Salmo 17:1-15

  • Kararag para iti pannalaknib

    • “Sinukimatmo ti pusok” (3)

    • “Iti sirok dagiti payakmo” (8)

Kararag ni David. 17  O Jehova, denggem ti panagpakaasik iti hustisia;Ipangagmo ti panagpatulongko kenka;Imdengam ti napasnek a kararagko.+   Ipaayannak koma iti hustisia;+No ania ti nalinteg, makitam koma.   Sinukimatmo ti pusok, sinukisoknak iti rabii;+Pinasudinak;*+Makitamto nga awan ti dakes a pinanggepko,Ken saanak a nakabasol kadagiti inyebkas ti ngiwatko.   Aniaman ti ar-aramiden dagiti tattao,Liklikak dagiti dalan ti mannanakaw maitunos iti sasaom.+   Papagnaennak iti dalanmoTapno saanak a maitibkol.+   Umawagak kenka, O Dios, ta ammok a sungbatannak,+ Iyasidegmo ta lapayagmo* kaniak. Denggem ti ibagak.+   Ipakitam ti nakaskasdaaw a napudno nga ayatmo,+O Manangisalakan kadagidiay agkamkamang iti kannawan nga imamManipud kadagiti sumukir kenka.   Salaknibannak a kas iti alintatao ti matam;+Ilemmengnak iti sirok dagiti payakmo.+   Iyalikakanak kadagiti managdakdakes a mangdarup kaniak,Kadagiti nanglikmut a kabusorko a mayat a mangpatay kaniak.+ 10  Awanan asi ti pusoda;*Natangsit ti panagsasaoda; 11  Addada iti sadinoman a turongenmi;+Agur-urayda iti gundaway a maitumbadakami.* 12  Kasda la iti leon a magagaran a mangrangrangkay iti biktimada,Kas iti urbon a leon nga agur-uray iti sikbabenna. 13  Tumakderka, O Jehova, ket sanguem+ ken parmekem;Isalakannak kadagiti managdakdakes babaen ti espadam; 14  Isalakannak babaen ti imam, O Jehova,Manipud kadagiti tattao iti daytoy a lubong,* a daytoy laeng agdama a biag ti namnamada,+Kadagidiay pinennekmo iti nasayaat a bambanag nga impaaymo,+Ken kadagidiay mangibati iti tawid iti adu nga annakda. 15  Parparaburannak gapu ta agar-aramidak iti umiso;Maragragsakanak nga agriing iti kaaddam.*+

Footnotes

Ti literal a kaipapanan ti Hebreo a sao ket tumukoy iti panangikkat iti rugit ti metal babaen ti pananglunag iti dayta.
Wenno “Agparintumeng ken agimdengka.”
Wenno “Nabalkutda iti bukodda a taba.”
Wenno “maituangdakami iti daga.”
Wenno “sistema ti bambanag.”
Wenno “a mangkita iti dayagmo.”