Salmo 104:1-35
104 Idaydayawko ni Jehova.+
Naindaklanka unay, O Jehova a Diosko.+
Sikakaweska iti kinadayag* ken kinangayed.+
2 Kinawesam ti bagim iti lawag+ a kas iti lupot;Uk-ukradem ti langit a kas iti tela ti tolda,+
3 Ar-aramidem dagiti makinngato a kuartom iti dandanum iti ngato,*+Dagiti ulep ti us-usarem a karuahem,+Magmagnaka iti rabaw dagiti payak ti angin,+
4 Dagiti anghelmo ket pagbalinem nga espiritu,Dagiti ministrom ket pagbalinem a kasla iti mangibus nga apuy.+
5 Impasdekmo ti daga kadagiti pundasionna;+Saanto a mayakar iti ayanna* iti agnanayon nga awan inggana.+
6 Inabbongam dayta iti adalem a dandanum kas pannakakawesna.+
Dagiti bambantay ket natinep iti danum.
7 Idi nangtubngarka, nagtalaw dagiti danum;+Idi nangngegda ti gurruodmo, natarantada a pimmanaw
8 —Ngimmato dagiti bantay+ ken bimmaba dagiti tanap—Iti lugar a nangikabilam kadakuada.
9 Nangikabilka kadagiti pagpatinggaanda,+Tapno didan pulos lapunosen ti daga.
10 Pinagpussuakmo dagiti ubbog kadagiti tanap;Nagayusda iti nagbabaetan dagiti bantay.
11 Dagita ti paginuman dagiti atap nga animal iti tay-ak;Kadagita a mapennek ti waw dagiti atap nga asno.
12 Iti ngatuen dagita, agapon dagiti billit iti tangatang;Agkankantada iti nagbabaetan dagiti bulbulong.
13 Manipud kadagiti makinngato a kuartom sibsibugam dagiti bantay.+
Gapu iti bunga dagiti aramidmo mapnek ti daga.+
14 Pagtubuem dagiti ruot nga araben dagiti bakaKen ti mulmula nga usaren dagiti tattao,+Tapno mapataud ti taraon iti daga
15 Ken ti arak a mangparagsak iti puso ti tao,+Ti lana a mangpalamuyot iti rupa,Ken ti taraon a mangbiag iti puso ti tao.+
16 Mapmapnek dagiti kayom, O Jehova,Dagiti immulam a sedro ti Lebanon,
17 A pagum-umokan dagiti billit.
Dagiti kayo a parwa ti pagaponan dagiti billit a tikbaboy.+
18 Dagiti nangato a bambantay ti pagnaedan dagiti kalding ti bantay;+Dagiti dadakkel a bato ti paglemmengan dagiti koneho iti kabatuan.+
19 Inaramidmo ti bulan a pagilasinan kadagiti tiempo;Kabesado ti init no kaano ti ilelennekna.+
20 Paaddaem ti sipnget ket dumteng ti rabii+A panagdakiwas ti amin nga atap nga animal iti kabakiran.
21 Ngumernger dagiti urbon a leon* bayat nga agan-anupda+Ket agbirokda iti taraonda nga ipaay ti Dios.+
22 No sumingisingen ti init,Agawid ken aginanadan kadagiti rukibda.
23 Mapan ti tao iti trabahonaKet agingga iti rabii ti panagobrana.
24 O Jehova, anian a nakaad-adu dagiti inaramidmo!+
Pinarsuam amin ida babaen ti siribmo.+
Napno ti daga kadagiti pinataudmo.
25 Adda dita ti baybay a nakaad-adalem ken nakalawlawa,Nga ayan ti nagadu a sibibiag a banag, babassit ken dadakkel.+
26 Sadiay ti paglayagan dagiti barko,Ken pagay-ayaman ti Leviatan*+ nga inaramidmo.
27 Aminda ket agur-uray kenkaIti itedmo kadakuada a taraon iti tiempona.+
28 Alaenda dagiti itedmo.+
Mapnekda iti nasayaat a bambanag no ukradem ta dakulapmo.+
29 No tallikudam ida, madanaganda.
No pugsatem ti angesda,* matayda ket agsublida iti tapok.+
30 No ikkam ida iti anges,* maparsuada,+Ket pabaruem ti rabaw ti daga.
31 Agnanayon ti dayag ni Jehova.
Maragsakan ni Jehova kadagiti inaramidna.+
32 Kitaenna ti daga ket magunggon dayta;Sagidenna dagiti bantay ket agasukda.+
33 Kantaak ni Jehova+ bayat a sibibiagak;Agkantaakto iti panangidaydayaw* iti Diosko iti unos ti panagbiagko.+
34 Sapay koma ta makaay-ayo kenkuana dagiti pampanunotko.*
Agragsakakto ken Jehova.
35 Mapukawto dagiti managbasol iti daga,Ket awanton dagiti managdakdakes.+
Idaydayawko ni Jehova. Idaydayawyo ni Jah!*
Footnotes
^ Wenno “dignidad.”
^ Lit., “iti dandanum.”
^ Wenno “a magunggon.”
^ Wenno “burboran a bumaro a leon.”
^ Wenno “espirituda.”
^ Wenno “espiritu.”
^ Wenno “Agputarakto iti musika.”
^ Wenno mabalin a, “Makaparagsak koma ti panangut-utobko kenkuana.”
^ Wenno “Hallelujah!” Ti “Jah” ket napaababa a porma ti nagan a Jehova.
