Nnwom 68:1-35
Wɔde ma dwom kyerɛfo. Dawid dwom. Ayeyi dwom.
68 Ma Onyankopɔn nsɔre, ma n’atamfo mmɔ nhwete,Na ma wɔn a wokyi no no nguan mfi n’anim.+
2 Sɛnea mframa bɔ wusiw kɔ no, pam wɔn saa ara;Sɛnea ogya nan ɛwokyɛm no,Ma nnebɔneyɛfo nyera mfi Onyankopɔn anim saa ara.+
3 Atreneefo de, ma wonni ahurusi,+Ma wɔn ho nsɛpɛw wɔn Onyankopɔn anim,Na wɔmfa anigye mmɔ ose.
4 Monto dwom mma Onyankopɔn, monto ayeyi nnwom* mma ne din;+
Monto dwom mma nea ɔnam asaase pradadaa so* no.
Ne din ne Yah!*+ Munni ahurusi wɔ n’anim.
5 Onyankopɔn a ɔte ne kronkronbea no,+Ɔno ne nnyanka agya ne akunafo kamafo.*+
6 Onyankopɔn ma nea onni boafo nya ofi tena mu;+Wɔn a wɔda afiase mpo, ɔma wonya wɔn ho tetew, na esi wɔn yiye.+
Wɔn a wɔasen wɔn kɔn* de, asaase wosee so na wɔbɛtena.+
7 O Onyankopɔn, bere a wudii wo man anim no,+Bere a wode wɔn faa sare so no, (Sela)
8 Asaase wosowee;+Onyankopɔn nti, osu tɔ* fii soro;Onyankopɔn, Israel Nyankopɔn nti, Sinai yi wosowee.+
9 O Onyankopɔn, wotɔɔ osu pii;Bere a wo man* brɛe no, womaa wɔn ahoɔden foforo.
10 Wɔtenatenaa ntamadan mu;+O Onyankopɔn, wo papayɛ nti womaa ohiani nyaa nea ohia.
11 Yehowa na ɔde ahyɛde ma ne nkurɔfo;Mmea a wɔka asɛmpa no yɛ dɔm kɛse.+
12 Ahemfo a wɔda asafodɔm ano de, guan+ ara na wobeguan.
Ɔbea a ɔte fie mpo, wɔde nneɛma fi ɔko mu ba a, onya bi.+
13 Ɛwom sɛ na moda abɔnten reto ogya* de,Nanso aburuburuw a dwetɛ dura ne ntaban ho,Na sika kɔkɔɔ amapa dura ne ntakra ho na mode bɛba.
14 Bere a ade nyinaa so Tumfo no bɔɔ asaase no so ahemfo hwetee no,+Sukyerɛmma tɔe wɔ Salmon.*
15 Basan+ bepɔw yɛ Onyankopɔn bepɔw;*Basan bepɔw yɛ bepɔw a nkoko dɔɔso wɔ so.
16 O mmepɔw atenten, adɛn nti na mo ani bereBepɔw a Onyankopɔn apaw de ayɛ* ne tenabea+ no?
Yehowa de, ɛhɔ na ɔbɛtena daa.+
17 Ɔko nteaseɛnam a Onyankopɔn wɔ no yɛ ɔpedu ne mpempem huhaa.+
Yehowa fi Sinai aba kronkronbea hɔ.+
18 Woforo kɔɔ soro;+Wode nkoa kɔe;Wode nnipa kɔyɛɛ akyɛde;+O Yah Nyankopɔn, asoɔdenfo+ mpo ka ho, sɛnea ɛbɛyɛ a wobɛtena wɔn mu.
