Ol Sam 119:1-176
-
Ol man oli glad from tok blong God we i gud tumas
-
‘?Olsem wanem wan yangfala i save mekem laef blong hem i klin?’ (9)
-
“Mi mi laekem ol rimaenda blong yu tumas” (24)
-
“!Mi mi lavem loa blong yu tumas!” (97)
-
“Gat hed moa i winim evri tija blong mi” (99)
-
“Tok blong yu hem i laet blong leg blong mi” (105)
-
“Stamba blong tok blong yu, hem i trutok” (160)
-
Olgeta we oli lavem loa blong God, oli kasem pis (165)
-
א [Aleph]
119 Ol man we laef blong olgeta i klin,*We oli stap wokbaot folem loa blong Jehova, oli glad.+
2 Ol man we oli stap folem ol rimaenda blong hem,+We oli stap lukaotem hem long fulhat blong olgeta, oli glad.+
3 Olgeta oli no stap mekem ol rabis fasin,Mo oli wokbaot long ol rod blong hem.+
4 Yu yu givim oda finisSe ol man oli mas folem gud ol oda blong yu.+
5 !Mi mi wantem tumas se mi stap strong oltaem,*+Blong mi save folem ol rul blong yu!
6 Olsem nao, taem mi stadi long ol komanmen blong yu,Bambae i no gat man i save mekem mi mi sem.+
7 Taem mi lanem ol stret desisen blong yuBambae mi presem yu wetem wan hat we i stret.
8 Bambae mi folem ol rul blong yu.
Plis yu no lego mi fulwan.
ב [Beth]
9 ?Olsem wanem wan yang man i save mekem laef blong hem i stap klin?Taem hem i mekem laef blong hem i laenap wetem ol tok blong yu.+
10 Mi mi stap lukaotem yu long fulhat blong mi.
Plis yu no letem mi mi gowe long ol komanmen blong yu.+
11 Mi mi holemgud ol tok blong yu long hat blong mi, olsem wan sas samting,+Olsem nao mi no save mekem sin agensem yu.+
12 O Jehova, i gud ol man oli presem yu,Yu tijim mi long ol rul blong yu.
13 Long maot blong mi, mi talemaotOlgeta jajmen we yu bin talemaot.
14 Mi mi glad moa long ol rimaenda blong yu+I winim we mi glad long ol narafala sas samting.+
15 Bambae mi tingting* oltaem long ol tok blong yu,+Mo mi lukluk ol rod blong yu oltaem.+
16 Mi mi laekem tumas ol loa blong yu.
Bambae mi no fogetem ol tok blong yu.+
ג [Gimel]
17 Plis yu kaen long man blong wok blong yu,Blong mi save stap laef mo folem tok blong yu.+
18 Yu openem ae blong mi blong mi save luk kliaOl gudgudfala samting long loa blong yu.
19 Mi mi olsem man blong narafala kantri nomo long graon ya.+
Yu no mas haedem ol komanmen blong yu long mi.
20 Mi mi* taed gud from we mi wantem tumasBlong save ol tingting blong yu.
21 Yu yu tok strong long olgeta we oli stap mekem samting we oli no gat raet blong mekem,Hemia olgeta we oli mas kasem panis, from we oli gowe long ol komanmen blong yu.+
22 Plis yu tekemaot* ol tok jik mo ol rabis tok we oli stap long mi,From we mi mi stap folem ol rimaenda blong yu.
23 Nating se ol prins oli sidaon tugeta mo tok agensem mi,Be man blong wok blong yu i stap tingting* long ol rul blong yu.
24 Mi mi laekem ol rimaenda blong yu tumas,+Oli ol advaesa blong mi.+
ד [Daleth]
25 Mi* nildaon we mi flat gud long das.+
Plis yu holem mi mi stap laef, folem tok blong yu.+
26 Mi talemaot olgeta fasin blong mi long yu, mo yu yu ansa long mi.
Yu tijim mi long ol rul blong yu.+
27 Yu mekem mi mi kasemsave mining* blong ol tok blong yu,Blong mi save tingting* oltaem long ol gudgudfala wok blong yu.+
28 Mi mi* no stap slip from we mi harem nogud tumas.
Yu mekem mi mi strong olsem we tok blong yu i talem.
