Ol Sam 109:1-31
Long daerekta. Singsing blong Deved.
109 O God, mi mi presem yu oltaem,+ plis yu no stap kwaet.
2 From ol man nogud mo ol man blong trik oli stap openem maot blong olgeta agensem mi.
Oli stap talem ol giaman tok blong tokbaot mi.+
3 Oli stap raonabaot long mi, oli stap talem ol rabis tok agensem mi,Mo oli stap atakem mi, be blong nating nomo.+
4 Oli stap agensem mi nating se mi lavem olgeta,+Be mi mi gohed blong prea.
5 Oli mekem i nogud long mi, nating se mi mekem i gud long olgeta+Mo oli no laekem mi, nating se mi lavem olgeta.+
6 Plis yu jusumaot wan man nogud blong i lukaot long hem.
I gud wan man blong agens,* i stanap long raetsaed blong hem.
7 Taem oli jajem hem, i gud oli faenemaot we hem i rong.*Mo i gud oli talem se prea blong hem tu i wan sin.+
8 I gud we ol dei blong laef blong hem oli sot nomo.+
I gud wan narafala man i holem wok blong hem blong lukaot long ol man.+
9 I gud ol pikinini* blong hem oli stap we oli no gat papa,Mo i gud waef blong hem i kam wan wido.
10 I gud ol pikinini* blong hem oli kam olsem ol man we oli stap asaskem kakae olbaot,I gud oli stap long haos blong olgeta we i nogud finis, oli stap kakae.
11 I gud man we hem i kaon long hem* i karemaot olgeta samting we hem i gat,Mo i gud ol strenja oli kam stilim olting blong hem.
12 I gud ol man oli no kaen long* hem,Mo taem man ya i ded, i gud ol man oli no sore long ol pikinini blong hem.
13 I gud ol laen* blong hem oli lus evriwan.+
Mo i gud nem blong olgeta i finis nomo long wan jeneresen.
14 I gud Jehova i tingbaot ol rong we ol olfala blong hem bifo oli mekem,+Mo i gud hem i no ravemaot sin blong mama blong hem.
15 I gud Jehova i tingbaot gud ol samting we oli bin mekem,Mo i gud ol man long wol oli fogetem gud olgeta,+
16 From neva hem i tingbaot blong kaen long man,*+Be hem i gohed blong ronem man we i stap safa,+ puaman, mo man we hat blong hem i brokBlong kilim hem i ded.+
17 Hem i laekem blong singaot trabol long man, mo samting ya nao i kasem hem,Hem i no laekem nating blong blesem man, taswe hem i no kasem blesing.
18 Fasin blong singaot trabol, i kavremap hem olsem klos blong hem.
Mo i olsem wota we oli kafsaedem i go insaed long bodi blong hem,Mo olsem oel we i go insaed long ol bun blong hem.
19 I gud ol trabol ya oli olsem klos we hem i stap werem oltaem+Mo olsem wan strap we hem i werem oltaem.
20 Hemia nao pei we Jehova bambae i givim long ol man we oli stap agensem mi+Mo olgeta we oli stap talem ol rabis samting agensem mi.*
21 Be yu Jehova, Hae Masta,Plis yu mekem samting long bihaf blong mi, from nem blong yu.+
Plis yu tekemaot mi long trabol from we fasin blong yu blong lavem man oltaem, i gud tumas.+
22 From i no gat man blong givhan long mi mo mi pua,+Mo insaed long mi, i olsem se wan samting i sperem hat blong mi.+
23 Mi mi stap lus olsem sado we i stap lus sloslo,Mi olsem lokis we man i seksekemaot hem finis.
24 Ol ni blong mi oli no moa strong, from mi stap fasting.
Bodi blong mi i bunbun mo i stap godaon.*
25 Mi kam olsem wan samting we oli stap tok nogud long hem,+Taem oli luk mi oli stap saksakem hed blong olgeta from.+
26 O Jehova God blong mi, yu halpem mi.
Yu yusum fasin blong yu blong lavem man oltaem blong sevem mi.
27 I gud oli save se samting ya i kamaot from han blong yu.
O Jehova, i gud oli save se yu yu mekem samting ya.
28 Yu letem olgeta oli singaot trabol i kam, be i gud yu blesem mi.
Taem oli girap agensem mi, i gud yu mekem olgeta oli sem,Be i gud man blong wok blong yu i glad.
29 I gud sem i kam olsem klos blong olgeta we oli stap agensem mi,I gud sem i kavremap olgeta olsem wan longfala klos* we man i werem.+
30 Maot blong mi bambae i presem Jehova oltaem nomo.
Bambae mi presem hem long fes blong plante man,+
31 From bambae hem i stanap long raetsaed* blong puamanBlong tekemaot hem long ol man we oli stap jajem hem blong panisim hem.*
Ol futnot
^ NT: “wan man blong talemaot poen.”
^ NT: “faenemaot se hem i wan man nogud.”
^ PT: “boe.”
^ PT: “boe.”
^ NT: “we i letem hem i yusum sam samting blong hem fastaem.”
^ NT: “lavem.”
^ NT: “jeneresen.”
^ NT: “blong soemaot fasin blong lavem man oltaem.”
^ NT: “sol blong mi.”
^ PT: “Mi stap kam bunbun, mi no gat gris (oel).”
^ NT: “wan longfala kot we i no gat han blong hem.”
^ NT: “raethan.”
^ NT: “sol blong hem.”
