Salmo 72:1-20
Maipapan ken Solomon.
72 O Dios, isurom ti ari maipapan kadagiti pangngeddengmo,Ken isurom ti anak ti ari maipapan iti kinalintegmo.+
2 Nalinteg koma ti panangirupirna iti kalintegan dagiti tattaom,Ken ipaayna koma ti hustisia kadagiti napanglaw a tattaom.+
3 Talna koma ti ipaay dagiti bantay kadagiti umili,Ken kinalinteg koma ti ipaay dagiti turod.
4 Ikalinteganna* koma dagiti napanglaw iti ilim,Isalakanna koma ti annak dagiti marigrigat,Ken dadaelenna koma dagiti saur.+
5 Agbutengdanto kenka agingga nga adda ti initKen agingga nga adda ti bulan,Iti amin a henerasion.+
6 Ti panagturayna ket kaslanto iti tudo a mangbisibis iti naarbasan a karuotan,Kas iti tudo a mangsibug iti daga.+
7 Bayat ti panagturayna, umadunto* dagiti nalinteg,+Ken agsaknapto ti talna+ kas iti bulan nga awan inggana ti kaaddana.
8 Addanto dagiti masakupanna* manipud iti baybay agingga iti baybayKen manipud iti Karayan* agingga kadagiti pungto ti daga.+
9 Agdayawto kenkuana dagiti agnanaed iti desierto,Ket maparmeknanto dagiti kabusorna.*+
10 Agbayadto iti buis dagiti ari ti Tarsis ken dagiti isla.+
Mangtedto kadagiti regalo dagiti ari ti Sheba ken dagiti ari ti Seba.+
11 Agdayawto kenkuana ti amin nga ari,Ken agserbinto kenkuana ti amin a nasion.
12 Ta ispalennanto dagiti napanglaw nga agpatpatulong,Agraman dagiti marigrigat ken ti asinoman nga awan katulonganna.
13 Maasianto kadagiti marigrigat ken napanglaw,Ket ispalennanto ti biag* dagiti napanglaw.
14 Isalakannanto ida* iti pannakairurumen ken iti kinaranggas,Ti darada ket napategto kenkuana.
15 Agbiag koma iti napaut ken maited koma kenkuana ti balitok ti Sheba.+
Kanayon koma a maikararagan,Ken agmalmalem a mabendisionan.
16 Naruayto dagiti bukbukel ditoy daga;+Nagadunto ti maani iti rabaw dagiti bantay.
Nawadwadto ti maapit iti taltalonna a kas iti nabunga a bakir ti Lebanon,+Ket umadunto ti tattao kadagiti siudad a kas iti kaadu dagiti mula iti daga.+
17 Agpaut koma iti agnanayon ti naganna,+Kas koma iti kinaagnanayon ti init nga agtultuloy ti kinalatakna.
Mabendisionan koma dagiti tattao babaen kenkuana;+Ibaga koma ti amin a nasion a naragsak isuna.
18 Madaydayaw koma ni Jehova a Dios, a Dios ti Israel,+Isu laeng ti mangar-aramid kadagiti nakaskasdaaw a bambanag.+
19 Agnanayon koma a maidaydayaw ti nadayag a naganna,+Ken maipadayag koma iti intero a daga.+
Amen ken Amen.
20 Ditoy nga agpatingga dagiti kararag ni David nga anak ni Jesse.+
Footnotes
^ Lit., “Ukomenna.”
^ Lit., “agtubonto.”
^ Wenno “Agturayto.”
^ Kayatna a sawen, ti Eufrates.
^ Lit., “Dagiti kabusorna ket agdilpatdanto iti tapok.”
^ Wenno “kararua.”
^ Wenno “Subbotennanto ti kararuada.”
