlean* vanchoileat,
3 Zankam tannem veg-vegllea desantlean ektthaim keleat,Udente thaun ani ostome thaun,*Utʼtore thaun ani dokxinne thaun, zankam tannem ektthaim keleat tannim oxench mhunnom.
4 Te ranvott vattarant, oronnʼnneant bhottokle,Te ravonk xoktale toslea khoincheach xarachi vatt tankam mellonk na.
5 Te bhukelʼle ani tanelʼle asle,Tankam samkem puro zaun te kabar zaunk pavlole.
6 Tanchea akantachea vellar te Jehova mukhar roddot ravle,Tanchea trasam thaun tannem tankam vanchoile.
7 To tankam sarke vatten gheun gelo,Ani te ravonk xoktale toslea xarant tankam haddle.
8 Jehovachea visvaxi moga pasot, ani munxanchea putank lagon tannem kelʼlea ojapachea kamam pasot,Lokamnim tache upkar attoum.
9 Karonn tannem tanelʼleank dhadoxi kele,Ani bhukelʼleank zaiteo boreo vostu dileo.
10 Thodde kallea-kitt kallkhant jietale,Te sanklleamnim bandlole ani koxtt-dukh sospi koidi asle.
11 Karonn te Devachea utrachea add gelʼle,Bhov Vortea Devan dilʼlea solʼleak tannim man diunk na.
12 Taka lagon, tannem tancher sonkoxtt haddun tanchim kallzam khaltim kelim,Te addkhollʼlle ani tankam modot korpi konn naslo.
13 Tanchea akantachea vellar tannim Jehovak ulo marlo,Tanchea trasam thaun tannem tankam salvar kele.
14 Tannem tankam kallea-kitt kallkhantlean bhair haddle,Tannem tancheo sanklleo toddun uddoileo.
15 Jehovachea visvaxi moga pasot, ani munxanchea putank lagon tannem kelʼlea ojapachea kamam pasot,Lokamnim tache upkar attoum.
16 Karonn tannem tambeachim daram moddun uddoilim,Lokhnnache dandde katrun uddoile.
17 Je murkh asle tankam koxtt-dukh soschem poddlem,Tanchea opradank ani guneanvank lagon tankam koxtt-dukh soschem poddlem.
18 Tankam jevonn-khann naka zalem,*Te fonddachea darvontteam lagim pavle.
19 Tanchea akantachea vellar te Jehovak ulo martale,Tanchea trasam thaun to tankam salvar kortalo.
20 To aplea utra udexim tanchim duensam borim kortalo,Tannem tankam tea fonddantle bhair kaddle zantunt te xirkolʼle.
21 Jehovachea visvaxi moga pasot, ani munxanchea putank lagon tannem kelʼlea ojapachea kamam pasot,Lokamnim tache upkar attoum.
22 Tannim dhinvasnneche iodn bhettoum,Ani tachea kamam vixim khuxalkaien porgottum,
23 Je tarvancher doriant provas kortat,Je zaitea udkacher aplo veapar-dhondo choloitat,
24 Tannim Jehovachim kamam polloileant,Doriache kholaiek aslolim tachim ojapachim kamam polloileant,
25 Koxem tachea utran vadoll suttʼtta,Ani doriachim lharam voir sortat tem tannim polloilam.
26 Te mollba itle voir sortat,Te doriache kholaiek voitat.
Ieunchem asa tea sonkoxttak lagon tancho dhir pigllon voita.
27 Te bebdea bhaxen lokhtat ani addkhollttat,Ani tanchi sogli kola kainch faideachi asona.
28 Uprant tanchea akantachea vellar te Jehovak ulo marun roddttat,Ani tanchea trasam thaun to tankam salvar korta.
29 To vadollak thondd korta,Doriachim lharam xant zatat.
30 Lharam xant zalea uprant te khuxal zatat,Ani tim vochonk axetalim tea dhokear to tankam gheun voita.
31 Jehovachea visvaxi moga pasot, ani munxanchea putank lagon tannem kelʼlea ojapachea kamam pasot,Lokamnim tache upkar attoum.
32 Lokanchea sobhe modem tannim tachi vhoddvik korum,Ani vhoddilanchea sobhent tannim taka vakhannum.
33 To nhoim-enk oronnʼnneant bodolta,Ani zhorink to sukhi zomin korun soddtta,
34 Pik dita tea zomnik to pik dina tosli kharott zomin korun soddtta,Thoim ravtat tanchea noxtteponnak lagon to oxem korta.
35 To oronnʼnneak tollem* korta,Ani sukea zomnik udkacheo zhori korta.
36 To bhukelʼleank thoim ravonk dita,Jea vorvim, te ek xar bandun tantunt ravonk xoktat.
37 Te xetam roitat ani drakxanche molle laitat,Tantuntlean tankam bhorpur pik melltta.
38 To tankam besanv dita ani tancho ankddo bhorpur vaddtta,To tanchea gorvancho ankddo unno zaunk dina.
39 Punn zulum, odruxtt ani dukhak lagon,Tancho ankddo porot unno zata ani tankam loz zata.
40 To vhoddlea odhikareank kainch valor naslolea bhaxen lekhta,Ani rosto na toslea padd zaun gelʼlea zagear tankam bhottkaita.
41 Punn to goribak zuluma thaun rakhta,*Ani tanchea familink hindda bhaxen bhorpur vaddoita.
42 Promannik hem polloun khuxal zatat,Punn soglea onitivontanchim tonddam bond zatat.
43 Zannvaiecho asa to hea vostucher dhean ditolo,Ani Jehovachea visvaxi mogachea kamancher bariksannen niall kortolo.
