Salmos 39:1-13
Takichejpaj. Kaytaqa takina Jedutún*+ nisqa tonoman jina. Davidpa takiynin.
39 Noqa nerqani: “Allinta qhawarikusaj,ama parlaspa juchallikunaypaj.+
Sajra runaj ñaupaqenpi kashaspaqa,simiyman yukumata* churakusaj”,+ nispa.
2 Chʼinlla karqani, ni imata parlarqanichu.+
Nipuni allin kajmantapis parlarqanichu.
Nanayniytajrí sinchʼi karqa.
3 Ukhuypi sonqoyqa kʼajarerqa.
Tʼukurishajtiytaj sonqoyqa laurarisharqa.
Nerqanitaj:
4 “Jehová Diosníy, yanapariway ari, yachanaypaj maykʼajkamachus kausanayta,mashkha unaytachus kausanaytapis.+
Ajinamanta yachasaj kausayneyqa pisi tiempollapaj kasqanta.
5 Diosníy pisillata kausachiwanki.+
Tukuy kausayneyqa ni imapischu qanpajqa.+
Tukuy runas sinchʼi kallpayoj rijchʼakojtinkupis, mana imapischu kanku, uj samay jinalla kanku.+ (Sélah).*
6 Runaspa kausaynenqa llanthu jinalla pasapun.
Qhasillapaj afanakunku.
Qolqeta tantanku qhapajyanankupaj, nitaj yachankuchu pipajchus kananta.+
7 Jehová Diosníy, jina kajtin, ¿imapitaj atienekuymanri?*
Diosníy, qanllapi atienekuni.*
8 Perdonaway ari, chay mana kasukusqayrayku ama llakiypi rikhurinaypaj.+
Ama saqeychu wampu runas* burlakunawankuta.
9 Chay llakiyta qan apamuwasqaykirayku,simiytaqa mana kicharerqanichu,chʼinlla kakorqani.+
10 Amaña castigawaychu.
Makiykiwan maqawasqaykirayku tukukushaniña.
11 Qanmin runataqa pantasqanmanta castigaspa cheqanchanki,+munasqa imasnintapis thuta jina tukuchinki.
Tukuy runasqa uj samay jinalla kanku.+ (Sélah).
12 Jehová Diosníy, mañakususqayta uyarillaway ari.
Yanapata mañakuspa qhaparikamususqayta uyarillaway ari.+
Ama waqashajta qhawallawaychu ari.
Ñaupaqeykipeqa wajyarisqa forasterolla kani.+
Ñaupa tatasniy jinallataj forasterolla kani.+
13 Amaña ajina phiñasqa qhawamuwaychu ari,
chaywanqa manaraj wañupushaspa, manaraj chinkapushaspa kusisqa kasaj”.
Sutʼinchaykunasnin
^ Yukuma: waj lugarespi ninku ñuku, bozal.
^ Chayri “¿imapitaj suyakuymanri?”.
^ Chayri “qanllapi suyakuni”.
^ Chayri “sonso runas”.
