Kɔ emu nsɛm afã hɔ

Kɔ emu nsɛm afã hɔ

 A4

Onyankopɔn Din Pue Wɔ Hebri Kyerɛwnsɛm No Mu

Ansa na wɔretu Israelfo ase akɔ Babilon no, sɛnea na wɔkyerɛw Onyankopɔn din wɔ tete Hebri kasa mu ni

Bere a Israelfo fii Babilon bae no, sɛnea na wɔkyerɛw Onyankopɔn din wɔ Hebri kasa mu ni

Onyankopɔn din pue bɛyɛ 7,000 wɔ Hebri Kyerɛwnsɛm no mu. Hebri nkyerɛwde anan a wɔde gyina hɔ ma Onyankopɔn din no ne יהוה. Wɔfrɛ nkyerɛwde yi Tetragrammaton, na Bible yi mu no, yɛakyerɛ ase “Yehowa.” Ɛno ne din a ɛdɔɔso paa wɔ Bible mu. Nnipa a Onyankopɔn de ne honhom kaa wɔn ma wɔkyerɛw Bible no de abodin pii frɛɛ no. Ebi ne “ade nyinaa so Tumfo,” “Ɔsorosoroni,” ne “Awurade.” Nanso, Tetragrammaton no nkutoo na wosii no pi sɛ ɛyɛ Onyankopɔn din.

Yehowa Nyankopɔn ankasa hwɛ maa nnipa a wɔkyerɛw Bible no de ne din baa mu. Nhwɛso bi ne sɛ, ɔde ne honhom kaa odiyifo Yoel ma ɔkyerɛwee sɛ: “Obiara a ɔbɛbɔ Yehowa din afrɛ no no, obenya nkwa.” (Yoel 2:32) Onyankopɔn maa odwontofo bi nso kyerɛwee sɛ: “Ma nnipa nhu sɛ wo a wo din de Yehowa no, wo nko ara ne Ɔsorosoroni a odi asaase nyinaa so.” (Dwom 83:18) Nnwom nhoma no yɛ anwensɛm nhoma a na Onyankopɔn nkurɔfo to emu nsɛm no sɛ nnwom anaa wɔka no sɛ anwensɛm. Saa nhoma yi nko ara mu no, Onyankopɔn din no pue bɛyɛ 700. Ɛnde adɛn nti na wohwɛ Bible pii mu a, wunhu Onyankopɔn din wom? Adɛn nti na yɛakyerɛ din no ase “Yehowa” wɔ Bible yi mu? Dɛn na Onyankopɔn din Yehowa no kyerɛ?

Nnwom nhoma no mu nsɛm bi a ɛwɔ Ɛpo a Awu Ho Nhoma Mmobɔwee bi mu na ɛwɔ ha yi. Ɛbɛyɛ sɛ Yesu bere so na wɔyɛe. Hebri nkyerɛwde a ɛwɔ so no, wofii Babilon bae no, ɛno na na wɔde kyerɛw Hebri kasa no. Nanso Tetragrammaton no nko ara de, tete Hebri nkyerɛwde na wɔde kyerɛwee

Adɛn nti na Onyankopɔn din no nni Bible pii mu? Nneɛma pii ntia. Ebinom susuw sɛ ade nyinaa so Tumfo Nyankopɔn de, enhia sɛ onya din pɔtee biara. Afei nso, na Yudafo wɔ atetesɛm bi sɛ Onyankopɔn din de, ɛnsɛ sɛ obiara bɔ no basabasa, anyɛ saa a ɛho begu fĩ. Ebetumi aba sɛ ɛno ka ho bi nti na ebinom ayi Onyankopɔn din afi Bible mu no. Ebinom nso gye di sɛ obiara nni hɔ a obetumi akyerɛ sɛnea wɔbɔ Onyankopɔn din no pɔtee, enti ɛbɛyɛ papa sɛ wɔde abodin bi te sɛ “Awurade” anaa  “Onyankopɔn” mmom frɛ no. Nanso, nsɛm a edidi so yi ma yehu sɛ saa nsɛm no ntɔ asom.

