Stotr 49:1-20
Mukhel songitkarak. Korachea putanchem git. Ek songit.
49 Soglea desantlea lokamno, hem aikat.
Ani sonvsarant ravpi* soglea lokamno dhean diat,
2 Lhanamno, toxech vhoddamno,*Goribamno, toxech girestamno, aikat.
3 Mhojea tonddantlean zannvaiechim utram bhair sortolim,Ani mhojea kallzant hanv jem niallttam tantuntlean somjikai dison ietoli.
4 Hanv eke mhunnʼnnecher dhean ditolom,Hanv kinori* vazoun mhojem umannem somzaitolom.
5 Trasanchea vellar hanv kiteak bhium?
Vaitt* lok mhaka gherav ghalun sokol uddouncho proitn kortat tednam hanv kiteak bhium?
6 Je aplea girestkaiecher visvas dovortat,Ani tanchea lagim aslolea bhorpur girestkaie vixim boddai martat,
7 Tanchea modlo konnuch aplea bhavak vanchounk xokona,Vo tachea pasot Devak soddvonn diunk* xokona,
8 (Tanchea jivitachem soddvonnechem mol itlem moladik asaKi te kednanch tem mol farik korunk xokchenant)
9 Jea vorvim to sodankal jietolo ani fondd pollounk pavchona.
10 To polloita ki, zannvaieche lok pasun mortat,Toxench murkh ani somjikai naslole lok sangata kabar zaun voitat,Ani tankam tanchi girestkai dusream pasot fatti soddunk poddtta.
11 Tanchim ghoram sodankal urchim mhunn,Tanche tombu pillgechea-pillge poriant urche mhunn te axetat.
Tannim tanchea zomnik aplem nanv dilam.
12 Punn munxak kitlo-i man aslear pasun to sodanch jivo urchona,Moron voita toslea zonvaram poros to boro asa oxem nhoi.
13 Je murkh astat, toxench je tanchea fattlean voitat ani tanchea polkea utrank lagon khuxal zatat,Tanchi hich poristhiti zata. (Selah)
14 Menddrank marunk vhortat toxe tankam Fonddant* vhortole.
Moronn eka gonvllea bhaxen tankam vatt dakhoitolem,Sokallim promannik tancher raj choloitole.
Tancho purnn toren nas zaun voitolo,Rajmahal nhoi, punn Fondd* tanchem ghor zatolem.
15 Punn Dev mhaka Fonddachea* xoktentlean* soddoitolo,Karonn to mhoji kallji gheunk mhaka aplea vengent ghetolo. (Selah)
16 Ek munis girest zata dekhun bhienaka,Tachea ghorachem vorteponn vaddtta dekhun bhienaka,
17 Karonn to morta tednam aplea sangata kainch gheun vochonk xokona,Tachea sangata tachem vorteponn sokol fonddant voichem na.
18 Karonn jivo astana to aplich vhoddvik korta.
(Tujea lagim bhorpur girestkai asta tednam lok tuka vakhannttat.)
19 Punn xevottak to aplea purvozam bhaxen morta.
Te porot uzvadd kednanch pollounchenant.
20 Eka munxak kitlo-i man aslear pasun to hem somzona zalear,Moron voita toslea zonvaram poros to boro asa oxem nhoi.
Footnotes
^ Vo “sonvsarachea.”
^ Utran utor, “Munxakullachea putamno, toxench munxachea putamno.”
^ Hi ek vazoupachi vost jika gitara bhaxen tar astat, punn ticho akar gitara bhaxen na. Inglez bhaxent “harp.”
^ Utran utor, “Guneanv kortat te.”
^ Vo “soddvonnechem mol farik korunk.”
^ Utran utor, “hatantlean.”
