Nnwom 104:1-35

  • Ayeyi a wɔde ma Onyankopɔn wɔ n’abɔde ho

    • Asaase betim hɔ daa (5)

    • Ɔde nsã ne aduan ma onipa dasani (15)

    • “Wo nnwuma dɔɔso!” (24)

    • “Sɛ wuyi wɔn honhom a, wowu” (29)

104  Ma minyi* Yehowa ayɛ.+ O Yehowa me Nyankopɔn, woyɛ kɛse paa.+ Wufura tumi* ne anuonyam.+   Hann akata wo ho+ sɛ ntama;Woatrɛw ɔsoro mu sɛnea wɔtrɛw ntamadan ntama mu.+   Nsu mu na ɔbobɔɔ nnua wɔ wim de sii ne dan;+Ɔde omununkum ayɛ ne teaseɛnam,+Na ɔnantew mframa ntaban so.+   Ɔsoma n’abɔfo sɛ ahonhom,Na ɔsoma n’asomfo sɛ ogya a ɛredɛw.+   Ɔde asaase atim ne fapem so;+Ebetim baabi a etim daa daa.*+   Wode subun kataa ho sɛ ntama.+ Mmepɔw atifi na na nsu no gyina.   W’animka nti, eguanee;+W’aprannaa mmobom nti, ɛde ahopopo guanee;   Mmepɔw momaa wɔn ho so,+ na abon nso siansianee,Ɛkɔɔ faako a woasiesie ama wɔn no.   Wutwaa ɔhye maa nsu no,+Sɛnea ɛbɛyɛ a ɛremmɛkata asaase so bio. 10  Ɔsoma nsu kɔ abon mu;Ɛsen fa mmepɔw ntam. 11  Ɛma wuram mmoa nyinaa nya nsu nom;Sare so mfurum de kum wɔn sukɔm. 12  Nnua a esisi ho no, ɛso na wim nnomaa yɛ wɔn mmerebuw;Nnubaa no mu na wɔto dwom. 13  Woma nsu fi wo dan mu begugu mmepɔw so.+ Aba a efi wo nsam na ɛma asaase mee.+ 14  Ɔma sare fifi ma anantwi,Na afifide pue ma adasamma;+Ɔma asaase bɔ aduan, 15  Ɔma ɔdasani nya nsã* ma ne koma ani gye,+Ɔde ngo ma no ma n’anim yɛ sɔɔsɔɔ,Na ɔma ɔdasani aduan* ma onya* ahoɔden.+ 16  Yehowa nnua nya nsu pii nom,Lebanon sida a wadua no; 17  Ɛhɔ na nnomaa yɛ mmerebuw. Asukɔnkɔn nso,+ wɔn fi wɔ ɔpopaw nnua so. 18  Mmepɔw atenten so na bepɔw so mpɔnkye te;+Nkukuban nso fi wɔ abotan mu.+ 19  Wayɛ ɔsram sɛ ɛnkyerɛ mmere;Owia nim bere a ɛsɛ sɛ ɛkɔtɔ.+ 20  Woma sum ba, na ade sa;+Saa bere no na nkekaboa a wɔwɔ wuram nyinaa di akɔneaba. 21  Agyata* bobom pɛ nam;+Onyankopɔn nsam na wɔkɔpɛ wɔn aduan.+ 22  Sɛ owia pue a,Wɔsan wɔn akyi kobutubutuw wɔn abon mu. 23  Onipa kɔ ne nnwuma so,Na ɔyɛ adwuma kosi anwummere. 24  O Yehowa, wo nnwuma dɔɔso!+ Nyansa na wode ayɛ ne nyinaa.+ Wo nsa ano adwuma ahyɛ asaase so ma. 25  Ɛpo wɔ hɔ yi, ɛsõ na ɛtrɛw,Na mmoa nketewa ne akɛse ayɛ mu ma.+ 26  Ahyɛn fa so,Na woayɛ Lewiatan*+ sɛ onni mu agoru. 27  Wo na wɔn nyinaa hwɛ woSɛ ma wɔn aduan bere a ɛsɛ mu.+ 28  Nea wode ma wɔn na wodi.+ Wubue wo nsam a, wonya nneɛma pa di mee.+ 29  Sɛ wode w’anim hintaw a, wɔyɛ basaa; Sɛ wuyi wɔn honhom a, wowu na wɔsan kɔ dɔte mu.+ 30  Sɛ wosoma wo honhom a, wode bɔ ade,+Na woma asaase ani yɛ foforo bio. 31  Yehowa anuonyam bɛtena hɔ afebɔɔ. Yehowa bedi ne nnwuma ho ahurusi.+ 32  Sɛ ɔhwɛ asaase a, ɛwosow,Na ɔde ne nsa ka mmepɔw a, efi wusiw.+ 33  Mɛto dwom ama Yehowa+ me nkwa nna nyinaa;Mete nkwa mu yi de, mɛto ayeyi dwom* ama me Nyankopɔn.+ 34  Ma nea midwinnwen ho nyɛ no fɛ.* Medi Yehowa mu ahurusi. 35  Abɔnefo bɛyera afi asaase so,Na amumɔyɛfo rentena nkwa mu bio.+ Ma minyi* Yehowa ayɛ. Munyi Yah ayɛ!*

Ase Hɔ Nsɛm

Anaa “nidi.”
Anaa “Ma me kra nyi.”
Anaa “Ɛrenhinhim da.”
Anaa “bobesa.”
Nt., “paanoo.”
Anaa “ne koma nya.”
Anaa “Agyatanini a wɔn ho yɛ den.”
Hwɛ Nkyerɛkyerɛmu afã hɔ.
Anaa “mɛbɔ nnwom.”
Ebetumi nso akyerɛ, “Ma nea midwen fa ne ho no nsɔ n’ani.”
Anaa “Ma me kra nyi.”
Anaa “Haleluya!” “Yah” yɛ edin Yehowa a wɔatwa no tiaa.