29 Plis yu tekemaot fasin blong giaman long mi,+Mo yu givim loa blong yu blong soem se yu glad long mi.
30 Mi mi jusum fasin ya blong holemstrong oltaem.+
Mi luksave se ol desisen blong yu oli stret.
31 Mi mi fasgud long ol rimaenda blong yu.+
O Jehova, yu no letem we tingting blong mi i foldaon.*+
32 Bambae mi folem gud* rod blong ol komanmen blong yu.
From we yu yu mekem se i gat spes blong hem long hat blong mi.*
ה [He]
33 O Jehova, yu tijim mi+ long rod blong folem ol rul blong yu,Mo bambae mi folem olgeta gogo kasem en.+
34 Yu givhan long mi blong mi kasemsave samting,Nao mi save folem loa blong yuMo mi obei long hem long fulhat blong mi.
35 Yu lidim mi* long rod we i stret folem ol komanmen blong yu,+From we oli mekem mi mi glad.
36 Plis yu mekem we hat blong mi i wantem ol rimaenda blong yu,Be i no ol samting we mi nomo mi wantem.*+
37 Yu tanem hed* blong mi i gowe, blong mi no luk ol samting we oli nating nomo.+
Yu mekem mi mi folem ol fasin blong yu, blong mi stap laef.
38 Yu mekem promes* blong yu i kamtru long man blong wok blong yu,Blong mekem se ol man oli fraet* long yu.*
39 Yu tekemaot sem ya we mi stap fraet long hem,From we ol desisen blong yu oli gud tumas.+
40 Traem luk olsem wanem mi wantem tumas ol tok blong yu.
Plis yu holem mi mi stap laef from stret fasin blong yu.
ו [Waw]
41 O Jehova, i gud mi ekspiriensem fasin blong yu blong lavem man oltaem,+Mo rod blong yu blong sevem man, olsem we yu promes.*+
42 Nao bambae mi ansa long man we i stap tok nogud long mi,From mi mi trastem tok blong yu.
43 Yu no tekemaot fulwan tok blong trutok long maot blong mi,From we mi mi putum hop blong mi* long ol desisen blong yu.
44 Bambae mi obei long loa blong yu oltaem,Gogo i no save finis.+
45 Bambae mi wokbaot olbaot long wan ples we i sef,*+From mi stap lukaotem ol tok blong yu.
46 Bambae mi tokbaot ol rimaenda blong yu long fes blong ol king,Mo bambae mi no sem.+
47 Mi mi laekem ol komanmen blong yu tumas,Yes, mi lavem olgeta.+
48 Bambae mi leftemap han blong mi from ol komanmen blong yu, we mi lavem tumas,+Mo bambae mi stap tingting* long ol rul blong yu.+
ז [Zayin]
49 Plis yu tingbaot tok* blong yu we yu talem long man blong wok blong yu,Mo we yu yusum blong givim hop long mi.*
50 Tok ya nao i mekem mi mi harem gud bakegen taem mi harem nogud,+From tok blong yu i holem mi mi stap laef.
51 Oltaem ol man we oli stap mekem samting we oli no gat raet blong mekem, oli stap tok nogud long mi,Be mi mi no gowe long loa blong yu.+
