Salmo 22:1-31
Iti direktor; naisurot iti tono “Ti Kabaian nga Ugsa iti Parbangon.”* Kanta ni David.
22 Diosko, Diosko, apay a binaybay-annak?+
Apay a dinak umay isalakan,Apay a dimo ipangag dagiti panagasugko?+
2 Diosko, inaldaw nga aw-awaganka, ngem dika sumungsungbat;+Rinabii nga agkarkararagak kenka.
3 Ngem nasantuanka,+Idaydayawdaka* dagiti Israelita.
4 Sika ti nagtalkan dagidi ammami;+Nagtalekda kenka, ket kanayon nga insalakanmo ida.+
5 Sika ti nagpaarayatanda, ket insalakanmo ida;Nagtalekda kenka, ket dimo pinaay* ida.+
6 Ngem um-umsien ken uy-uyawendak dagiti tattao,A kasla maysaak nga igges, saan a tao.+
7 Amin a makakita kaniak lalaisendak;+Agwingwingiwingda ken guyguyabandak:+
8 “Intalekna ti bagina ken Jehova. Bay-am nga isalakan ti Diosna!
Bay-am nga ispalenna, ta isu ket ipatpateg unay ti Diosna!”+
9 Sika ti nangiruar kaniak iti aanakan ni inak,+Sika ti nangaywan kaniak idi agsussusoak pay laeng ken inak.
10 Naipaaywanak* kenka sipud idi nayanakak;Sikan ti Diosko sipud pay idi nayinawak.
11 Dinak koma ad-adaywan, ta agpegpeggadak,+Ta awan sabalin a tumulong kaniak.+
12 Pinalikmutandak ti adu nga urbon a baka;+Pinalawlawandak dagiti napipigsa a baka iti Basan.+
13 Inngangada ti ngiwatda kaniak,+Kas iti ngumerngernger a leon a mangrangrangkay iti biktimana.+
14 Kaslaak iti danum a naibukbok;Nagligasi amin a tulangko.
Kasla allid* daytoy pusok;+A nalunag iti kaunggak.+
15 Naibusen ti pigsak. Kaslaak la nabuong a banga,+Dimket ti dilak iti gugotko;+Impannak iti abut a pakatayak.+
16 Ta pinalawlawandak dagiti managdakdakes;+Kasda la pangen dagiti aso a dumarup kaniak,+Kasda la leon a mangsikbab kadagiti imak ken sakak.+
17 Makitkitan ti amin a tulangko.+
Mulmulagatandak dagiti kabusorko.
18 Nagbibingayanda dagiti badok,Ken nagbibinnunotanda ti kawesko.+
19 Ngem sika, O Jehova, dinak panawan.+
Sika ti pigsak; alistuannak a tulongan.+
20 Ispalennak manipud iti espada,Isalakanmo ti napateg a biagko* iti gammat* dagiti aso;+
21 Salbarennak iti ngiwat ti leon+ ken kadagiti sara dagiti atap a baka;Sungbatannak ken isalakannak.
22 Ipakaammokto ti naganmo kadagiti kakabsatko;+Iti tengnga ti kongregasion idaydayawkanto.+
23 Idaydayawyo ni Jehova, dakayo nga agbuteng kenkuana!
Dakayo amin nga annak* ni Jacob, itan-okyo ti Diostayo!+
Dakayo amin nga annak* ni Israel, agrukbabkayo kenkuana.
24 Ta iti panagrigat ti mailupitlupit, dina inkidem dagiti matana;+Saanna a tinallikudan.+
Idi agpatulong, dinengngegna ti pakaasina.+
25 Idaydayawkanto iti dakkel a kongregasion;+Tungpalekto dagiti karik iti imatang dagiti agbuteng kenkuana.
26 Manganto dagiti naemma ket mapnekda;+Dagiti tattao biroken ken idaydayawdanto ni Jehova.+
Agbiagkayonto koma* iti agnanayon.
27 Ni Jehova ket malagipto ti intero a daga ken agsublida kenkuana.
Amin a pamilia kadagiti nasion agrukbabdanto kenkuana.+
28 Ta kukua ni Jehova ti kinaari,+Iturturayanna dagiti nasion.
29 Mangan ken agrukbabto ti amin a nabaknang* ditoy daga;Amin dagidiay agsubli iti tapok ket agparintumengto iti sanguananna,Awan a pulos kadakuada ti makabael a mangtaginayon iti biagda.*
30 Agserbinto kenkuana dagiti annak ken appokoda;*Maipakaammonto iti sumaruno a henerasion ti maipapan ken Jehova.
31 Umaydanto ket ibagada ti maipapan iti kinalintegna.
Kadagiti mayanakto pay laeng, ipakaammodanto dagiti inaramidna.
Footnotes
^ Posible a tono wenno estilo ti musika.
^ Wenno “Naitronoka iti tengnga (ngato).”
^ Wenno “imbabain.”
^ Lit., “Naipalladawak.”
^ Iti Ingles, “wax.”
^ Lit., “ti kakaisunak,” a tumukoy iti kararuana wenno biagna.
^ Lit., “ima.”
^ Lit., “bin-i.”
^ Lit., “bin-i.”
^ Lit., “Agbiag koma ti pusoyo.”
^ Lit., “nalukmeg.”
^ Wenno “kararuada.”
^ Lit., “bin-ida.”
