Stotr 56:1-13
Mukhel songitkarak; “Pois Aslolo Xant Parvo” hea surar gaunchem. Davidachem git. Miktam.* Hem git tea vella voilem jednam Filistevkaramnim Davidak Gath xarant dhorlo.
56 Deva, mhaka doia dakhoi, karonn ek-na-ek dis morta toslo munis mhojer akromonn korta.*
Dis-bhor te mhojea lagim zhogddot astat ani mhojer zulum korit astat.
2 Dis-bhor mhoje dusman mhojer akromonn korit astat,*Zaite zann gorvan fulon mhojea add zhogoddttat.
3 Mhaka bhirant dista tednam hanv tujer visvas dovortam.
4 Hanv Devacher visvas dovortam, zachea utrachi hanv vakhannʼnni kortam.
Hanv Devacher visvas dovortam, mhaka koslich bhirant na.
Munis mhaka kitem korunk xokta?
5 Dis-bhor te mhaka tras kortat,Mhojem luksonn koxem korunk mellttolem teach vixim te chintat.
6 Mhojer akromonn korunk te lipon ravtat,Mhozo jiv kaddunk mellcho mhunn,Te mhojea dor eka panvlacher nodor dovortat.
7 Tanchea noxtteponnak lagon tankam nakar.
Deva, tum tujea ragan raxttrank khast lai.*
8 Hanv hevtten-tevtten bhottoktam tacho tum hixob dovorta.
Mhojim dukam tujea chambddeache battlent bhorun* dovor.
Tum tujea pustokant tancho hixob dovorna kai?
9 Hanv modoti pasot ulo martolom tea disa mhoje dusman fattim sortole.
Dev mhojea vatten asa, hachi mhaka purnn khatri asa.
10 Hanv Devacher visvas dovortam, zachea utrachi hanv vakhannʼnni kortam.
Hanv Jehovacher visvas dovortam, zachea utrachi hanv vakhannʼnni kortam.
11 Hanv Devacher visvas dovortam, mhaka koslich bhirant na.
Munis mhaka kitem korunk xokta?
12 Deva, hanvem tuka kelʼleo angvonneo purnn korop mhoji zobabdari zaun asa,Hanv tuje upkar attoitolom.
13 Karonn tunvem mhaka mornnantlean vanchoila,Ani mhoje paim addkhollna zaunk mhaka samballʼlla,Hanv Deva mukhar, jive asat tanchea modem* cholchom mhunn tunvem oxem kelem.
