Stotr 68:1-35
Mukhel songitkarak. Davidachem git. Ek songit.
68 Devak utthom-di, ani tachea dusmanank hanga-thoim ximpddom-di,Ani tacho dves kortat tankam tachea mukhavoile pollon vochom-di.
2 Dhunvor pois korta tea toren tunvem tankam dhanvddaun pois korum,Ujea mukhar menn pigolltta toxem,Deva mukhar noxttea munxancho nas zaum.
3 Punn nitivont lok khuxal zaum,Te Deva mukhar sontosbhorit zaum,Te khuxalkaien ulʼlasum.
4 Devak gitam gaiat, tachea nanvak vakhannʼnnechim gitam gaiat.*
Oronnʼnneantlean* pasar zatolea Devak gitam gaiat.
Tachem nanv Jah!* Tachea mukhar khuxal zaiat!
5 Dev, zo aplea povitr zagear asa,To bapui nasloleancho bapui ani vidvencho rakhpi* zaun asa.
6 Ekttim asat tankam ravonk Dev ek ghor dita,To koideank suttka diun ek ekdom borem jivit dita.
Punn hottʼtti* asloleank sukea vattarant ravonk poddttolem.
7 Deva, tunvem tujea lokank vatt dakhoili* tednam,Tum oronnʼnneantlean cholʼlo tednam, (Selah)
8 Prithum thorthortoli,Devak lagon mollbar thaun paus poddlo,*Devak lagon, Izraelachea Devak lagon ho Sinai dongor thorthorlo.
9 Deva, tunvem bhorpur paus poddom-so kelo,Tunvem tujea thokon puro zalʼlea lokank* novean boll dilem.
10 Te tujea tombumnim ravle,Deva, tujea boreponnak lagon, tunvem goribanchi kallji ghetli.
11 Jehova adnea dita,Bori khobor porgottʼttat teo bailo ek vhoddli fouz zaun asa.
12 Fouzanche raza pollon voitat, te poll kaddttat!
Ghorant ravpi bailek pasun luttichea mhalacho vantto melltta.
13 Tumi dadle foujechea tombum modem ujea* lagim visov ghetat zalear pasun,Thoim tumkam ek oslo parvo mellttolo,Zache pakhotte chandiche ani xudʼdh* bhangrache astole.
14 Sorvxoktivont Devan tachea razank hanga-thoim ximpddaile tednam,Zalmonant borf poddlo.*
15 Bashanacho porvot Devacho porvot* zaun asa,Bashanacho porvot zaiteo tengxeo aslolo porvot zaun asa.
16 Tengxenchea porvotamno, Devan aplo ravpacho zago mhunn vinchun kaddlolea* porvotak,Tumi nattkaien kiteak polloitat?
Khorench, Jehova thoim sodankal ravtolo.
17 Deva lagim hozaramnim ani lakʼkhamnim zhuzachim rotham asat.
Jehova Sinai dongra thaun povitr zagear aila.
18 Jah, amchea Deva tum voir choddlo,Tum koideank gheun gelo,Tunvem munis dennim mhunn vhele,Hoi, hottʼtti* asloleank pasun tunvem tanchea modem ravonk vhele.
19 Jehovachi vakhannʼnni zaum, zo dor disa amcho vojeacho bhar ubarta,To amkam taronn diupi khoro Dev zaun asa. (Selah)
20 Khoro Dev amkam salvar korpi Dev zaun asa,Ani Akʼkhea Vixvacho Dhoni Jehova mornnantlean vanchoita.
21 Hoi, Dev aplea dusmananchea toklencho churo kortolo,Je patok korit ravtat* tanchea toklencho to churo kortolo.
22 Jehovan mhunnttlam: “Hanv tankam Bashanantlean porot haddttolom,Hanv tankam doriache kholaiem thaun porot haddttolom,
23 Jea vorvim tuje paim dusmananchea rogtan buddttoleAni tujim sunnim tanchem rogot lenvtolim.”
24 Deva, te tujem pursanv polloitat,Mhojea Devachim, mhojea Razachim pursanvam te polloitat, zo povitr zagea vatten voita.
