Stotr 74:1-23
Maskil.* Asafachem git.
74 Deva, tunvem amkam sasna pasot kiteak nakarleant?
Tujea chorvachea hindda add tuzo rag* kiteak choddla?
2 Jea lokank* tunvem zaito kall poilim vinchlole,Jea kullak tunvem tujem daiz zalʼlea bhaxen soddoilʼlem, tacho ugddas kor.
Tum ravtalo tea Sion Dongracho ugddas kor.
3 Purnn toren nas zala tea zagea lagim tujim panvlam mar.
Dusmanan povitr zagear aslolea soglea vostunchem nisontton kelam.
4 Tuje dusman tujea bhokti korpachea zagear* gorozle.
Thoim tannim khunna mhunn aple khambe ube kele.
5 Kuraddeo gheun datt ran katrun uddoita toslea munxa sarke te asle.
6 Tannim kuraddeo ani lokhnnache dandde uzar korun sogleo kantoilʼleo vostu moddun uddoileo.
7 Tannim tujea povitr zageak uzo lailo.
Tujea nanvan vollkhotale to povitr tombu tannim oxudʼdh kelo, ani sokol zomnir uddoilo.
8 Tannim ani tanchea sonstin aplea kallzant mhunnttlem:
“Hea desant aslole, Devachi bhokti korpache sogle zage zolloun uddounche.”
9 Amkam kosleoch khunna disonant,Amchea modem ekui provadi na,Ani hem kitlo vell poriant choltolem tem amchea modlea konnankuch khoborna.
10 Deva, dusman kednam meren tuka tomnne marit ravtolo?
Dusman sodankal tujea nanvacho opman korit ravtolo kai?
11 Tum tuzo hat, tuzo uzvo hat ubarunk kiteak fattim ravta?
Tuzo hat tujea kopddeantlo bhair kadd ani tankam kabar kor.
12 Punn Dev adlea kallar thaun mhozo Raza zaun asa,Zo prithumecher taronn dita toslim kamam korta.
13 Tunvem tujea bollan doria uchamboll kelo,Tunvem doriantlea vhoddlea pranneancheo tokleo mostileo.
14 Tunvem Leviathanachea* toklencho churo kelo,Oronnʼnneantlea lokank tunvem teo tokleo jevonn mhunn dileo.
15 Tunvem zomin ugddun zhori ani nhoim-o vhanvom-xeo keleo,Sodanch vhanvtaleo teo nhoim-o tunvem sukoileo.
16 Dis toxich rat tujich zaun asa.
Tunvem uzvadd ani suria toiar kelo.
17 Tunvem prithumecheo sogleo ximo ghatleo,Tunvem gimache dis* ani thonddeche dis kele.
18 Jehova Deva, dusman tuka koso tomnne marta,Ani murkh lok tujem nanv koxe opmanan lekhtat, tem ugddas kor.
19 Tujea parveacho jiv ranvotti zonvaranchea tabeant korinaka.
Koxtt-dukh sostolea tujea lokank sasnak visornaka.
20 Amchea sangata kelʼlo korar ugddas kor,Karonn prithumechea dor eka kallokh aslolea zagear, hinvsa korpi lok lipon bosleat.
21 Zulum sostat te* lok niraxi zaun porot vochona zaum,Adar naslole ani gorib lok tujea nanvachi vakhannʼnni korum,
22 Deva utth, ani tuji kes mandd.*
Dis-bhor murkh lok tuka koxe tomnne martat, tem ugddas kor.
23 Tuje dusman kitem mhunnttat tem visornaka.
Tuzo virodh kortoleancho bovall dor disa tujea lagim pavta.
