Stotr 102:1-28
Niraxiponnan buddlolea* ani zulum sostolea eka munxachem magnnem. To Jehova mukhar aple uske votoita.
102 Jehova Deva, mhojem magnnem aik,Modoti pasot mhozo ulo tujea lagim pavom.
2 Mhojea sonkoxttachea vellar, mhojea thaun tujem tondd lipoinaka.
Mhaka kan di,*Hanv ulo martam tednam mhaka begin zobab di.
3 Karonn mhoje dis dhunvra bhaxen nanch zatat,Ani mhojim haddam chulintlea lakddam bhaxen lason voitat.
4 Mhojem kalliz, votak lagon bavon gelʼlea tonna bhaxen asa,Karonn hanv jevunk visortam.
5 Hanv vhoddlean pirgotam dekhun,Mhoji kat mhojea haddank chittkolea.
6 Hanv ranvott vattarantlea pannkolle* bhaxen dista,Padd zaun gelʼlea zageancher ravtolea eka lhan ghuguma* bhaxen hanv zalam.
7 Hanv add poddttam punn zagoch astam,*Hanv eka suknnea bhaxen asa jem ghoracher voir ekttench boson asta.
8 Mhoje dusman akʼkho dis mhaka tomnne martat.
Mhojeo moskoreo korpi* mhojem nanv gheun xirap ditat.
9 Karonn hanv unddo mhunn gobor khatam,Ani hanv jem pietam tantunt mhojim dukam miks zaleant.
10 Tujea ragak ani krodhak lagon,Mhaka kuxin kaddun uddounkuch tunvem mhaka voir ubarlo.
11 Mhoje dis, lhan zait* voita tea savlle sarke asat,Ani hanv tonna bhaxen bavot voitam.
12 Punn Jehova Deva, tum sodankal urta,Ani tunvem zoddlolem nanv* pillgean-pillgi poriant urtolem.
13 Dubhav nastana tum uttʼttholoch ani Sionachi kakut kortolo,Karonn tunvem taka doia dakhouncho ho vell,To nemlolo vell pavla.
14 Tujea sevokank tachea fatram thaun khuxalkai melltta,Ani tachea dhulʼlicho pasun tankam mog asa.
15 Raxttram Jehovachea nanvachi bhirant dhortolim,Ani prithume voile sogle raza tuji mhoima polloun tuji bhirant dhortole.
16 Karonn Jehova Sionak porot bandun kaddttolo,To aplea akʼkhea mhoimen dixtti poddttolo.
17 To kainch adar naslolea lokanchea magnneancher dhean ditolo,Tanchem magnnem to kainch valor naslolea bhaxen lekhchona.
18 Hem ieunchi asa te pillge pasot boroun dovorlam,Jea udexim, zolmak ieunche asat* te lok Jah-chi vakhannʼnni kortole.
19 Karonn to aplea unch aslolea povitr zagear thaun sokol polloita,Jehova sorgar thaun prithumer nodor marta,
20 Koidi asloleacho haskar-suskar aikonk,Ani mornnachem formonn marlam tankam suttka diunk, to oxem korta.
21 Hea vorvim, Sionant Jehovachem nanv porgott zatolem,Ani Jeruzalemant tachi vakhannʼnni zatoli.
22 Veg-vegllea desantle ani rajeantle lok,Jehovachi seva korunk ektthaim zatole tednam oxem zatolem.
23 Vell zaunchea poilinch tannem mhojem boll kaddun ghetlem,Tannem mhoje dis unne kele.
24 Hanvem mhunnttlem: “Mhojea Deva,Tum zo pillgean-pillgi poriant ostitvant asa,Mhaka kabar korun uddoinaka, karonn hanv mhojem ordench jivit jielam.
25 Khub poilim tunvem prithumecheo buniadi ghatleo,Ani mollob tujea hatanchem kam zaun asa.
26 Prithum ani mollob nas zatolem, punn tum urtolo.
Eka kopddea bhaxen tim pornim zatolim.
Kopddeam bhaxen tum tankam bodoltolo, ani tim kabar zaun voitolim.
27 Punn tum asa tosoch urtolo, ani tujim vorsam kednanch kabar zaunchimnant.
28 Tujea sevokanchim bhurgim surokxotaien jietolim,Ani tanchi sonsot tujea mukhar thir stapon zatoli.”
Footnotes
^ Vo “Oskot zait voitolea.”
^ Vo “Bagon mhojem aik.”
^ Ek torechem vhoddlem suknnem. Inglez bhaxent “pelican.”
^ Vo “natuka.” Inglez bhaxent “owl.”
^ Vo ghoddie, “Hanv sukon gelam.”
^ Vo “Mhaka pixean kaddpi.”
^ Vo “dis, vaddot.”
^ Vo “tujem nanv.” Utran utor, “tuzo ugddas.”
^ Utran utor, “zankam rochʼche asat.”
