Salmo 43:1-5
43 Ukomennak, O Dios,+Asikasuem ti kasok+ maibusor iti nasion a saan a napudno.
Ilisinak iti tao a manangallilaw ken nakillo.
2 Ta sika ti Diosko, ti pagkamangak.+
Apay a binaybay-annak?
Apay a masapul a magnaak a naliday gapu iti panangirurumen ti kabusorko?+
3 Ipaaymo ti lawagmo ken ti kinapudnom.+
Dagita koma ti mangidalan kaniak.+
Dagita koma ti mangiturong kaniak iti nasantuan a bantaymo ken iti naindaklan a tabernakulom.+
4 Ket mapanakto iti altar ti Dios,+Iti Dios a gubuayan ti kasta unay a kinaragsakko.
Agtokarakto iti arpa+ a mangidaydayaw kenka, O Dios, ti Diosko.
5 Apay a malidlidayak?
Apay a mariribukanak?
Urayek ti Dios,+Ta idaydayawkonto kas ti Naindaklan a Manangisalakan kaniak ken Diosko.+
