Kɔ emu nsɛm afã hɔ

Kɔ emu nsɛm afã hɔ

  A2

Nneɛma Foforo a Ɛwɔ Nkyerɛase Yi Mu

Afe 1950 mu na woyii Kristofo Greek Kyerɛwnsɛm—Wiase Foforo Nkyerɛase no adi wɔ Borɔfo kasa mu, na woyii Kyerɛw Kronkron—Wiase Foforo Nkyerɛase no nso adi wɔ afe 1961 mu. Saa Bible yi, wɔkyerɛɛ ase pɛpɛɛpɛ fii kasa a wɔde kyerɛw Kyerɛw Kronkron no mu, na na ne kan nso yɛ mmerɛw. Efi bere a woyii no adi no, wɔakyerɛ ase kɔ kasa bɛboro 190 mu, na nnipa ɔpepem pii akenkan anya so mfaso.

Nanso wohwɛ bɛyɛ mfe 50 a atwam yi a, kasa a nkurɔfo ka no asesa. Eyi nti, Wiase Foforo Bible Nkyerɛase Kuw a wɔwɔ hɔ nnɛ no hui sɛ ɛsɛ sɛ wɔyɛ nsakrae ahorow bi wɔ nkyerɛase no mu na sɛ obi kan no nnɛ a, aka ne koma. Enti Bible yi mu no, yɛasesa nsɛmfua ne nneɛma bi wom. Yɛreyɛ saa no, botae a edidi so yi na yɛde sii yɛn ani so:

  • Yɛde nsɛm a ntease wom na nkurɔfo ka no nnɛ na ɛkyerɛɛ ase. Ɛho nhwɛso ne sɛ, seesei yɛakyerɛ “abodwokyɛre” ase “abotare,” efisɛ ɛno na nkurɔfo te ase ntɛm. (Galatifo 5:22) Afei nso, Bible dedaw no mu no, na yetumi ka sɛ obi yɛ “aguaman,” nanso seesei yɛayɛ no “tuutuuni.” (Genesis 38:15) Bible foforo yi mu no, yɛasesa “boasetɔ” ayɛ no “animia.” (Yakobo 1:4) Yɛakyerɛ “afide” ase sɛ “ɔbra fĩ,” na “anigye ntraso” nso, yɛayɛ no “apontow a ase yɛ gyegyeegye.” (Galatifo 5:19-21) Asɛmfua “nsɔano” nso, seesei yɛakyerɛ ase “ahyɛnsode.”—Adiyisɛm 5:1.

    Tete Hebri ne Greek kasa mu no, asɛmfua “aba” betumi akyerɛ dua bi aba, obi mma anaa n’asefo, na ebetumi mpo akyerɛ ɔbarima ho nsu. Twi kasa mu no, yɛreka nnipa ho asɛm a, yɛmfa asɛmfua “aba” nni dwuma. Eyi nti, baabiara a saa asɛmfua no bepue no, yɛhwɛ nea wɔreka ho asɛm wɔ hɔ, na yɛde asɛmfua a ɛfata ahyɛ hɔ. (Genesis 1:11; 22:17; 48:4; Mateo 22:24; Yohane 8:37) Mpɛn pii no, baabi a asɛmfua “aba” pue wɔ Bible mu no, sɛ ɛfa Eden bɔhyɛ a ɛwɔ Genesis 3:15 no ho a, yɛkyerɛ ase ‘aseni.’

    Hebri asɛmfua a bere bi yɛkyerɛɛ ase “adɔe” no, seesei yɛakyerɛ ase “ɔdɔ a enni huammɔ.” Nea enti a yɛayɛ no saa ne sɛ “adɔe” tumi kyerɛ papayɛ anaa adekyɛ. Nanso saa Hebri asɛmfua no kɔ akyiri sen “adɔe.” Nea Hebri asɛmfua no kyerɛ ne sɛ obi de nokwaredi bɛbata obi ho denneennen.—1 Samuel 20:8; Dwom 63:3; Mmebusɛm 3:3.

  • Yɛama Bible mu nsɛm bi mu ada hɔ. Nsɛm bi a na ɛwɔ Wiase Foforo Nkyerɛase dedaw no mu no, na emu yɛ den kakra, enti nnipa pii wɔ hɔ a, na ɛyɛ den sɛ wɔbɛte ase yiye. Ɛho nhwɛso ne  “atweaatam.” Seesei yɛayɛ no “awerɛhow ntama” sɛnea obiara bɛte ase. (Hiob 16:15) Baako nso ne “ayitoto”; baabi wɔ hɔ a yɛayɛ no “ɔbarima a wɔasa no,” baabi nso, yɛayɛ no ‘obi a ɔrentumi nware.’—Yesaia 56:3; Mateo 19:12.