19 Yehowa a ɔsoa yɛn adesoa ma yɛn da biara+ no, ɔno na ayeyi nka no.Ɔno ne yɛn nkwagye Nyankopɔn ankasa. (Sela)
20 Nokware Nyankopɔn no ne yɛn nkwagye Nyankopɔn;+Awurade Tumfo Yehowa na ogye onipa fi owu mu.+
21 Ampa ara, Onyankopɔn bɛyam n’atamfo ti pasaa;Obiara a ɔbɛtena ne bɔne* mu no, ɔbɛbɔ ne tikora.+
22 Yehowa aka sɛ: “Basan na mede wɔn befi aba;+Mede wɔn befi ɛpo bun mu aba,
23 Na ama mogya afɔw wo nan ho,+Na wo nkraman tɛkrɛma nso ataforo atamfo mogya.”
24 O Onyankopɔn, wohu santen a wo nkurɔfo ato;
Me Nyankopɔn, me Hene, ɛyɛ santen a ɛkɔ kronkronbea hɔ.+
25 Nnwontofo no na wodi kan, na asankubɔfo di akyi;+Wɔn ntam na mmeawa a wɔbɔ mpintin+ no di.
26 Munyi Onyankopɔn ayɛ wɔ asafo* kɛse mu,O mo a moyɛ Israel asefo, munyi Yehowa ayɛ.+
27 Benyamin+ a osua koraa no di nkurɔfo so;Yuda adehye ne wɔn dɔm a wɔteɛm nso saa ara;Sebulon adehye ne Naftali adehye nso ka ho.
28 Wo Nyankopɔn aka sɛ wubenya ahoɔden.
O Onyankopɔn a woadi ama yɛn, kyerɛ wo tumi.+
29 W’asɔrefi a ɛwɔ Yerusalem no nti,+Ahemfo de akyɛde bɛbrɛ wo.+
30 Mmoa a wɔnenam demmire* mu,Anantwinini+ kuw ne anantwi mma no, ka wɔn anim,Kosi sɛ nkurɔfo de dwetɛ bɛba abɛbɔ wɔn mu ase.
Nnipa a wɔn ani gye ɔko ho no, wabɔ wɔn ahwete.
31 Nneɛma a wɔde kɔbere ayɛ befi Egypt aba;*+Kus bɛyɛ ntɛm de akyɛde abrɛ Onyankopɔn.
32 O asaase so ahenni, monto dwom mma Onyankopɔn,+Monto ayeyi nnwom* mma Yehowa; (Sela)
33 Monto mma nea ɔte soro mu soro+ fi teteete no.
Hwɛ! Ɔbobom, ɔde nne a emu yɛ duru bobom.
34 Munnye ntom sɛ Onyankopɔn wɔ ahoɔden.+
Odi tumi kɛse wɔ Israel so,Na n’ahoɔden wɔ wim.*
35 Onyankopɔn wɔ ne tenabea kronkron kɛse no mu; ne* ho yɛ hu.+
Ɔno ne Israel Nyankopɔn,Na ɔno na ɔma ɔman no ahoɔden ne tumi.+
Ayeyi nka Onyankopɔn.
Ase Hɔ Nsɛm
^ Anaa “mommɔ nnwom.”
^ Ebetumi nso akyerɛ, “ɔnam omununkum so.”
^ “Yah” yɛ edin Yehowa a wɔatwa no tiaa.
^ Nt., “temmufo.”
^ Anaa “Atuatewfo.”
^ Nt., “nsu sosɔ.”
^ Nt., “w’agyapade.”
^ Ebetumi nso akyerɛ, “motete nguammuw ntam.”
^ Anaa “Ɛyɛɛ sɛnea sukyerɛmma atɔ wɔ Salmon.”
^ Anaa “bepɔw kɛse.”
^ Anaa “pɛ sɛ ɔde yɛ.”
^ Anaa “ɔnam afobu.”
^ Nt., “nhyiam.”
^ Ɛyɛ afifide bi a ɛwɔ nsu ho.
^ Ebetumi nso akyerɛ, “Ahemmɔfo befi Egypt aba.”
^ Anaa “Mommɔ nnwom.”
^ Nt., “omununkum mu.”
^ Nt., “wo.”