52 O Jehova, mi mi tingbaot yet ol desisen we yu mekem bifo,+Mo oli mekem mi mi harem gud.+
53 Mi mi kros tumas long ol man nogud,We oli sakemaot loa blong yu.+
54 Nomata weples mi stap long hem,*Ol rul blong yu oli olsem ol singsing blong mi.
55 O Jehova, long naet, mi tingbaot nem blong yu,+Blong mekem se mi save obei long loa blong yu.
56 Hemia fasin blong mi bifo i kamFrom we mi mi stap folem ol tok blong yu.
ח [Heth]
57 Jehova i olsem olgeta samting we mi gat,+Mi mi promes blong obei long ol tok blong yu.+
58 Mi mi apil* long yu long fulhat blong mi,+Plis yu kaen long mi+ olsem we yu promes.*
59 Mi mi jekemgud ol fasin blong mi,Blong mi save tanemraon blong folem ol rimaenda blong yu.+
60 Mi kwik mo mi no tektaemBlong obei long ol komanmen blong yu.+
61 Ol rop blong ol man nogud oli raonem mi,Be mi no fogetem loa blong yu.+
62 Long medel naet mi wekap blong talem tangkiu long yu+From ol stret desisen blong yu.
63 Mi mi wan fren blong olgeta we oli fraet* long yuMo blong olgeta we oli stap obei long ol tok blong yu.+
64 O Jehova, fasin blong yu blong lavem man oltaem i kavremap fulwol.+
Yu tijim mi long ol rul blong yu.
ט [Teth]
65 O Jehova, yu yu mekem i gud long man blong wok blong yu,Stret folem tok blong yu.
66 Yu tijim mi blong mi tingting gud mo mi gat save,+From mi mi trastem ol komanmen blong yu.
67 Bifo mi kasem trabol, mi stap folem rod we i no stret,*Be naoia mi stap obei long ol tok blong yu.+
68 Yu yu gud+ mo ol wok blong yu oli gud.
Yu tijim mi long ol rul blong yu.+
69 Ol man we oli mekem samting we oli no gat raet blong mekem, oli stap talem ol giaman toktok long saed blong mi,Be mi mi folem ol tok blong yu long fulhat blong mi.
70 Hat blong olgeta i nam,*+Be mi mi laekem tumas loa blong yu.+
71 I gud we oli mekem mi harem nogud,+Olsem nao, mi save lanem ol rul blong yu.
72 Long mi, loa we yu talemaot i gud tumas,+I winim plante taosen pis silva mo gol.+
י [Yod]
73 Han blong yu i mekem mi mo i wokem bodi blong mi.
Yu givhan long mi blong mi kasemsave samting,Blong mi save lanem ol komanmen blong yu.+
74 Olgeta we oli fraet* long yu, oli luk mi mo oli glad tumas,From we tok blong yu hem i hop blong mi.*+
75 O Jehova, mi mi save se ol jajmen blong yu oli stret+Mo yu mekem mi mi harem nogud from yu holem promes blong yu oltaem.+
76 Plis, i gud fasin blong yu blong lavem man oltaem,+ i mekem mi mi harem gud,Olsem we yu bin promes* long man blong wok blong yu.
77 Plis yu soemaot se yu sore long mi, blong mi save stap laef,+From mi mi laekem tumas loa blong yu.+
78 Ol man we oli mekem samting we oli no gat raet blong mekem, i gud ol man oli mekem olgeta oli sem,From oli mekem i nogud long mi blong nating nomo.*Be bambae mi mi tingting* oltaem long ol tok blong yu.+
79 Yu letem olgeta we oli fraet* long yu oli kambak long mi,Hemia olgeta we oli save ol rimaenda blong yu.
80 I gud hat blong mi i klin gud taem mi stap folem ol rul blong yu,+Blong ol man oli no save mekem mi mi sem.+
כ [Kaph]
81 Mi mi wantem tumas* se yu sevem mi,+From we tok blong yu hem i hop blong mi.*
82 Ae blong mi i wantem ol tok blong yu tumas+Mo long semtaem mi talem se: “?Wetaem bambae yu mekem mi mi harem gud?”+
83 From mi mi olsem wan skin botel we oli draemap long smok,Be mi mi no fogetem ol rul blong yu.+
84 ?Man blong wok blong yu i mas wet hamas dei??Wetaem bambae yu mekem jajmen blong yu agensem ol man we oli stap ronem mi blong kilim mi?+
85 Ol man we oli mekem samting we oli no gat raet blong mekem, oli digim ol hol blong mi foldaon long hem,Olgeta oli stap rebel agensem loa blong yu.