    Bible dedaw no mu no, ɛkame ayɛ sɛ baabiara a Hebri asɛmfua neʹphesh ne Greek asɛmfua psy·kheʹ bepue no, na yɛkyerɛ ase “ɔkra.” Sɛnea nnipa pii te asɛmfua “ɔkra” ase no, ɛnyɛ saa na ɛkyerɛ, enti sɛnea yɛkyerɛɛ ase saa bere no boaa wɔn a wɔkenkan asɛm no ma wohuu akwan horow a Bible akyerɛwfo no faa so de neʹphesh ne psy·kheʹ yɛɛ adwuma. Saa nsɛmfua yi tumi kyerɛ (1) onipa, (2) onipa nkwa, (3) abɔde a nkwa wom, (4) nneɛma a obi kɔn dɔ, anaa mpo (5) nnipa a wɔawuwu. Nanso ɛnnɛ, sɛ nkurɔfo rekasa a, asɛmfua “ɔkra” ntaa mpue wɔn kasa mu. Enti yesii gyinae sɛ, baabiara a tete nsɛmfua a yɛkyerɛɛ ase “ɔkra” no pue no, yɛbɛhwɛ ntease a ɛwom no na yɛde akyerɛ ase. Yɛkyerɛ ase saa wie a, mpɛn pii no, yɛde ase hɔ asɛm a ɛkenkan sɛ, “Anaa ‘ɔkra’” hyɛ ho. (Wubehu eyi ho nhwɛso wɔ Genesis 1:20; 2:7; Leviticus 19:28; Dwom 3:2; Mmebusɛm 16:26; Mateo 6:25.) Nanso sɛ Bible mu asɛm no yɛ anwensɛm anaa ɛyɛ asɛm a nkurɔfo pii nim a, ɛnde yegyaw asɛmfua “ɔkra” no wom. Yewie a, yɛde ase hɔ asɛm bi hyɛ ho a ɛde ɔkenkanfo no kɔ Nkyerɛkyerɛmu afã hɔ, anaa ɛkyerɛ ɔkwan foforo a yebetumi akyerɛ asɛmfua no ase.—Deuteronomium 6:5; Dwom 131:2; Mmebusɛm 2:10; Mateo 22:37.

    Asɛmfua “asaabo” nso, sɛ epue wɔ baabi na ɛfa asaabo ankasa ho a, yegyaw no saa ara. Nanso kyerɛwnsɛm bi te sɛ Dwom 7:9, Dwom 26:2, ne Adiyisɛm 2:23 de, ɛmfa “asaabo” ankasa ho, enti yɛde ntease a ɛwom no kyerɛɛ ase sɛ “nea ɛwɔ nnipa mu” anaa obi “tirim adwene,” ɛnna yɛde ne nkyerɛase tee no hyɛɛ ase hɔ asɛm mu.

    Yɛnhwɛ asɛmfua “koma” nso. Hebri ne Greek kasa mu no, etumi kyerɛ koma ankasa, ɛnna etumi kyerɛ nneɛma foforo nso. Saa ara na ɛte wɔ Twi kasa mu. Enti Bible yi mu no, ɛyɛ a yegyaw asɛmfua no hyɛ hɔ saa ara. Nanso mmeae mmaako mmaako bi wɔ hɔ a, wode asɛmfua no hyɛ hɔ a, ntease mma mu papa, enti yɛde adwene a ɛwɔ akyi no na ɛkyerɛɛ ase. Ɛho nhwɛso wɔ Dwom 12:2. Asɛm a kan no yɛkyerɛɛ ase “wɔde anodɛ keka nsɛm a efi koma ntanta mu” no, seesei yɛakyerɛ ase “wɔdɛfɛdɛfɛ nkurɔfo, na wɔdaadaa wɔn.” Afei yɛde ne nkyerɛase tee no ahyɛ ase hɔ asɛm mu. Nsɛm foforo bi te sɛ “srade,” “honam,” ne “abɛn” nso, saa ara na yɛayɛ no. Baabi a ebiara pue na ɛbɛkyerɛ sɛnea yɛbɛkyerɛ ase. (Genesis 45:18; Ɔsɛnkafo 5:6; Dwom 112:9) Saa nsɛm yi bi wɔ hɔ a, yɛakyerɛkyerɛ mu wɔ ɔfã a yɛato din “Bible Mu Nsɛm Bi Mu Nkyerɛkyerɛmu.”

