Salmos 107:1-43
107 Jehová Diosman graciasta qoychej, kʼacha kasqanrayku.+
Munakuynenqa wiñaypaj kallanqapuni.+
2 Chayta nichunku pikunatachus Jehová Dios enemigosninmanta kutichikaporqa chaykuna.
Pikunatachus enemigoj makinmanta kacharicherqa chaykuna.+
3 Chayta nichunku pikunatachus waj jallpʼasmanta tantamorqa+inti llojsimuy ladomanta, inti yaykuy ladomanta,norte ladomanta, sur ladomanta* chaykuna.+
4 Paykunaqa chʼin pampaspi, chʼaki jallpʼaspi kayman jaqayman purerqanku,mana ñanta tarerqankuchu mayqen llajtallamanpis tiyakoj rinankupaj.
5 Yarqhasqastaj chʼakisqastaj kasharqanku.
Saykʼusqankupi desmayanankupajña kasharqanku.
6 Chay jinata ñakʼarishajtinku Jehová Diosman qhaparikorqanku.+
Diostaj paykunata chay ñakʼariymanta librarqa.+
7 Paykunataqa cheqan ñanta puricherqa,+uj llajtaman tiyakoj chayanankupaj.+
8 Runasqa Jehová Diosman gracias nichunku+ munakuyninrayku,runaspajpis tʼukuna imasta ruwapusqanrayku.+
9 Diosqa chʼakichikojta yakuwan sajsachin.
Yarqhasqatapis allin imaswan sajsachin.+
10 Wakenqa manchay laqhapi tiyakorqanku,presos karqanku, cadenaswan watasqa ñakʼarerqanku.
11 Paykunaqa Diospa palabranta mana kasukorqankuchu.
Aswan Patapi kaj Diospa yuyaychasqanta mana valecherqankuchu.+
12 Chayrayku Diosqa paykunata kʼumuykachacherqa ñakʼarinankuta saqespa.+
Paykunaqa urmarqanku,* nitaj pipis yanaparej karqachu.
13 Ñakʼarishajtinku Jehová Diosman qhaparikorqanku yanapata mañakuspa.
Diostaj paykunata salvarqa chay ñakʼariymanta.
14 Diosqa paykunata sinchʼi laqhamanta orqhomorqa.
Watanasninkutapis pʼitirarqa.*+
15 Runasqa Jehová Diosman gracias nichunku munakuyninrayku,+runaspajpis tʼukuna imasta ruwapusqanrayku.
16 Diosqa cobre punkusta urmacherqa,chay punkuspa fierro trancanasnintapis pʼakirarqa.+
17 Paykunaqa wampus karqanku.
Pantasqankurayku, mana kasukusqankurayku ñakʼarerqanku.+
18 Ni imata mikhuyta munarqankuñachu,wañuy patapiña kasharqanku.
19 Ñakʼarishajtinku Jehová Diosman qhaparikorqanku yanapata mañakuspa.
Diostaj paykunata salvarqa chay ñakʼariymanta.
20 Diosqa sanoyanankuta kamacherqa, sanoyarqankutaj.+
Paykunataqa tʼoqospi presos kashajtinku orqhomorqa.
21 Runasqa Jehová Diosman gracias nichunku munakuyninrayku,runaspajpis tʼukuna imasta ruwapusqanrayku.
22 Diosman graciasta qospa jaywanasta qochunku.+
Ruwasqasninmanta kusiywan qhaparispa willachunku.
23 Mar yakusninta barcospi viajajkunaqa,pikunachus chay chhika yakuspi purinku kausayta maskʼaspa,+
24 chaykuna rikunku Jehová Diospa ruwasqasninta,ukhu yakuspi tʼukunasta ruwasqasnintapis.+
25 Paykunaqa rikunku parlasqallanwan sinchʼi wayrata jatarichisqanta,+wayrataj mar yakusta qhollchoqeyachisqanta.
26 Yakoqa qhollchoqeyaspa paykunata pataman oqharin,chantá watejmanta mar qocha chaupiman wijchʼuykullantaj.
Paykunaqa desgracia qhatirinanta yachaspa sinchʼita mancharikunku.
27 Machasqa jina kayman jaqayman chankaykachanku.*
Barcota sumajta apayta yachasqankoqa qhasi manakajlla.+
28 Ñakʼarishajtinku Jehová Diosman qhaparikunku yanapata mañakuspa.+
Diostaj paykunata salvan chay ñakʼariymanta.
29 Diosqa chay sinchʼi wayrata chʼinyachin,marpi qhollchoqeyaj yakustaj tiyaykunku.+
30 Chay yakus tiyaykojtintaj paykunaqa kusikunku,Diostaj maymanchá chayayta munarqanku chay mar kantuman chayachin.
31 Runasqa Jehová Diosman gracias nichunku munakuyninrayku,runaspajpis tʼukuna imasta ruwapusqanrayku.+
32 Diosta jatunchachunku tantasqa runas chaupipi.+
Diosta alabachunku kurajkuna tantasqa kashanku chay chaupipi.
33 Diosqa mayusta chʼaki wayqʼosman tukuchin.
Yaku juturistapis chʼaki pampasman tukuchin.+
34 Sumajta poqoj jallpʼatapis mana poqoj jallpʼaman tukuchin,+chaypi tiyakojkuna sajras kasqankurayku.
35 Diosqa chʼaki jallpʼasta qochasman tukuchin, totorasniyoj qochasman.
Tʼajra jallpʼastapis juturisniyoj jallpʼasman tukuchin.+
36 Chaymantaj yarqhasqa runasta tiyakunankupaj pusan,+chaypi llajtata rikhurichispa tiyakunankupaj.+
37 Chajrasta tarpunku, uvasta plantanku.+
Chay churasqankutaj sumajta poqorin.+
38 Diosqa paykunata bendecin, paykunataj ashkhaman miranku.
Manataj qhawakullanchu uywasninku pisiyananta.+
39 Paykunataj ñakʼariy kajtin, llakiy kajtin, phutiy kajtin,watejmanta pisiyapunku, kʼumuykachachisqataj kanku.
40 Diosqa kamachejkunata kʼumuykachachin.
Mana mayman riy atina chʼin pampaspitaj pawichispa purichin.*+
41 Wajchastataj jarkʼakun ama ñakʼarinankupaj,+familiasninkutapis mayta mirachin, oveja tropata jina.
42 Cheqan runasqa chayta rikuspa kusikunku,+sajra runastaj chʼinyakunku.+
43 Yachayniyoj runaqa chay imasta sumajta reparanqa.+
Allinta tʼukurispataj tantearenqa imastachus Jehová Dios munakuywan ruwasqanta.+
Sutʼinchaykunasnin
^ Chayri “pata ladomanta, ura ladomanta”.
^ Chayri “llustʼarqanku”.
^ Pʼitiy: waj lugarespi ninku tʼipiy.
^ Chankaykachay: waj lugarespi ninku tharpiykachay, aylinkachay, thamaykachay.
^ Chayri “musphaykachachin”.
