Stotr 89:1-52
Maskil.* Zerachea sonstintlea Ethanachem git.
89 Jehovachea visvaxi moga vixim hanv sodankal gaitolom.
Soglea pillgenk hanv mhojea tonddan tujea visvaxiponna vixim kolloitolom.
2 Karonn hanvem mhunnttlam: “Visvaxi mog sodankal urtolo,Ani sorgar tunvem tujem visvaxiponn thir stapon kelam.”
3 Tunvem mhunnttlem: “Mhojea vinchun kaddlolea sangata hanvem ek korar kela,Mhozo sevok Davidak hanvem oso soput dila:
4 ‘Hanv tuje sonstik* sodankal thir stapon kortolom,Ani tujem xinvason pillgean-pillgi poriant thir kortolom.’” (Selah)
5 Jehova Deva, sorg tujea ojapachea kamam vixim vakhanntta,Hoi, povitr asat te* sobhent tujea visvaxiponna vixim vakhannttat.
6 Karonn mollbar Jehova sarko konn asa?
Devachea putam modem Jehova sarko konn asa?
7 Povitr asat tanchea sobhent* Devak bhirantin ani manan lekhtat,Tachea bhonvtonnim aslolea sogleam pasot to vorto ani ojapacho* asa.
8 Fouzanchea Deva Jehova,Jah, tujea sarko xoktivont konn asa?
Tujem visvaxiponn tujea sorvbhonvtonnim asa.
9 Uchamboll zalʼlea doriacher tum tabo dovorta,Tachim lharam voir sortat tednam tum tankam xant korta.
10 Tunvem Rahabak* purnn toren haroilam ani jivexim marlam.
Tujea bollvont hatan tunvem tujea dusmanank hanga-thoim ximpddaileat.
11 Mollob tujem ani prithum pasun tujich,Pik dita ti zomin ani tantunt asa tem soglem tunvem rochlam.
12 Utʼtor ani dokxinn tunvem rochli,Tabor ani Hermon khuxalkaien tujea nanvachi vakhannʼnni kortat.
13 Tuzo hat xoktivont asa,Tuzo hat ghott asa,Tuzo uzvo hat voir ubarlolo asa.
14 Nitivontponn ani neai tujea xinvasonachi buniad zaun asa.
Visvaxi mog ani visvaxiponn tujea mukhar ubim ravtat.
15 Sontosbhorit zaun bob martat tim khuxal.
Jehova Deva, tim tujea mukhamollachea* uzvaddant choltat.
16 Tujea nanvak lagon tim dis-bhor khuxal astat,Ani tujea nitivontponnak lagon tankam man melltta.
17 Karonn tum tujea lokank boll ani man dita,Ani tujea maniotaiek lagon amchem boll* vaddot voita.
18 Karonn amchi ddhal, amkam Jehovan dilea,Amcho raza, amkam Izraelachea Povitr Devan dila.
19 Tea vellar tuka visvaxi asloleam koddem tum eka dorxonant uloilo ani tunvem mhunnttlem:
“Hanvem eka xoktivontak boll dilam,Hanvem mhojea lokam modlea vinchun kaddlolea ekleak voir ubarla.
20 Mhaka mhozo sevok David mellʼlla,Mhojea povitr telan hanvem taka makhla.
21 Mhozo hat taka tenko ditolo,Mhozo hat taka ghott kortolo.
22 Khoinchoch dusman tache koddlean tax vosul korchona,Ani khoinchoch onitivont munis tacher zulum korchona.
23 Hanv tachea mukhar tachea dusmanancho churo kortolom,Ani tacho dves kortoleank marun uddoitolom.
24 Mhojem visvaxiponn ani mhozo visvaxi mog tachea sangata asa,Ani mhojea nanvak lagon tachem boll* vaddttolem.
25 Hanv doriak tachea tabeant ditolom,*Ani nhoim-enk tachea uzvea hata khala ghaltolom.
26 To mhaka ulo marun mhunnttolo: ‘Tum mhozo Bap,Mhozo Dev, ani mhaka taronn diupi Khoddop.’
27 Ani hanv taka mhozo poilo put korun ghetolom,Prithume voilea soglea razam poros vorto kortolom.
28 Hanv sasna pasot taka mhozo visvaxi mog dakhoitolom,Ani tachea sangata hanvem kelʼlo korar kednanch tuttchona.
29 Hanv tachea sonstik* sodankal stapon kortolom,Ani tachem xinvason mollba bhaxen sodam-sodankal thir kortolom.
30 Zor tachea putamnim mhozo kaido pallop soddun dilo,Ani te mhojea hukuma* pormonnem cholonant,
31 Zor tannim mhoje nem-kaide moddle,Ani mhojeo adnea pallinant,
32 Zalear te mhojea add geleat dekhun hanv tankam khast laitolom,Ani tanchea guneanvak lagon hanv tankam chabkamnim martolom.