  • Yɛama ne kan ayɛ dɛ. Bible yi mu no, yɛde kasa a ɛda nkurɔfo ano na ɛkyerɛɛ ase. Afei nso, sɛnea yɛkyerɛw nsɛm bi no nso, yɛasakra  mu ama ne bɔ ayɛ mmerɛw. Ebi ne sɛ, seesei yɛasesa “asase” ayɛ no “asaase,” “Kanaan” abɛyɛ “Kaanan,” ɛnna “atade” nso yɛayɛ no “ataade.”—Genesis 1:1; 9:18; 25:25.

Nneɛma Foforo a Ɛsan Wɔ Nkyerɛase Yi Mu:

Saa Bible yi, ase hɔ nsɛm dodow bi wom, na egu ahorow. Sɛnea ebiara te ho nhwɛso na edidi so yi:

  • “Anaa” Ɛma yehu akwan foforo a yebetumi afa so akyerɛ Hebri, Aram, anaa Greek asɛm bi ase a ntease no nsesa.—Genesis 1:2, ase hɔ asɛm a ɛda asɛmfua “honhom” ho; Yosua 1:8, “dwinnwen ho.”

  • “Ebetumi nso akyerɛ” Ɛma yehu ntease foforo a yebetumi de akyerɛ asɛm no ase ama ayɛ yiye.—Genesis 21:6; “ne me bɛserew”; Sakaria 14:21, “Kaananni.”

  • “Nt.” Ɛyɛ Hebri, Aram, anaa Greek asɛm anaa asɛmfua a wɔakyerɛ ase tee.—Genesis 6:9, “beresofo”; Genesis 30:22, “onyinsɛnee.”

  • Nsɛm bi asekyerɛ ne nsɛm bi mu nkyerɛkyerɛmu Ebi yɛ edin ahorow bi asekyerɛ (Genesis 3:17, “Adam”; Exodus 15:23, “Mara”); nkyerɛkyerɛmu a ɛfa biribi mu duru ne nea wɔde susuw nneɛma ho (Genesis 6:15, “basafa”); nea edinnsiananmu bi gyina hɔ ma no (Genesis 38:5, “ɔwɔ”); nsɛm bi a wɔakyerɛkyerɛ mu wɔ Nkekaho ne Nkyerɛkyerɛmu afã hɔ.—Genesis 37:35, “Ɔdamoa”; Mateo 5:22, “Gehenna.”

Ɔfã bi wɔ Bible yi mfiase a wɔato din “Dɛn Na Ɛwɔ Onyankopɔn Asɛm Mu?” Saa ɔfã no, wɔahyehyɛ nsɛntitiriw a Bible kyerɛkyerɛ no wɔ hɔ. Sɛ wufi Bible nhoma a etwa to no so a, na worekɔ “Bible Mu Nhoma a Wɔahyehyɛ,” “Bible Mu Nsɛm a Wɔahyehyɛ,” ne “Bible Mu Nsɛm Bi Mu Nkyerɛkyerɛmu” so. “Bible Mu Nsɛm Bi Mu Nkyerɛkyerɛmu” anaa Nkyerɛkyerɛmu afã no, ɛboa akenkanfo ma wɔte Bible mu nsɛm bi ase. Nkekaho A na ɛtoa so, na wubehu nea edidi so yi wɔ hɔ: “Ɔkwan a Wɔfa So Kyerɛ Bible Ase,” “ Nneɛma Foforo a Ɛwɔ Nkyerɛase Yi Mu,” “Nea Ɛyɛe a Yɛn Nsa Kaa Bible,” “Onyankopɔn Din Pue Wɔ Hebri Kyerɛwnsɛm No Mu,” “Onyankopɔn Din Pue Wɔ Kristofo Greek Kyerɛwnsɛm No Mu,” “Nsɛm a Wɔahyehyɛ: Adiyifo Ne Ahemfo a Na Wɔwɔ Yuda Ne Israel,” ne “Nneɛma Atitiriw a Esisii Yesu Asetena Mu Wɔ Asaase So.” Wudu Nkekaho B nso a, map ahorow, nsɛm a wɔahyehyɛ, ne nsɛm foforo bi wɔ hɔ a ɛbɛboa wɔn a wɔpɛ Bible mu nhwehwɛmu no paa.

Bible nhoma biara refi ase a, wɔahyehyɛ ti ahorow no mu nsɛntitiriw wɔ anim, na wɔde nkyekyɛm a wubehu saa nsɛntitiriw no aka ho. Eyi boa akenkanfo ma wohu saa Bible mu nhoma no ani so. Bible yi mu no, yɛahyehyɛ kyerɛwnsɛm bi wɔ kratafa biara mfinimfini, na ɛtwe adwene kɔ Bible mu nsɛm foforo so. Ná ebi wɔ kan de no mu, nanso seesei de, nea ehia paa no na yɛde aba foforo yi mu.