86 Olgeta komanmen blong yu oli stret, man i save trastem.
Ol man oli stap ronem mi blong kilim mi, be blong nating nomo. !Plis yu halpem mi!+
87 Klosap nomo oli aotem mi long wol ya,Be mi mi no lego ol loa blong yu.
88 Plis yu holem mi mi stap laef, from we yu yu lavem man oltaem,Olsem nao mi save gohed blong obei long ol rimaenda we yu talemaot.
ל [Lamed]
89 O Jehova, tok blong yu bambae i stap nomo long heven,+Yes, blong olwe.
90 Yu yu stap holem promes blong yu stat long olgeta jeneresen bifo i kam.+
Yu yu stanemap wol ya i stap strong, taswe hem i stap stanap yet.+
91 Mo from ol desisen blong yu, oli* stap yet kasem tede,From we olgeta evriwan oli man blong wok blong yu.
92 Sipos mi no bin laekem loa blong yu,Bambae mi lus longtaem finis taem mi kasem trabol.+
93 Bambae mi neva fogetem ol tok blong yu,From we yu yu yusum ol tok ya blong holem mi mi stap laef.+
94 Mi mi man blong yu, yu sevem mi,+From we mi mi stap lukaotem ol tok blong yu.+
95 Ol man nogud oli stap wet blong distroem mi,Be mi mi stap tingting gud long ol rimaenda blong yu.
96 Mi mi luk finis we ol samting we oli stret gud, oli gat en blong olgeta,Be komanmen blong yu i no gat en blong hem.*
מ [Mem]
97 !Mi mi lavem loa blong yu tumas!+Mi stap tingting* long hem long fuldei.+
98 Komanmen blong yu i mekem mi mi waes moa i winim ol enemi blong mi,+From we i stap wetem mi olwe.
99 Mi mi gat hed moa i winim evri tija blong mi,+From we mi tingting* oltaem long ol rimaenda blong yu.
100 Mi mekem samting long fasin we mi kasemsave moa samting i winim ol olfala,From we mi stap folem ol tok blong yu.
101 Mi no wantem wokbaot long rod we i nogud,+Blong mi save obei long tok blong yu.
102 Mi mi no tanem baksaed long ol desisen blong yu,From yu yu bin tijim mi.
103 Ol tok blong yu oli swit gud long tang blong mi,Oli swit i winim hani long maot blong mi.+
104 Ol tok blong yu oli givhan long mi blong mekem ol wok we i soemaot se mi kasemsave samting.+
From samting ya, mi no laekem nating rod we i no stret.+
נ [Nun]
105 Tok blong yu hem i laet* blong leg blong mi,Mo hem i laet we i saenem rod blong mi.+
106 Mi mi mekem wan strong promes finis, mo bambae mi mas holem promes ya,Blong mi folem ol stret desisen blong yu.
107 Mi mi harem nogud tumas.+
O Jehova, plis yu holem mi mi stap laef stret folem tok blong yu.+
108 O Jehova, plis i gud yu glad long ofring we mi givim long gladhat blong hem, blong presem yu,*+Mo yu tijim mi long ol tingting blong yu.+
109 Oltaem laef blong mi i stap long denja,*Be mi mi no fogetem loa blong yu.+
110 Ol man nogud oli putum wan trap blong kasem mi,Be mi mi no gowe long ol tok blong yu.+
111 Bambae mi holem ol rimaenda blong yu oli blong mi olwe,*From we oli mekem hat blong mi i glad tumas.+
112 Mi mi mekem tingting blong mi i strong* blong mi obei long ol rul blong yuOltaem nomo, gogo kasem we mi ded.
ס [Samekh]
