Ol Sam 19:1-14
Long daerekta. Singsing blong Deved.
19 Heven i stap talemaot glori blong God.+
Mo skae antap* i stap tokbaot ol wok blong han blong hem.+
2 Evri dei toktok blong olgeta i stap goaot olsem wota we i stap boel i kamkamaot,Mo evri naet oli stap soemaot save.
3 I no gat toktok, mo i no gat wan tok nating.
Man i no harem voes blong olgeta.
4 Be noes blong olgeta i stap* goaot long olgeta ples long wol,Mo mesej blong olgeta i go kasem olgeta ples long wol ya we ol man oli laef long hem.*+
Long heven, hem i putumap wan tent blong san i stap long hem.
5 Hem i olsem wan man we i jes mared, i stap kamaot long rum blong mared.
Hem i glad tumas olsem wan strong man we i stap ron long rod blong hem.
6 Hem i kamaot long narasaed heven,Mo i goraon gogo i kasem narasaed,+Mo i no gat wan samting i haed long hot blong hem.
7 Loa blong Jehova i stret gud,+ mo i stap givimbak paoa.*+
Ol rimaenda blong Jehova, man i save trastem,+ mo i mekem man we i no gat ekspiriens, i waes.+
8 Ol oda we oli kamaot long Jehova oli stret, oli mekem hat i glad.+
Komanmen blong Jehova i klin, i mekem ae i saen.+
9 Fasin blong fraet* long Jehova,+ i klin gud, i stap olwe.
Ol jajmen blong Jehova oli tru, oli stret evriwan.+
10 Man i wantem olgeta moa i bitim gol,I bitim gudfala gol,*+Mo i swit moa i bitim hani,+ hemia hani we i stap ronaot long bed blong bi.
11 Ol tok ya oli stap olsem woning long man blong wok blong yu.+
Taem man i obei long olgeta, i gat wan bigfala pei i stap.+
12 ?Hu i save luksave ol mastik blong hem wan?+Plis yu talemaot we mi mi no gat fol from ol sin we mi mekem be mi no save.
13 Yu blokem man blong wok blong yu, blong i no mekem ol samting we hem i no gat raet blong mekem,+Yu no letem oli bos long mi.+
Olsem nao bambae mi klin fulwan,+Mo mi no gat fol from ol sin we man i mekem long klia ples.*
14 O Jehova, yu yu Bigfala Ston blong mi+ mo yu Man We i Pemaot mi,+I gud ol tok long maot blong mi, mo samting we mi tingting dip long hem long hat blong mi, oli mekem yu glad.+
Ol futnot
^ NT: “open spes.”
^ MNT: “Be oli pulum teplaen i.”
^ NT: “olgeta graon ya we i givim ol gudfala kakae.”
^ NT: “givimbak (tekembak) sol.”
^ NT: “tinghevi.”
^ NT: “gol we oli bonem i klin gud.”
^ NT: “from plante sin.”
