Salmo 32:1-11
Salmo ni David. Maskil.*
32 Naragsak daydiay napakawan ti salungasingna, daydiay naabbongan* ti basolna.+
2 Naragsak ti tao a saan nga ibilang ni Jehova a nakabasol,+Ken saanna a pampanunoten ti mangallilaw.
3 Idi diak pay la nagpudno, kimmapsut dagiti tulangko gapu iti agmalmalem a panagasugko.+
4 Ta aldaw ken rabii a nariknak ti nadagsen nga imam.*+
Napukaw ti pigsak a kas iti danum a nagmaga gapu iti nabara a paniempo. (Selah)
5 Impudnok met laeng kenka ti basolko;Diak inabbongan ti biddutko.+
Kinunak: “Ipudnokto dagiti salungasingko ken Jehova.”+
Ket pinakawanmo dagiti basolko.+ (Selah)
6 Isu nga agkararag kenka ti tunggal maysa a napudno+Bayat a maasitgandaka pay.+
Uray no aglayus, dinto maan-ano.
7 Sika ti paglemmengak;Salaknibannak iti rigat.+
Iti aglikmutko, mangngegkonto ti naragsak nga ikkis ti pannakaisalakan.+ (Selah)
8 “Ikkankanto iti pannakaawat ket isuroka iti dalan a rebbeng a papanam.+
Balakadankanto bayat a kitkitaenka.+
9 Dika agbalin a kas iti di makaaw-awat a kabalio wenno mulo,+A masapul a tenglen babaen ti riendaTapno umasideg kenka.”
10 Adu ti ut-ot dagiti managdakdakes;Ngem daydiay agtalek ken Jehova tagiragsakennanto ti napudno nga ayatna.+
11 Dakayo a nalinteg, agrag-okayo gapu ken Jehova ken agragsakkayo;Dakayo a nalinteg ti panagpuspusona, agriawkayo gapu iti ragsak.