113 Mi mi no laekem nating olgeta we hat blong olgeta i no fulwan long yu,*+Be mi lavem loa blong yu.+
114 Yu yu selta blong mi mo yu sil blong mi,+From tok blong yu hem i hop blong mi.*+
115 Ol rabis man, yufala i stap longwe long mi,+Blong mi save folem ol komanmen blong God blong mi.
116 Plis yu sapotem mi olsem we yu bin promes,*+Olsem nao mi save gohed blong laef.
Yu no mekem se hop blong mi i lus, nao bambae mi harem nogud.*+
117 Yu sapotem mi blong mi save sef,+Nao bambae mi putum tingting i stap oltaem long ol rul blong yu.+
118 Yu tanem baksaed long olgeta we oli gowe long rul blong yu,+From oli ol man blong giaman mo ol man blong trik.
119 Yu yu sakemaot ol man nogud long wol olsem ol makas nomo,+Taswe mi mi lavem ol rimaenda blong yu.
120 From mi fraet long yu, bodi* blong mi i seksek,Mi fraet tumas long ol jajmen blong yu.
ע [Ayin]
121 Mi mi mekem ol samting we oli stret mo oli gud.
!Plis yu no lego mi mi go long han blong ol man we oli stap spolem mi!
122 Plis, yu promes blong lukaot gud long laef blong man blong wok blong yu,I gud ol man we oli stap mekem samting we oli no gat raet long hem, oli no spolem mi.
123 Ae blong mi i kam slak we i slak from mi stap wet blong yu sevem mi,+Mo mi stap wet long ol stret promes* blong yu.+
124 Plis yu soemaot fasin blong yu blong lavem man oltaem, long man blong wok blong yu,+Mo yu tijim mi long ol rul blong yu.+
125 Mi mi man blong wok blong yu, yu givhan long mi blong mi kasemsave samting,+Blong mi save ol rimaenda blong yu.
126 Taem i kam finis blong Jehova i tekem aksen,+From we olgeta oli brekem loa blong yu.
127 From samting ya, mi mi lavem ol komanmen blong yuMoa i winim gol, yes i winim gudfala gol.*+
128 Taswe, mi mi luk evri instraksen* we yu givim se oli stret gud.+
Mi mi no laekem nating ol rod we oli no stret.+
פ [Pe]
129 Ol rimaenda blong yu oli gud tumas.
From samting ya mi stap folem* olgeta.
130 Taem ol tok blong yu i kam klia, i olsem we laet i kam,+I mekem man we i no gat ekspiriens, i kasemsave samting.+
131 Mi openem maot bigwan mo mi pulum nogud win,*From we mi wantem ol komanmen blong yu tumas.+
132 Yu tanem yu i kam long mi mo yu kaen long mi,+Olsem we yu bin talem se bambae yu mekem long olgeta we oli lavem nem blong yu.+
133 Plis yu yusum tok blong yu blong lidim gud mi long rod blong mi.*Yu no letem wan nogud samting i bos long mi.+
134 Yu tekemaot* mi long ol man blong spolem man,Mo bambae mi obei long ol tok blong yu.
135 Yu mekem fes blong yu i saen* long man blong wok blong yu,+Mo yu tijim mi long ol rul blong yu.
136 Wota blong ae blong mi i stap ronFrom we ol man oli no obei long loa blong yu.+
צ [Tsade]
137 O Jehova, yu yu stret gud,+Mo ol jajmen blong yu oli stret.+
138 Ol rimaenda blong yu oli stret gudMo man i save dipen fulwan long olgeta.
139 Strong tingting blong mi, i olsem faea insaed long mi,+From we ol enemi blong mi oli fogetem ol tok blong yu finis.
140 Tok blong yu i klin gud,+Mo man blong wok blong yu i lavem tumas.+
141 Mi mi nating nomo mo oli stap lukluk rabis long mi.+
Nating se i olsem, mi no fogetem ol tok blong yu.
142 Stret fasin blong yu hem i stret fasin we i blong olwe,+Mo loa blong yu i trutok.+
143 Nating se trabol mo hadtaem i kasem mi,Be mi laekem yet ol komanmen blong yu.
144 Ol rimaenda blong yu oli stret gud blong olwe.
Yu givhan long mi blong mi kasemsave samting,+ nao mi save gohed blong laef.
