Salmos 30:1-12
-
Diosqa llakiyta kusiyman tukuchin
-
Diospa khuyakuynenqa wiñaypaj (5)
-
Davidpa takiynin. Wasita inaugurasqankumanta takiy.
30 Jehová Diosníy, salvawasqaykirayku* jatunchasqayki.
Mana saqerqankichu ñakʼarisqaymanta enemigosniy kusikunankuta.+
2 Jehová Diosníy, yanapata mañakuspa qanman qhaparikamorqayki, qantaj sanoyachiwarqanki.+
3 Jehová Diosníy, Sepulturamanta* sayarichimuwanki.+
Qanmin kausachiwanki. Qanmin wañuymanta* librawanki.+
4 Jehová Diosta kasukojkuna, alabanzasta takipuychej.+
Santo sutinta jatunchaychej.+
5 Diospa kʼajaj phiñakuynenqa uj ratollapaj,+khuyakuwasqanchejrí wiñaypaj.+
Chʼisiyaykuytaqa waqashasunman, sutʼiyaytatajrí may kusisqa kasunman.+
6 Ni ima llakiyniyoj kashajtiy nerqani:
“Noqataqa ni jaykʼaj ima llakiypis qhatiriwanqachu”, nispa.
7 Jehová Diosníy, ñaupaqeykipi allinpaj qhawasqa kashajteyqa, uj orqota jina sinchʼita sayachiwarqanki.+
Noqamanta uyaykita pakaykuwajtiykitaj, sinchʼita mancharikorqani.+
8 Jehová Diosníy, qanman mana saykʼuyta qhaparikamorqayki.+
Jehová Diosníy, mana saykʼuyta mañakorqayki khuyakunawaykita.
9 Wañojtiy, ¿ima allintaj kanman? Pʼampakuna tʼoqoman* yaykojtiy, ¿ima allintaj kanman?+
¿Ñutʼu jallpʼaqa yupaychasunkimanchu?+ ¿Ñutʼu jallpʼaqa cheqan Dios kasqaykita willanmanchu?+
10 Jehová Diosníy, uyarimuway, khuyarikuwaytaj.+
Jehová Diosníy, yanapariway ari.+
11 Llakisqa waqashajtiy kusisqata tusuchiwarqanki.
Qanmin qhashqa ropayta orqhowaspa, kusiywan pʼachallichiwarqanki,
12 alabanzasta takipusunaypaj, mana chʼinlla kanaypaj.
Jehová Diosníy, wiñay wiñaypaj jatunchasqayki.
Sutʼinchaykunasnin
^ Chayri “oqhariwasqaykirayku”.
^ Hebreo parlaypeqa nin, “tʼoqomanta”.
^ Chayri “Sepulturaman”.