  • Wɔn a wɔka sɛ ade nyinaa so Tumfo Nyankopɔn nhia din pɔtee biara no bu wɔn ani gu biribi so. Ɛne sɛ, tete no, na nkurɔfo hwɛ Onyankopɔn Asɛm a ɛwɔ hɔ so kyerɛw bi, na nea wɔkyerɛwee ansa na wɔrewo Kristo no mpo, na Onyankopɔn din no wom. Yɛadi kan aka sɛ Onyankopɔn hwɛ maa ne din puee n’Asɛm no mu bɛyɛ 7,000. Ɛno ma yehu pefee sɛ ɔpɛ sɛ yehu ne din no na yɛbɔ.

  • Wɔn a wɔkyerɛ Bible ase a Yudafo atetesɛm nti woyi Onyankopɔn din fi wɔn nkyerɛase mu no bu wɔn ani gu asɛnhia bi so. Ɛno ne sɛ, Yudafo akyerɛwfo bi wɔ hɔ a, wɔrekasa a na wɔmmɔ Onyankopɔn din, nanso bere a wɔrehwɛ Bible no so akyerɛw bi no, wɔanyi din no amfi mu. Nkurɔfo kohuu tete nhoma mmobɔwee bi wɔ Ɛpo a Awu no mpɔtam baabi a wɔfrɛ hɔ Qumran, na na Onyankopɔn din no dɔɔso wɔ saa nhoma mmobɔwee no mu. Wɔn a wɔkyerɛ Bible ase no bi nso yɛ biribi a ɛma yehu sɛ na Onyankopɔn din no wɔ tete de a wodii kan kyerɛwee no mu. Wɔde nkyerɛwde akɛse kyerɛw “AWURADE” wɔ baabi a din no hyehyɛ no. Nanso asɛm no ne sɛ, wɔn ankasa gye tom sɛ edin no wɔ Bible mu bebree. Ɛnde dɛn na ɛkaa wɔn ma woyi fii Bible a wɔkyerɛɛ ase no mu? Hena na ɔmaa wɔn kwan sɛ wɔnsesa din no? Wɔn nko ara na wonim.

  • Nnipa a wɔka sɛ obiara nnim sɛnea wɔbɔ Onyankopɔn din no pɔtee nti ɛnsɛ sɛ yɛbɔ no, saa nnipa yi ara nso, Yesu din de, wɔbɔ. Nanso sɛnea Yesu bere so na n’asuafo bɔ ne din no, seesei ɛnyɛ saa koraa na Kristofo dodow no ara bɔ no. Ɛbɛyɛ sɛ na Yudafo a wɔyɛ Kristofo no bɔ Yesu din no Ye·shuʹa‛. Afei “Kristo” nso, na wɔbɔ no Ma·shiʹach, anaa “Mesia.” Kristofo a na wɔka Greek kasa no frɛɛ no I·e·sousʹ Khri·stosʹ, na Kristofo a wɔka Latin nso frɛɛ no Ieʹsus Chriʹstus. Wɔn a Onyankopɔn honhom kaa wɔn ma wɔkyerɛw Kristofo Greek Kyerɛwnsɛm no mpo, sɛ wɔrekyerɛw Yesu din a, na wɔkyerɛw no sɛnea wɔbɔ no wɔ Greek kasa mu no. Wohwɛ nso a, na ɛtɔ asom, efisɛ Greek ne kasa a na nnipa dodow no ara ka. Wiase Foforo Bible Nkyerɛase Kuw no nso kyerɛɛ Onyankopɔn din no ase “Yehowa.” Wɔn a wɔyɛe no nim sɛ ɛnyɛ saa pɛpɛɛpɛ na na wɔbɔ din no wɔ tete Hebri kasa mu. Nanso wohu sɛ ntease wom sɛ wɔbɛkyerɛ ase saa.

