Stotr 18:1-50
Mukhel songitkarak. Jehovacho sevok Davidachem git. Jehovan Davidak tachea soglea dusmanam thaun ani Saulu thaun vanchoilo tea disa Davidan hem git Jehova pasot gailem. Tannem mhunnttlem:
18 Jehova Deva, tum mhojem boll, hanv tuzo mog kortam.
2 Jehova mhojem tollop,* to mhozo kilʼlo ani mhozo vanchoupi zaun asa.
Mhozo Dev mhojem khoddop zaun asa, zachea thaim hanv asro ghetam,To mhoji ddhal, mhojem taronn diupi xing,* ani mhozo asro, zoim mhaka rakhonn melltta.*
3 Hanv Jehovak ulo martam, zaka vakhannʼnni favo,Ani hanv mhojea dusmanam thaun salvar zatolom.
4 Mornnachea doriemnim mhaka gherav ghatlo,Okosmat ietolea buddtte bhaxen, kainch faideak poddona toslea munxamnim mhaka bhivoilo.*
5 Fonddachea* doriemnim mhaka gherav ghatlo,Mhojea mukhar mornnache fas manddle.
6 Sonkoxttachea vellar hanvem Jehovak ulo marlo,Modoti pasot hanv mhojea Deva mukhar roddot ravlom,Aplea mondirantlean tannem mhozo avaz aikolo,Ani modoti pasot mhojem roddnnem tachea kanar poddlem.
7 Tednam prithum halonk ani thorthoronk lagli,Porvotancheo buniadi koddkoddonk lagleo,Ani fatti-fuddem halonk lagleo, karonn tacho rag choddlolo.
8 Tachea nakachea puddantlean dhunvor bhair sorlo,Ani tachea tonddantlean bhosm korun uddoita toslo uzo bhair sorlo,Tachea mukhar zollttea inglleancho paus poddlo.
9 Sokol denvtana tannem mollob bagoilem,Datt kallokh tachea paim-am ponda aslo.
10 To eka kerubacher boson uddot ailo,To eka devdutachea* pakhotteancher boson suddsuddaien sokol ailo.
11 Uprant kallokh ek kopddo zalʼlea bhaxen, tannem apleak tantunt guttlailo,Udkachea datt kallkhi kupancho ek tombuAplea bhonvtonnim ubo kelo.
12 Tachea mukhar aslolea porzollak lagon kupam funttlim,Ani tantuntlean korveancho ani inglleancho paus poddlo.
13 Uprant sorgar, Jehovan aplo avaz goddgodda bhaxen gazoilo,Bhov Vortean aplo tallo aikom-so kelo,Tednam korveancho ani inglleancho paus poddonk laglo.
14 Tannem bann marle ani tankam ximpddaile,Tannem zoglavnnem dhaddlem ani tanchea modem ghuspa-gondholl kelo.
15 Jehova Deva, tujea dhengxeak* lagon prithumechi buniad ukti zali,Tujea nakachea puddantlean ieta tea zobordost svasanNhoim-chi kholai disonk lagli.
16 To voir thaun sokol bagovlo,Tannem mhaka dhorlo ani khol udkantlo voddun bhair kaddlo.
17 Tannem mhaka mhojea bollixtt dusmana thaun vanchoilo,Mhaka tea lokam thaun vanchoilo je mhozo dves kortale ani mhojea poros chodd xoktivont asle.
