Salmo 106:1-48
106 Idaydayawyo ni Jah!*
Agyamankayo ken Jehova, ta isu ket naimbag;+Agnanayon ti napudno nga ayatna.+
2 Asino ti makaipakaammo iti amin a naindaklan nga aramid ni Jehova,Wenno makaibaga iti amin nga aramidna a pakaidaydayawanna?+
3 Naragsak dagidiay agtignay maitunos iti kinahustisiaKen kanayon a nalinteg dagiti aramidda.+
4 Laglagipennak, O Jehova, inton paraburam dagiti tattaom.+
Aywanannak ken isalakannak,
5 Tapno mapadasak koma ti kinaimbag nga ipakpakitam kadagiti pinilim,+Tapno makapagragsakak met koma a kadua ti ilim,Tapno maipagpannakkel ken maidaydayawka a kadua dagiti tattaom.
6 Nagbasolkami a kas met laeng kadagidi ammami;+Nagkamalikami; nakaaramidkami iti dakes.+
7 Saan nga inapresiar* dagidi ammami idiay Egipto dagiti nakaskasdaaw nga aramidmo.
Linipatda ti dakkel a napudno nga ayatmo,Simmukirda ketdi idiay baybay, iti Nalabaga a Baybay.+
8 Ngem insalakanna ida maigapu iti naganna,+Tapno agdinamag ti pannakabalinna.+
9 Tinubngarna ti Nalabaga a Baybay, ket nagmaga;Indalanna ida iti lansadna a kas iti ilalasat iti desierto;*+
10 Insalakanna ida iti ima dagiti gumurgura kadakuada+Ken rinabsutna ida iti ima dagiti kabusorda.+
11 Linemmes ti danum dagiti kalabanda;Awan uray maysa a nakalasat* kadakuada.+
12 Ket namatida iti karina;+Isu nga inkantada ti panangidaydayawda kenkuana.+
13 Ngem nagbiitda a nalipatan ti inaramidna;+Saanda nga inuray ti balakadna.
14 Pinagpagustuanda dagiti tarigagay ti bagida idiay let-ang;+Sinubokda ti Dios idiay desierto.+
15 Intedna kadakuada dagiti kiniddawda,Ngem pinagsakitna ida a nakaigapuan ti ipapatayda.+
16 Iti nagkampuanda, nagimonda ken MoisesAgraman ken Aaron,+ a nasantuan ken Jehova.+
17 Isu a nagnganga ti daga ket inalun-onna ni DatanKen ginaburanna dagidiay nakikadua ken Abiram.+
18 Adda apuy a gimmil-ayab iti tengngada;Ket linamutna dagiti managdakdakes.+
19 Nagaramidda idiay Horeb iti estatua nga urbon a bakaKet nagruknoyda iti dayta a metal nga estatua;*+
20 Insukatda ti dayagkoIti estatua a baka a mangmangan iti ruot.+
21 Nalipatanda ti Dios+ a nangisalakan kadakuada,A nangaramid kadagiti naindaklan a bambanag idiay Egipto,+
22 Kadagiti nakaskasdaaw nga aramid iti daga ni Ham,+Kadagiti makapaamanga a bambanag idiay Nalabaga a Baybay.+
23 Dandani ibilinna koman a mapapatayda,Ngem ti pinilina a ni Moises ket nagpakpakaasi kenkuana,*Tapno malapdan ti mangdadael a pungtotna.+
24 Ket inumsida ti napintas a daga;+Saanda a pinati ti inkarina.+
25 Intultuloyda ketdi ti nagreklamo iti uneg ti toldada;+Saanda nga impangag ti timek ni Jehova.+
26 Isu nga inngatona ti imana a nagsapata maipapan kadakuadaA matayda idiay let-ang;+
27 Binay-anna a mapapatay dagiti annakda iti tengnga dagiti nasion,Ken inwarawarana ida iti daga.+