Adɛn nti na yɛakyerɛ din no ase “Yehowa” wɔ Wiase Foforo Nkyerɛase yi mu? Twi kasa mu no, wɔde YHWH na egyina hɔ ma  Tetragrammaton (יהוה) nkyerɛwde anan no. Tete no, sɛ wɔrekyerɛw Hebri a, na wɔmfa ɛnne nkyerɛwde te sɛ a, e, ɛ, i, o, ɔ, anaa u, nhyehyɛ mu. Enti Tetragrammaton no nso, na saa nkyerɛwde no bi nnim. Bere a na nnipa pii ka tete Hebri kasa no, sɛ obi rekenkan biribi a, na ɔno ankasa de ɛnne nkyerɛwde hyehyɛ mu.

Bere a wɔkyerɛw Hebri Kyerɛwnsɛm no wiei no, bɛyɛ mfe apem akyi na Yudafo abenfo benyaa ɔkwan bi a wɔfa so kyerɛw Hebri kasa no. Wofii ase de ahyɛnsode ahorow bi kekaa ho a ɛbɛboa obi a ɔrekenkan ama wahu ɛnne nkyerɛwde pɔtee a ɔde bɛhyehyɛ mu. Nanso ansa na saa ɔkwan foforo a wɔfa so kyerɛw Hebri kasa no reba no, na Yudafo pii abenya adwene bi a ɛmfata sɛ ɛyɛ mfomso sɛ obi bɛbɔ Onyankopɔn din. Enti sɛ wɔreka Onyankopɔn ho asɛm a, na wɔde abodin hyɛ ananmu. Ne saa nti, ɛbɛyɛ sɛ saa bere no, sɛ wɔrehwɛ nsaano nkyerɛwee no so akyerɛw bi na wɔkɔto Tetragrammaton nkyerɛwde anan no so a, wɔkyerɛw wie a, na wɔde ɛnne nkyerɛwde a ɛwɔ abodin a nkurɔfo taa de si anan no bi ahyehyem. Enti sɛ yɛpɛ sɛ yehu sɛnea na wɔbɔ din no wɔ Hebri kasa mu paa a, nea wɔde ɛnne nkyerɛwde hyehyɛɛ mu no rentumi mmoa yɛn. Ebinom susuw sɛ na wɔbɔ no “Yahwe,” ɛnna ebinom nso te nka sɛ na wɔbɔ no ɔkwan foforo so. Leviticus nhoma no fã bi a ɛwɔ Greek kasa mu ka Ɛpo a Awu Ho Nhoma Mmobɔwee no ho, na wohwɛ mu a, wubehu sɛ wɔakyerɛw Onyankopɔn din no Iao. Ɛnyɛ ɛno nko; tete Greek akyerɛwfo bi nso kyerɛ sɛ na wɔbɔ din no Iae, I·a·beʹ, anaa I·a·ou·eʹ. Nanso, yɛrentumi nsi no pi nka sɛ sɛɛ anaa sɛɛ na na wɔbɔ din no. Nea ɛwom ne sɛ, yennim sɛnea na Onyankopɔn asomfo a wɔtenaa ase tete no bɔ Onyankopɔn din no wɔ Hebri kasa mu. (Genesis  13:4; Exodus 3:15) Nea yenim ara ne sɛ, sɛ Onyankopɔn ne n’asomfo rekasa a, na ɔtaa bɔ ne din kyerɛ wɔn, na sɛ wɔn nso ne Onyankopɔn anaa wɔn yɔnko nnipa rekasa a, na wɔtaa bɔ din no.—Exodus 6:2; 1 Ahene 8:23; Dwom 99:9.

