Ol Sam 5:1-12

  • Jehova i ples blong haed blong ol stret man

    • God i no laekem nating ol rabis fasin (4, 5)

    • “Yu lidim mi folem stret fasin blong yu” (8)

Long daerekta blong Nehilot.* Singsing blong Deved. 5  O Jehova, yu lesin long ol tok blong mi,+Yu lukluk gud taem mi pulum nogud win blong mi.   Yu lesin gud long mi taem mi krae from help,O king blong mi mo God blong mi, from we mi mi prea i go long yu.   O Jehova, bambae yu harem voes blong mi long moning,+Long moning, bambae mi talemaot ol wari blong mi long yu+ mo bambae mi stap wet long ansa.   From yu yu no wan God we i glad long ol rabis fasin,+I no gat wan rabis man i save stap wetem yu.+   Man we i gat flas tingting i no save stanap long fes blong yu. Yu yu no laekem nating olgeta we oli stap mekem rabis fasin,+   Bambae yu distroem olgeta we oli stap talem ol giaman tok.+ Jehova i no laekem nating fasin blong faet mo ol man blong giaman.*+   Be mi bambae mi kam insaed long haos blong yu,+ from fasin blong yu blong lavem man oltaem i bigwan tumas,+Bambae mi bodaon i go long holi tempol* blong yu, blong soemaot we mi fraet* long yu.+   O Jehova, plis yu lidim mi folem stret fasin blong yu, from we mi gat plante enemi,Yu mekem rod blong yu i klia blong mi folem.+   From eni samting we oli talem, man i no save trastem,I no gat wan gud samting long olgeta, be rabis tingting nomo,Trot blong olgeta i olsem wan gref we i open i stap,Oli yusum tang blong olgeta blong switim man nomo.+ 10  Be God bambae i talemaot se oli gat fol,Ol plan blong olgeta nomo bambae i mekem oli foldaon.+ I gud yu ronemaot olgeta from oli mekem plante sin,Yes, oli rebel agensem yu. 11  Be olgeta we oli go haed long yu, bambae oli harem gud,+Bambae oltaem oli singaot from oli glad. Bambae yu blokem ol enemi blong oli no kam klosap long olgeta,Mo olgeta we oli lavem nem blong yu, bambae oli harem gud from yu. 12  From we bambae yu yu blesem ol stret man, O Jehova,Bambae yu agri fulwan long olgeta, olsem se yu putum ol sil raonabaot long olgeta.+

Ol futnot

Yu luk Diksonari.
NT: “man we i stap mekem blad i ron mo man blong giaman.”
NT: “tabu ples.”
NT: “tinghevi.”