Dipesalema 4:1-8
Go mokaedi; e opelwe ka diletswa tsa megala. Pina ya ga Dafide.
4 Fa ke bitsa, nkarabe, tlhe Modimo wa me yo o siameng.+
Ntirele kgoro ya botso* fa ke le mo matshwenyegong.
Nkutlwele botlhoko mme o utlwe thapelo ya me.
2 Lona bomorwa batho, lo tla ntlontlolola ka lobaka lo lo kae?
Lo tla rata se se se nang mosola e bile lo tla nna lo bua maaka ka lobaka lo lo kae? (Selah)
3 Itseng gore Jehofa o tla tshwara motho wa gagwe yo o ikanyegang ka tsela e e kgethegileng;*Jehofa o tla utlwa fa ke goela kwa go ene.
4 Fa lo galefile, lo se ka lwa leofa.+
Buelang mo dipelong tsa lona, lo le mo malaong a lona, mme lo didimale. (Selah)
5 Ntshetsang Modimo ditlhabelo ka pelo e e siameng,Mme lo ikanye Jehofa.+
6 Go na le ba bantsi ba ba reng: “Ke mang yo o tla dirang gore re atlege?”
A lesedi la sefatlhego sa gago le re phatsimele, tlhe Jehofa.+
7 O dirile gore pelo ya me e itumele thataGo feta ya ba ba nang le thobo e ntsi ya dijo tsa ditlhaka le beine e ntšha.
8 Ke tla rapama ke bo ke thulamela ka kagiso,+Gonne ke wena fela o dirang gore ke nne ka polokesego Jehofa.+
Dintlha Tse di Kwa Tlase
^ Seheb., “Ntirele lefelo le le bulegileng.”
^ Kgotsa “o tlhomolola motho wa gagwe yo o ikanyegang; o itlhaolela motho wa gagwe yo o ikanyegang.”
