Stotr 55:1-23
Mukhel songitkarak; tar aslolim sadhonam vazoun gaunchem. Maskil.* Davidachem git.
55 Deva, mhojem magnnem aik,Ani kakuti pasot hanvem kelʼli vinoti nakarnaka.*
2 Mhojer dhean di ani mhaka zobab di.
Mhojea uskeank lagon hanv uchamboll zalam,Ani mhojea jivak suseg na,
3 Karonn dusman mhaka dhomki dita,Ani noxtto mhojer dobhav ghalta.
Te eka-fattlean-ek mhojer tras haddttat,Ani ragan bhoron mhojea add dusmankai gheun ravtat.
4 Mhojem kalliz bhitorlea-bhitor dukhan tollmolltta,Ani mornnachea bhirantin mhaka gherav ghatla.
5 Mhojer bhirant ailea, ani hanv thorthoronk laglam,Ani mhaka koddkoddo suttla.
6 Hanv oxem mhunnot ravtam: “Mhaka parvea bhaxen pakhotte asle zalear kitlem borem zaupachem!
Hanv pois uddon voitolom aslom ani surokxit zagear vochon ravtolom aslom.
7 Polloi! Hanv pois uddon voitolom aslom.
Hanv ranvott vattarant vochon ravtolom aslom. (Selah)
8 Zhonnzhonnit varea thaun ani vadolla thaun pois vochon,Hanv asro melltta toslea zagear voitolom aslom.”
9 Jehova Deva, tankam ghuspa-gondhollant ghal ani tancheo sogleo manddnneo fiskottaun uddoi,*Karonn hanvem xarant hinvsa ani zhogddim polloileant.
10 Dis ani rat te tea xarachea durgancher voir choltat,Xara bhitor noxtteponn ani tras asat.
11 Tachea bhitor nisontton asa,Tachea nakea voilo zulum ani fosovop kednanch pois zaina.
12 Karonn mhaka tomnne marta to ek dusman nhoi,Na zalear hanv te sostolom aslom.
Mhojea add ubo ravla to ek virodhi nhoi,Na zalear hanv tache koddlean liptolom aslom.
13 Punn to tor tum, mhojeach sarko ek munis,*Mhozo svotacho sangati, zaka hanv bore bhaxen vollkhotam.
14 Amchi ixttagot kitli bori asli,Zaitea lokam sangata ami Devachea ghora cholot voitale.
15 Tancher nisontton ieum!
Te jivech Fonddant* vochom,Karonn tanchea modem ani tanchea bhitor vaitt asa.
16 Hanv zalear Devak ulo martolom,Ani Jehova mhaka salvar kortolo.
17 Sanjer, sokallim ani donparam mhaka usko zata, ani hanv pirgotam,*Ani to mhojem aikota.
18 Mhojea add zhogoddttat tanchea thaun mhaka to vanchoitolo* ani xanti ditolo,Karonn zaite zann mhojea add aileat.
19 Dev, zo adlea kallar thaun xinvasonar boslolo asa,To mhojem aikotolo ani tankam zobab ditolo. (Selah)
Te bodlonk toiar aschenant,Te, zankam Devachi bhirant na.
20 Tannem* apleach ixttancher akromonn kelem,Tannem aplo korar moddlo.
21 Tachim utram butter-a* poros mov asat,Punn bhitorlean* to zhogddonk toiar asa.
Tachim utram tela poros sullsullit asat,Punn tim bhair kaddlolea tolvari bhaxen asat.
22 Tujem soglem vojem* Jehovacher uddoi,Ani to tuka samballttolo,Nitivont munxak to kednanch poddonk* diunchona.
23 Punn Deva, tum tankam sokol fonddant uddoitolo.
Rogtache guneanvkari ani fosoupi munis tanchea jivitache orde dis pasun jieunchenant.
Punn hanv zalear, tujer visvas dovortolom.
Footnotes
^ Xobdhkox polloi.
^ Vo “Ani hanv modoti pasot magnnem kortam tednam tum liponaka.”
^ Vo “tanchim utram somzona toxim korun uddoi.”
^ Vo “ek munis, mhojeach boraborcho munis.”
^ Vo “ani hanv uchamboll asam.”
^ Utran utor, “soddoitolo.”
^ Mhunnche, vers 13-nt ani 14-nt sanglolo poilincho ixtt.
^ Vo “moskea.”
^ Vo “aplea kallzant.”
^ Vo “Tuzo bhar.”
^ Vo “halonk; lokonk.”