33 Punn mhozo visvaxi mog taka dakhovop hanv kednanch bond korchom na,Toxench taka dilʼlem utor hanv pallʼllea xivai ravchona.*
34 Hanv mhozo korar moddchom na,Vo mhojea vonttamnim hanv jem uloilam tem hanv bodolchom na.
35 Hanvem mhojea povitrtaiecho ekuch pavtt sasna pasot soput ghetla,Hanv Davidak fott marchom na.
36 Tachi sonsot* sodankal urtoli,Tachem xinvason suria bhaxen mhojea mukhar sodanch urtolem.
37 Mollbar visvaxi sakxea bhaxen aslolea chondrima porim,Tem sodankal thir stapon zatolem.” (Selah)
38 Punn tunvem svota taka tujea nodre mukhavoilo pois kela ani taka nakarla,Tujea makhloleacho tuka boroch rag aila.
39 Tujea sevoka sangata kelʼlo korar tunvem kainch nhoi koso lekhla,Tunvem tacho mukutt sokol zomnir uddoun oxudʼdh kela.
40 Tunvem tacheo sogleo fatrancheo vontteo* moddun uddoileat,Tache kilʼle moddun te padd korun soddleat.
41 Tache koddlean pasar zatat tea sogleamnim taka luttla,Tache xezari tacho opman kortat.
42 Tunvem tachea dusmanank zoitivont keleat,*Tachea soglea dusmanank tunvem khuxal zaunk dileat.
43 Tunvem tachi tolvar kiteakuch upkarona toxi korun soddlea,Tunvem taka zhuzant haronk dilo.
44 Tunvem tachem vorteponn kabar korun uddoilam,Ani tachem xinvason zomnir xevttilam.
45 Tache tornattponnache dis tunvem unne keleat,Tunvem taka lojeche kopdde ghatleat. (Selah)
46 Jehova Deva, kitlo vell poriant tum tujem tondd lipoitolo? Tem tum sodankal lipoitolo kai?
Tuzo krodh ujea bhaxen zollot ravtolo kai?
47 Mhojem jivit kitlem lhan tem ugddas kor!
Tunvem soglea munxank kosloch udʼdhex nastana rochle kai?
48 Oso khoincho-i munis asa kai, zo jietolo ani kednanch moronn pollounchona?
To apleakuch Fonddachea* xokte thaun salvar korunk xokta kai? (Selah)
49 Jehova Deva, tunvem adlea kallar dakhoilʼlo visvaxi mog atam khoim gelo,Zachea vixim tunvem tujea visvaxiponnan Davidak soput dilʼlo?
50 Jehova Deva, tujea sevokank marlole tomnne ugddas kor,Mhaka soglea lokanche tomnne aikonche* poddttat.
51 Jehova Deva, tujea dusmanamnim koxe mhunn tomnne marleat,Tuzo makhlolo dor ek panvl ghetana tannim koso mhunn tacho opman kela.
52 Jehovachi sodankal vakhannʼnni zaum. Amen, Amen.
Footnotes
^ Xobdhkox polloi.
^ Utran utor, “biek.”
^ Vo “povitr devdut.”
^ Vo “zomatint.”
^ Vo “bhirankull.”
^ Hem ghoddie Ejipttak vo tachea Faroah-k suchit korta.
^ Vo “tonddachea.”
^ Utran utor, “xing.”
^ Utran utor, “xing.”
^ Vo “tachea odhikara khala ghaltolom.”
^ Utran utor, “biek.”
^ Vo “nitichea nirnnoi-am.”
^ Utran utor, “Toxench mhojem visvaxiponn khottem zaunk diunchona.”
^ Utran utor, “bi.”
^ Vo “tache sogle fatranche asre.”
^ Utran utor, “dusmanancho uzvo hat voir ubarlo.”
^ Utran utor, “tomnne mhojea vengent gheun bhonvche.”