ק [Qoph]
145 Mi singaot wetem fulhat blong mi. O Jehova, yu ansa long mi.
Bambae mi folem ol rul blong yu.
146 Mi stap singaotem yu. !Plis yu sevem mi!Bambae mi holemgud ol rimaenda blong yu.
147 Mi wekap bifo we i brok delaet* blong krae from help,+From we ol tok blong yu oli hop blong mi.*
148 Mi wekap bifo we ol aoa blong waj long naet i finis,Blong mi save tingting* long ol tok blong yu.+
149 Plis yu lesin long voes blong mi from we yu yu lavem man oltaem.+
O Jehova, plis yu holem mi mi stap laef folem jastis blong yu.
150 Olgeta we oli stap mekem ol samting blong sem* naoia oli kam klosap,Olgeta oli go longwe finis long loa blong yu.
151 O Jehova, yu yu stap klosap nomo long mi,+Mo olgeta komanmen blong yu oli trutok.+
152 Mi mi lanem ol rimaenda blong yu longtaem finis,Yu yu stanemap olgeta blong oli stap blong olwe.+
ר [Resh]
153 Yu luk, mi mi harem nogud tumas, yu sevem mi,+From mi mi no bin fogetem loa blong yu.
154 Yu difendem mi,* mo yu tekemaot mi,+Yu holem mi mi stap laef olsem we yu promes.*
155 Rod blong sevem man i longwe olgeta long ol man nogud,From we oli no bin lukaotem ol rul blong yu.+
156 O Jehova, yu yu gat bigfala sore.+
Plis yu holem mi mi stap laef stret folem jastis blong yu.
157 Ol man we oli stap ronem mi blong kilim mi, mo ol enemi blong mi, oli plante tumas.+
Be mi mi no gowe nating long ol rimaenda blong yu.
158 Taem mi luk ol man we oli no stap tru long yu, mi no laekem olgeta nating,From we oli no moa obei long ol tok blong yu.+
159 !Yu luk! !Mi mi lavem ol tok blong yu tumas!O Jehova, plis yu holem mi mi stap laef from yu yu lavem man oltaem.+
160 Stamba blong tok blong yu, hem i trutok,+Mo olgeta tingting blong yu oli stret mo oli stap olwe.
ש [Sin] o [Shin]
161 Ol prins oli stap ronem mi blong kilim mi,+ blong nating nomo,Be hat blong mi i gat bigfala respek long ol tok blong yu.+
162 Mi mi glad tumas long ol tok blong yu,+Olsem man we i glad from ol samting we oli winim long faet.
163 Mi mi no laekem fasin blong giaman, mi no laekem nating,+Mi lavem loa blong yu.+
164 Mi stap presem yu seven taem long wan deiFrom we ol jajmen blong yu oli stret.
165 Olgeta we oli lavem loa blong yu, oli kasem pis we i bigwan tumas.+
I no gat wan samting i save mekem olgeta oli stambol.*
166 O Jehova, mi stap wet long yu blong sevem mi,Mo mi folem ol komanmen blong yu.
167 Mi mi* holemgud ol rimaenda blong yu,Mo mi lavem olgeta tumas.+
168 Mi mi folem ol oda mo ol rimaenda blong yu,From yu yu save gud olgeta samting we mi stap mekem.+
ת [Taw]
169 O Jehova, yu harem krae blong mi, yu givhan long mi.+
Plis yu mekem mi mi kasemsave samting stret folem tok blong yu.+
170 I gud yu harem mi taem mi askem yu blong yu kaen long mi.
Yu sevem mi olsem we yu bin promes.*
171 I gud maot blong mi i fulap gud long ol tok blong presem yu,+From we yu nao yu tijim mi long ol rul blong yu.
172 I gud tang blong mi i sing blong tokbaot tok blong yu,+From we ol komanmen blong yu oli stret.
173 I gud han blong yu i rere blong halpem mi,+From we mi mi jusum blong obei long ol tok blong yu.+
174 O Jehova, mi mi wantem tumas se yu sevem mi,Mo mi laekem loa blong yu tumas.+
175 I gud yu letem mi mi* stap laef, blong mi save presem yu.+
I gud ol desisen blong yu oli halpem mi.