28 Ket nakipagdaydayawda* ken ni Baal ti Peor,+Ken nanganda kadagiti daton a nayatang kadagiti natay.*
29 Pinagpungtotda ti Dios gapu kadagiti inaramidda,+Ket dimteng kadakuada ti didigra.+
30 Ngem idi nagtignay ken nakibiang ni Finehas,Nagsardeng ti pannakadidigrada.+
31 Isu ket imbilang ti Dios kas nalintegIti amin a henerasion iti agnanayon.+
32 Pinagpungtotda ti Dios iti dandanum ti Meriba,*Isu a saan a nasayaat ti napasamak ken Moises gapu kadakuada.+
33 Pinagrurodda ni Moises,Isu a nagsao a sidadarasudos.+
34 Saanda a pinatay dagiti tattao,+Kas imbilin kadakuada ni Jehova.+
35 Nakilangenda ketdi kadagiti nasion+Ken tinuladda* dagiti aramidda.+
36 Intultuloyda ti nagdaydayaw kadagiti didiosen,+Ket nagbalin dagita a silo kadakuada.+
37 Indatonda kadagiti demonio dagiti annakda a lallakiAgraman dagiti annakda a babbai.+
38 Intultuloyda nga imbukbok ti dara dagiti inosente,+Ti dara dagiti mismo nga annakda a lallaki ken babbai,Nga indatonda kadagiti didiosen ti Canaan;+Ket narugitan ti daga gapu iti naibukbok a dara.
39 Nagbalinda a narugit gapu kadagiti aramidda,Nakaaramidda iti naespirituan a panagbalangkantis gapu kadagiti inaramidda.+
40 Isu a nakapungtot ni Jehova kadagiti tattaona,Ket ginurana dagiti tattao a kukuana.
41 Ket maulit-ulit nga inyawatna ida kadagiti nasion,+Tapno iturayan ida dagidiay manggurgura kadakuada.+
42 Inrurumen ida dagiti kabusorda,Ken naipasakupda iti pannakabalin* dagiti kabusorda.
43 Namin-adu nga inispalna ida,+Ngem agrebelde ken sumukirda,+Ket maibabainda gapu iti nagkamalianda.+
44 Ngem makitana ti panagrigatda+Ket denggenna ti panagpakaasida.+
45 Lagipenna ti tulagna maigapu kadakuada,Ken maasian* gapu ta dakkel* ti napudno nga ayatna.+
46 Tinignayna dagidiay nangipanaw kadagiti tattaonaTapno kaasianda ida.+
47 Isalakannakami, O Jehova a Diosmi,+Ket ummongennakami manipud kadagiti nasion+Tapno makapagyamankami iti nasantuan a naganmoKen naragsakkami a mangidaydayaw kenka.+
48 Maidaydayaw koma ni Jehova a Dios ti IsraelIti agnanayon;*+
Ket ibaga koma ti amin a tattao, “Amen!”*
Idaydayawyo ni Jah!*
Footnotes
^ Wenno “Hallelujah!” Ti “Jah” ket napaababa a porma ti nagan a Jehova.
^ Wenno “a natarusan.”
^ Wenno “let-ang.”
^ Wenno “natda.”
^ Wenno “sinukog nga estatua.”
^ Lit., “nagtakder iti giwang iti sanguananna.”
^ Wenno “insingedda ti bagbagida.”
^ Kayatna a sawen, dagiti daton a nayatang kadagiti natay wenno kadagiti awan biagna a didiosen.
^ Kaipapananna, “Panagaapa.”
^ Wenno “nasursuroda.”
^ Lit., “ima.”
^ Wenno “naruay.”
^ Wenno “maladingitan.”
^ Wenno “Manipud iti awan inggana agingga iti awan inggana.”
^ Wenno “Sapay koma!”
^ Wenno “Hallelujah!” Ti “Jah” ket napaababa a porma ti nagan a Jehova.
