Salmo 4:1-8
Ngadto sa direktor; duyogan sa dekuwerdas nga mga instrumento. Salmo ni David.
4 Dihang motawag ko, tubaga ko, Oh akong Diyos nga matarong.+
Tagan-i kog dalan sa kaikyasan* sa akong kasakitan.
Pakitai kog pabor ug dungga ang akong pag-ampo.
2 Kamong katawhan,* hangtod kanus-a nga himoon ninyong kaulawan ang akong kadungganan?
Hangtod kanus-a nga higugmaon ninyo ang walay pulos ug pangitaon ang kabakakan? (Selah)
3 Hibaloi nga trataron ni Jehova sa espesyal nga paagi ang* maunongon kaniya;Si Jehova magpatalinghog dihang motawag ko kaniya.
4 Dihang mapikal mo, ayaw pagpakasala.+
Pamalandong diha sa inyong kasingkasing, diha sa inyong higdaanan, ug paghilom lang. (Selah)
5 Itanyag ang mga halad sa pagkamatarong,Ug salig kang Jehova.+
6 Daghan ang nag-ingon: “Kinsay magpakita kanato sa bisan unsa nga maayo?”
Ibanwag kanamo ang kahayag sa imong nawong, Oh Jehova.+
7 Imong gipuno ang akong kasingkasing ug hilabihang kalipayLabaw pa kay niadtong dunay abundang ani sa lugas ug bag-ong bino.
8 Mohigda ko ug matulog nga malinawon,+Kay ikaw lamang, Oh Jehova, ang nagpapuyo kanako sa kasegurohan.+
