Salmo 27:1-14
Salmo ni David.
27 Si Jehova ang akong kahayag+ ug akong kaluwasan.
Kinsa may akong kahadlokan?+
Si Jehova ang salipdanan sa akong kinabuhi.+
Kinsa may akong kalisangan?
2 Dihang giatake ko sa mga daotan nga daw gusto ko nilang lamyon,+Ang akong mga kontra ug mga kaaway mao ang nangapandol ug nangapukan.
3 Bisan pag magkampo ang kasundalohan batok kanako,Ang akong kasingkasing dili mahadlok.+
Bisan pag moulbo ang gubat batok kanako,Magmasaligon gihapon ko.
4 Usa ka butang ang akong gipangayo kang Jehova—Kini ang akong gitinguha—Nga makapuyo ko sa balay ni Jehova sa tanang adlaw sa akong kinabuhi,+Aron sud-ongon ang pagkamaayo* ni JehovaUg tan-awon nga may pagpabili* ang iyang templo.*+
5 Kay tagoan ko niya sa iyang silonganan sa adlaw sa katalagman;+Tagoan ko niya sa natagong dapit sa iyang tolda;+Ibutang ko niya sa ibabaw sa usa ka bato.+
6 Karon nagmadaogon ko batok sa akong mga kaaway nga naglibot kanako;Magtanyag kog mga halad diha sa iyang tolda uban ang hugyaw sa kalipay;Mag-awit kog mga pagdayeg* kang Jehova.
7 Patalinghogi ko, Oh Jehova, dihang motuaw ko;+Pakitai kog kaluoy ug tubaga ko.+
8 Alang kanimo, ang akong kasingkasing nag-ingon:
“Pangitaa ninyo ang akong nawong.”
Ang imong nawong, Oh Jehova, akong pangitaon.+
9 Ayawg itago ang imong nawong gikan kanako.+
Ayawg isalikway ang imong alagad tungod sa imong kasuko.
Ikaw ang akong magtatabang;+Ayaw kog pasagdi o biyai, akong Diyos sa kaluwasan.
10 Bisan pag biyaan ko sa akong amahan ug inahan,+Si Jehova mismo magsagop kanako.+
11 Tudloi ko sa imong dalan, Oh Jehova,+Tultoli ko sa alagianan sa pagkamatarong tungod sa akong mga kaaway.
12 Ayaw kog itugyan ngadto sa akong mga kaaway,+Kay ang bakakong mga saksi nanindog batok kanako,+Ug gihulga ko nila uban ang kapintasan.
13 Unsa na kahay nahitabo kanako kon wala pa koy pagtuoNga makita nako ang pagkamaayo ni Jehova samtang buhi pa ko?*+
14 Laom kang Jehova;+Magmaisogon ug lig-ona ang imong kasingkasing.+
Oo, laom kang Jehova.
Mga Footnote
^ O “katahom.”
^ O “uban ang pagpamalandong.”
^ O “sangtuwaryo.”
^ O “Mag-awit ko nga dinuyogag musika.”
^ O posible, “Duna gyod koy pagtuo nga makita nako ang pagkamaayo ni Jehova samtang buhi pa ko.”