176 Mi mi lusum rod finis, olsem wan sipsip we i lus.+ Plis yu lukaotem man blong wok blong yu,From we mi mi no fogetem ol komanmen blong yu.+
Ol futnot
^ NT: “Ol man we oli tok tru oltaem.”
^ PT: “wantem tumas se fasin blong mi oli stret oltaem.”
^ NT: “stadi.”
^ NT: “Sol blong mi i.”
^ PT: “Plis yu rolemaot.”
^ NT: “stadi.”
^ NT: “Sol blong mi i.”
^ PT: “rod.”
^ NT: “stadi.”
^ NT: “Sol blong mi i.”
^ NT: “yu no letem ol man oli mekem mi mi sem.”
^ PT: “mi ron folem.”
^ MNT: “yu mekem se hat blong mi i stap strong.”
^ NT: “yu mekem mi mi wokbaot.”
^ NT: “i no blong mekem mi mi kam rij.”
^ PT: “ae.”
^ NT: “tok.”
^ NT: “tinghevi.”
^ MNT: “Hemia promes we yu mekem long ol man we oli fraet long yu.”
^ NT: “olsem we yu talem.”
^ NT: “mi mi stap wet.”
^ NT: “long wan ples we spes blong hem i bigwan.”
^ NT: “stadi.”
^ NT: “promes.”
^ NT: “We yu mekem mi mi stap wet from.”
^ NT: “Long haos we mi stap long hem olsem wan man blong narafala kantri nomo.”
^ NT: “Mi mekem we yu no moa kros long mi (mi wantem luk smael long fes blong yu.)”
^ NT: “talem.”
^ NT: “tinghevi.”
^ NT: “mi mestem, mi stap mekem sin.”
^ PT: “no gat filing, i olsem gris.”
^ NT: “tinghevi.”
^ NT: “Mi wet long tok blong yu.”
^ NT: “talem.”
^ MNT: “oli stap talem ol giaman toktok blong mekem i nogud long mi.”
^ NT: “stadi.”
^ NT: “tinghevi.”
^ NT: “Sol blong mi i slak tumas, from mi wantem.”
^ NT: “Mi wet long tok blong yu.”
^ Hemia olgeta samting we God i mekem.
^ PT: “i stret gud long evri samting.”
^ NT: “stadi.”
^ NT: “stadi.”
^ Hemia wan “lamp.”
^ PT: “ofring we mi yusum maot blong mi blong givim i kam long yu long gladhat blong mi.”
^ NT: “Sol blong mi i stap oltaem long han blong mi.”
^ NT: “tok blong yu oli olsem olting blong mi blong olwe.”
^ PT: “mekem desisen long hat blong mi finis.”
^ NT: “ol man we oli gat tu hat.”
^ NT: “Mi mi wet long tok blong yu.”
^ NT: “olsem we tok blong yu talem.”
^ NT: “Yu no letem ol man oli mekem mi mi sem from hop blong mi.”
^ PT: “mit.”
^ NT: “tok.”
^ NT: “gol we oli bonem i klin gud.”
^ NT: “tok.”
^ NT: “sol blong mi i stap folem.”
^ PT: “pulum win hariap.”
^ NT: “yu mekem se mi no foldaon taem mi wokbaot.”
^ PT: “pembak.”
^ NT: “Yu smael.”
^ NT: “long eli moning taem i tudak yet.”
^ NT: “Mi stap wet long ol tok blong yu.”
^ NT: “stadi.”
^ NT: “doti fasin.”
^ NT: “Yu toktok long kot long bihaf blong mi.”
^ NT: “talem.”
^ NT: “Olgeta ya i no gat wan samting i blokem rod blong olgeta.”
^ NT: “Sol blong mi i.”
^ NT: “olsem we yu talem.”
^ NT: “sol blong mi i.”