Sɛnea William Tyndale kyerɛɛ Onyankopɔn din ase wɔ Genesis 15:2 ni. Pentateuch (Bible mu nhoma anum a edi kan) a ɔkyerɛɛ ase afe 1530 no mu na ɛwɔ

Ɛnde adɛn nti na yɛakyerɛ din no ase “Yehowa” wɔ Bible yi mu? Efisɛ ɛnyɛ nnɛ na wofii ase frɛɛ no saa wɔ Twi kasa mu. Onyankopɔn din “Yehowa” no dii kan puee Twi Bible mu wɔ nkyerɛase a Johann Gottlieb Christaller yɛe wɔ afe 1871 no mu.

Ebinom te nka sɛ ɛsɛ sɛ yɛfrɛ Onyankopɔn “Yahwe,” ɛnna ebinom nso se “Yehowa.” Afe 1911 no, Bible ho ɔbenfo Joseph Bryant Rotherham a nkurɔfo bu no paa no kyerɛw nhoma bi a wɔato din Studies in the Psalms. Ɔkyerɛɛ mu wɔ nhoma no mu sɛ, ɔno de, “nnipa a wɔtaa kenkan Bible no, edin a wɔn mu dodow no ara nim (na wogye tom)” no, ɛno na ɔde aba ne Bible nkyerɛase no mu. Afe 1930 mu no, ɔbenfo A. F. Kirkpatrick nso kaa biribi saa. Ɔkae sɛ: “Ɛnyɛ nea ehia ne sɛnea wɔbɔ din no; nea ehia ne sɛ obiara behu sɛ ɛyɛ Din Ankasa, na ɛnyɛ abodin kɛkɛ te sɛ ‘Awurade.’”

Tetragrammaton nkyerɛwde YHWH no kyerɛ: “Nea Ɔma Ɛyɛ Hɔ”

Hebri adeyɛ asɛm a wɔkyerɛw no HWH no kyerɛ: “ɛyɛ hɔ”

Dɛn na edin Yehowa kyerɛ? Edin Yehowa no fi Hebri adeyɛ asɛm bi mu, na nea saa asɛm no kyerɛ ne, “ɛyɛ hɔ.” Nhomanimfo binom susuw sɛ adwene a ɛwɔ saa adeyɛ asɛm no akyi ne sɛ obi na ɔma biribi yɛ hɔ. Enti Wiase Foforo Bible Nkyerɛase Kuw no te Onyankopɔn din no ase sɛ, “Nea Ɔma Ɛyɛ Hɔ.” Nhomanimfo adwene nhyia wɔ edin no nkyerɛase ho, enti yɛrentumi nka sɛ kyenkyen ara a, saa na ɛkyerɛ. Nanso edin no nkyerɛase no fata Yehowa paa, efisɛ ɔno na ɔbɔɔ biribiara, na nea ɔbɔ ne tirim sɛ ɔbɛyɛ biara nso, ɔma ɛyɛ hɔ. Ɔno na ɔmaa abɔfo, nnipa, ne amansan yi mu nneɛma a aka nyinaa bae. Afei nso ɛmfa ho nea ebesi biara, ɔhwɛ ma n’apɛde ne n’atirimpɔw yɛ hɔ.

Hebri adeyɛ asɛm a Yehowa din fi mu no, wɔde adeyɛ asɛm bi a ɛne no sɛ dii dwuma wɔ Exodus 3:14. Ɛhɔ kan sɛ: “Mɛyɛ Me Ho Nea Mepɛ Sɛ Meyɛ Biara.” Nanso yɛreka paa a, ɛnyɛ Onyankopɔn din no nkyerɛase nyinaa ne no. Ne nyinaa mu no, ɛma yehu biribi fa Onyankopɔn ho, kyerɛ sɛ, tebea biara mu no, ɔyɛ ne ho sɛnea ɛsɛ sɛ ɔyɛ ma n’atirimpɔw yɛ hɔ. Nanso ɛnyɛ ɛno nko ara. Edin Yehowa no san kyerɛ sɛ otumi ma n’abɔde yɛ nea ɔpɛ ma n’atirimpɔw ba mu.