25 Gaupi fuddem choltat, tar aslolim sadhonam vazoupi songitkar tanchea fattlean choltat,Ani tanchea modem ddofli* vazoupi tornatteo bailo asat.
26 Vhoddle sobhent* asloleamno, Devachi vakhannʼnni korat,Tumi, zankam Izraelachea Bapa thaun jivit mellʼllam,* Jehovachi vakhannʼnni korat.
27 Thoim, sogleam-von lhan aslolo Benjamin tankam aplea tabeant gheta,Toxench, Judache kunvor ani tanche khuxalkaien bovall korpi zome tankam aplea tabeant ghetat,Zebulunache kunvor ani Naftaliche kunvor pasun tankam aplea tabeant ghetat.
28 Tum xoktivont zauncho mhunn tujea Devan hukum dila.
Deva, tunvem adim boll dakhoilam toxem, amchea khatir atam-i dakhoi.
29 Jeruzalemant aslolea tujea mondirak lagon,Raza tujea pasot dennim haddttole.
30 Veg-vegllea desantle lok chandiche kuddke haddun tujea mukhar bagovnant* tea meren,Lamb tonnan* ravtolea ranvotti zonvarank,Toxench boilanchea hinddank ani tanchea paddkuleank bhenkddai.
Zhuz korunk khuxalkai melltta tea lokank tum hanga-thoim ximpddaita.
31 Ejipttantlean kanxeacheo* vostu haddttole,*Devak dennim diunk Kushantle* lok goddbodd* kortole.
32 Prithumechea rajeamno, Devak gitam gaiat,Jehovak vakhannʼnnechim gitam gaiat,* (Selah)
33 Zo adlea kallar thaun unch-unch mollbar bhonvddi marta.
Polloi! Tacho avaz, tacho xoktivont avaz goddgodda bhaxen gazta.
34 Devachem boll vollkhon gheiat.
Tachem vorteponn Izraelacher asa,Ani tachem boll mollbar* asa.
35 Dev, zo aplea vortea povitr mondirant asa, tachea pasot lokank bhirant ani man asonk zai.
To Izraelacho Dev,Zo lokank boll ani xokti dita.
Devachi vakhannʼnni zaum.
Footnotes
^ Vo “gitam gaun songitachim sadhonam vazoiat.”
^ Vo ghoddie, “Kupancher.”
^ “Jah” hem Jehova hea nanvachem shortt form zaun asa.
^ Utran utor, “neai korpi.”
^ Vo “jidʼdi.”
^ Utran utor, “lokam mukhar gelo.”
^ Utran utor, “thembe poddle.”
^ Utran utor, “daizak.”
^ Vo ghoddie, “gotteam.” Ek voim ghatlolo zago, jea zagear gonvlli aplea menddrank dovortat.
^ Vo “holdduvea-hirvea rongachea.”
^ Vo “borf poddlolea bhaxen zalo.”
^ Vo “Bashanacho porvot ek vorto porvot.”
^ Vo “Dev ravonk axeta tea.”
^ Vo “jidʼdi.”
^ Vo “patkachea vatter cholot ravtat.”
^ Hem ek hatan vazoita toslem chambddeachem songitachem sadhon. Inglez bhaxent “tambourine.”
^ Utran utor, “Zomatimnim.”
^ Vo “Tumi je Izraelachea Zhori thaun asat.”
^ Vo ghoddie, “kuddke maddoinant.”
^ Inglez bhaxent “reeds.”
^ Inglez bhaxent “bronze.”
^ Vo ghoddie, “Ejipttantlean prothinidi ietole.”
^ Vo “Ethiopientle.”
^ Vo “ghai-i.”
^ Vo “gitam gaun songitachim sadhonam vazoiat.”
^ Utran utor, “kupamnim.”