18 Mhojea sonkoxttachea disa tannim mhozo virodh kelo,Punn Jehovan mhaka tenko dilo.
19 Tannem mhaka bhair kaddun surokxit zagear haddlo,Tannem mhaka vanchoilo, karonn hanv taka manvolom.
20 Hanv nitivont asam,Ani mhoje hat niropradi* asat dekhun Jehova mhaka inam dita.
21 Karonn hanv Jehovachea vatten cholot ravlam,Ani hanvem mhojea Devak soddun vochpachem noxtteponn korunk na.
22 Tache sogle nirnnoi mhojea mukhar asat,Hanv tachea kaideanchi beporva korchom na.
23 Hanv tachea mukhar chuki vinnem ravtolom,Ani hanv kosloch guneanv korinastana ravtolom.
24 Hanv nitivont asam,Ani tachea mukhar mhoje hat niropradi asat dekhun Jehovan mhaka inam dium.
25 Visvaxi asa tachea sangata tum visvaxiponnan vagta,Guneanv naslolea sangata tum guneanv nastana vagta.
26 Xudʼdh aslolea sangata tum xudʼdh toren vagta,Punn naddbudʼdhecho asa tachea sangata tum chotraien vagta.
27 Karonn tum khalteank salvar korta,Punn gorvixttank sokol xevttita.
28 Jehova Deva, tunch mhozo divo pettoita,Tum mhozo Dev, zo mhozo kallokh uzvaddant bodolta.
29 Tujea modotin hanv luttpeanchea zomeancho fuddo korunk xoktam,Devachea modotin hanv ek vonott choddonk xoktam.
30 Khorea Devachim kamam poripurnn asat,Jehovachim utram xudʼdh asat.
Tachea thaim asro ghetat tanchea sogleam pasot to ek ddhal.
31 Karonn Jehova bogor anik konnui Dev asa kai?
Amchea Deva bogor anik konnui khoddop asa kai?
32 Khoro Devuch mhaka boll dita,*Ani to mhoji vatt poripurnn kortolo.
33 To mhoje paim horonna* bhaxen korta,Ani to mhaka unch-unch zageancher ubo korta.
34 To mhojea hatank zhuz korunk xikoita,Mhoje hat tambeacho dhonu bagounk xoktat.
35 Tum mhaka tuji taronnachi ddhal dita,Tuzo uzvo hat mhaka tenko dita,*Ani tuji khaltikai mhaka voir ubarta.
36 Mhojea panvlank lagon tum rosto rund korta,Mhoje paim nisorchenant.
37 Hanv mhojea dusmananchea fattik lagtolom ani tankam dhortolom,Tancho purnn toren nas zalea bogor hanv porot ieunchom na.
38 Te porot utthonk xokchenant tea toren hanv tancho churo kortolom,Te mhojea paim-am ponda poddttole.
39 Tum mhaka boll diun zhuza pasot toiar kortolo,Tum mhojea dusmanak mhojea paim-am ponda ghaltolo.
40 Tum mhojea dusmanank mhojea thaun dhanvddaitolo,*Mhozo dves kortat tancho hanv xevott* kortolom.
41 Te modoti pasot ulo martat, punn tankam salvar korunk konnuch na,Te Jehovak pasun ulo martat, punn to tankam zobab dina.
42 Hanv tankam dhaddaun tancho churo kortolom, ani varea sangata ubon voita toslea dhulʼli bhaxen kortolom,Rostea voilea chikla bhaxen hanv tankam bhair uddoitolom.
43 Tum mhoji chuk kaddpi lokam thaun mhaka vanchoitolo.
Tum mhaka raxttrancher mukheli mhunn nemtolo.
Hanv jea lokank vollkhonam te mhoji seva kortole.
44 Mhojea vixim fokot ek khobor aikon te mhoji adnea pallttole,Pordexi ghabrot-ghabrot mhojea mukhar ietole.
45 Pordexi dhir soddun ditole,Te tanchea kilʼleam thaun koddkoddon bhair ietole.
46 Jehova jivo asa! Mhojea Khoddpachi vakhannʼnni zaum!
Mhojea taronn diupi Devachi vhoddvik zaum.
47 Khoro Dev mhojea pasot sudd gheta,To veg-vegllea desantlea lokank mhojea adhin korta.
48 Mhojea ragixtt dusmanam thaun to mhaka vanchoita,Mhojer akromonn kortat tanchea thaun tum mhaka voir ubarta,Hinvsa korpi munxa thaun tum mhaka salvar korta.
49 Taka lagon, Jehova Deva, hanv raxttram modem tuji mhoima kortolom,Ani tujea nanva pasot vakhannʼnnechim gitam gaitolom.*
50 To aplea raza pasot taronnachim vortim kamam korta,*To aplea makhloleak, Davidak ani tachea sonstik*Sodankal visvaxi mog dakhoita.
Footnotes
^ Vo “vhoddlem khoddop.”
^ Vo “mhozo surokxit kil’lo.”
^ Vo “bhenkddailo.”
^ Utran utor, “xoktechea.”
^ Vo “tapsannek.”
^ Utran utor, “xudʼdh.”
^ Vo “mhaka bollan nhesoita.”
^ Vo “merum.”
^ Vo “mhaka samballtta.”
^ Vo “Tum mhojea dusmananchi fatt mhaka ditolo.”
^ Utran utor, “vogi.”
^ Vo “gitam gaun songitachim sadhonam vazoitolom.”
^ Vo “pasot vhoddlem zoit melloun dita.”
^ Utran utor, “biek.”
